ಹಂದಿಗನೂರು ಗ್ರಾಮಸ್ಥರಿಂದ ಹೊಳೆಯಲ್ಲಿ ಸಿಲುಕಿದ ತಾಯಿ-ಮಗನ ರಕ್ಷಣೆ

ಆನಂದಪುರ: ಸಮೀಪದ ಹೊಸೂರು ಗ್ರಾಪಂ ವ್ಯಾಪ್ತಿಯ ಹಂದಿಗನೂರುನ ವಾಸಿ ನಾಗರತ್ನ ಹಾಗೂ ಮಗ ಮನೋಜ್‌ ಹೊಳೆಯನ್ನು ದಾಟುವಾಗ ನೀರಿಗೆ ಸಿಲುಕಿದ್ದು ಗ್ರಾಮಸ್ಥರು ಇವರನ್ನು ರಕ್ಷಣೆ ಮಾಡಿದ ಘಟನೆ ಭಾನುವಾರ ನಡೆದಿದೆ.

ತಮ್ಮ ಮನೆಯ ಎತ್ತುಗಳನ್ನು ಮೇಯಿಸಲು ಹೋಗಿದ್ದು ಮಧ್ಯಾಹ್ನ ಎತ್ತುಗಳೊಂದಿಗೆ ಹೊಳೆ ದಾಟಿ ಮನೆಗೆ ತೆರಳುವಾಗ ಅಡೂರು ಮತ್ತು ಬಳ್ಳಿಬೈಲು ಗ್ರಾಮದಲ್ಲಿ ಸುರಿದ ಭಾರೀ ಮಳೆಯಿಂದ ಹೊಳೆಯಲ್ಲಿ ಒಂದೇ ಸಾರಿ ಭಾರೀ ಪ್ರಮಾಣದ ನೀರು ಹರಿದು ಬಂದಿದೆ. ತಾಯಿ- ಮಗ ಎತ್ತುಗಳನ್ನು ಹೊಳೆ ದಾಟಿಸುತಿದ್ದಂತೆ ಅಪಾರ ನೀರು ಬಂದಿದ್ದು ದಾಟಲಾಗದೆ ಹೊಳೆಯ ಪಕ್ಕದಲ್ಲಿರುವ ಮರದಲ್ಲಿ ಆಶ್ರಯ ಪಡೆದು ತಾಯಿ-ಮಗ ರಕ್ಷಣೆಗಾಗಿ ಕೂಗಿಕೊಂಡಿದ್ದಾರೆ. ಇದನ್ನು ಕೇಳಿದ ಸ್ಥಳೀಯ ಗ್ರಾಮಸ್ಥರು ಹೊಳೆಯ ಬಳಿ ಧಾವಿಸಿದ್ದಾರೆ.

ಇವರಲ್ಲಿ ಈಶ್ವರ ಹೊಳೆಕೋಪ್ಪ ಎಂಬುವರು ಹೊಳೆ ದಾಟಿ ತಾಯಿ-ಮಗನನ್ನು ಪ್ರಾಣಾಪಾಯದಿಂದ ಪಾರು ಮಾಡಿದ್ದಾರೆ. ಸ್ಥಳೀಯರಾದ ದೇವರಾಜ್‌ ವರದಾಮೂಲ ಹಾಗೂ ಅನೇಕರು ಜೊತೆಗಿದ್ದರು.