ಮಧ್ಯರಾತ್ರಿ ನಡುರಸ್ತೆಯಲ್ಲಿ ಅನುಮಾನಸ್ಪದ ಬ್ಯಾಗ್ ಪತ್ತೆ, ಬಾಂಬ್ ನಿಷ್ಕ್ರಿಯ ದಳದಿಂದ ತಪಾಸಣೆ

ಬೆಳಗಾವಿ: ಇಲ್ಲಿಯ ಉದ್ಯಮಬಾಗ್ ರಸ್ತೆಯಲ್ಲಿ ನಡು ರಾತ್ರಿಯಲ್ಲಿ ಸಿಕ್ಕ ಅನುಮಾನಸ್ಪದ ಬ್ಯಾಗ್ ಆತಂಕ ಸೃಷ್ಟಿಸಿದ್ದು, ಬಾಂಬ್ ನಿಷ್ಕ್ರಿಯ ದಳದಿಂದ ಬ್ಯಾಗ್ ಪರಿಶೀಲಿಸಲಾಯಿತು.

ಉದ್ಯಮ ಬಾಗ್ ನ ಉತ್ಸವ ಹೊಟೇಲ್ ಬಳಿಯ ಪುರೋಹಿತ್ ಸ್ವೀಟ್ ಮಾರ್ಟ್ ಎದುರು ಯಾರೋ ಬ್ಯಾಗ್ ಬಿಟ್ಟು ಹೋಗಿದ್ದರು. ನೀಲಿ ಬಣ್ಣದ ಈ ಬ್ಯಾಗ್ ಆತಂಕ ಸೃಷ್ಟಿ ಆಗಿತ್ತು. ಮಧ್ಯಾಹ್ನದಿಂದ ಅಲ್ಲಿಯೇ ಈ ಬ್ಯಾಗ್ ಬಿದ್ದಿತ್ತು.

ಸೋಮವಾರ ರಾತ್ರಿ 12 ಗಂಟೆ ಸುಮಾರಿಗೆ ಪೊಲೀಸರಿಗೆ ವ್ಯಕ್ತಿಯೊಬ್ಬರು ಮಾಹಿತಿ ನೀಡಿದ್ದಾರೆ. ಕೂಡಲೇ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು.‌ ಬಾಂಬ್ ನಿಷ್ಕ್ರಿಯ ದಳ ಸಿಬ್ಬಂದಿ ಬಂದು ಬ್ಯಾಗ್ ಪರಿಶೀಲಿಸಿದಾಗ, ಅದರಲ್ಲಿ ಬಟ್ಟೆ-ಬರೆ, ಔಷಧ, ಇತರೆ ವಸ್ತುಗಳು ಇರುವುದು ಪತ್ತೆಯಾಗಿದೆ.‌ ಅದರಲ್ಲಿ ಯಾವುದೇ ಸ್ಫೋಟಕ ಕಂಡು ಬರಲಿಲ್ಲ. ಹೀಗಾಗಿ ಜನರು ನಿಟ್ಟುಸಿರು ಬಿಡುವಂತಾಗಿದೆ.

ಉದ್ಯಮಬಾಗ್ ಸಿಪಿಐ ದಯಾನಂದ ನೇತೃತ್ವದಲ್ಲಿ ಮಧ್ಯರಾತ್ರಿ ಬ್ಯಾಗ್ ತೆರವುಗೊಳಿಸುವ ಕಾರ್ಯಾಚರಣೆ ಕೈಗೊಳ್ಳಲಾಗಿತ್ತು. ಬ್ಯಾಗ್ ಯಾರದ್ದು ಎಂಬುದನ್ನು ಶೋಧ ನಡೆಸಿದ್ದಾರೆ.