ಹೈದರಾಬಾದ್: ಅಲ್ಲು ಅರ್ಜುನ್‌ ವೃತ್ತಿ ಬದುಕಿನಲ್ಲಿ ದೊಡ್ಡ ಹಿಟ್‌ ತಂದುಕೊಟ್ಟ ʼಪುಷ್ಪʼ ಸಿನಿಮಾದ ಸೀಕ್ವೆಲ್‌ ಗಾಗಿ ಪ್ಯಾನ್‌ ಇಂಡಿಯಾ ಪ್ರೇಕ್ಷಕರು ಕಾಯುತ್ತಿದ್ದಾರೆ. ಈಗಾಗಲೇ ಸಿನಿಮಾದ ರಿಲೀಸ್ ಡೇಟ್ ಕೂಡ ರಿವೀಲ್‌ ಆಗಿದ್ದು, ಕುತೂಹಲ ಹೆಚ್ಚಾಗಿದೆ.
ರಕ್ತ ಚಂದನವನ್ನು ಸಾಗಿಸುವ ʼಪುಷ್ಪರಾಜ್ʼ ಲುಕ್‌ ನಲ್ಲಿ ಅಲ್ಲು ಅರ್ಜುನ್‌ ಸಖತ್‌ ಆಗಿ ಕಾಣಿಸಿಕೊಂಡಿದ್ದರು. ಸುಕುಮಾರ್‌ ನಿರ್ದೇಶನದ ಸಿನಿಮಾ ಪ್ಯಾನ್‌ ಇಂಡಿಯಾ ಬಾಕ್ಸ್‌ ಆಫೀಸ್‌ ನಲ್ಲಿ ಸದ್ದು ಮಾಡಿತ್ತು. ಸಿನಿಮಾದ ಸೀಕ್ವೆಲ್‌ ಅನೌನ್ಸ್ ಆದ ದಿನದಿಂದಲೇ ಒಂದಲ್ಲ ಒಂದು ಕಾರಣದಿಂದ ಸುದ್ದಿಯಾಗುತ್ತಿದೆ.
ಇದನ್ನೂ ಓದಿ: Viral Photos: ರಸ್ತೆ ಬದಿಯ ಅಂಗಡಿಯಲ್ಲಿ ಪತ್ನಿ ರಾಧಿಕಾಗೆ ಐಸ್ ಕ್ಯಾಂಡಿ ಕೊಡಿಸಿದ ಯಶ್
ʼಪುಷ್ಪ-2ʼ: ದಿ ರೂಲ್‌ʼ ಸಿನಿಮಾದ ಚಿತ್ರೀಕರಣ ಭರದಿಂದ ಸಾಗುತ್ತಿದೆ. ಪೊಲೀಸ್ ಅಧಿಕಾರಿ ಆಗಿ ಕಾಣಿಸಿಕೊಂಡಿರುವ ಫಾಹದ್‌ ಫಾಸಿಲ್‌ ಹಾಗೂ ʼಪುಷ್ಪರಾಜ್ʼ ಆಗಿರುವ ಅಲ್ಲು ಅರ್ಜುನ್‌ ಅವರ ಪಾತ್ರದ ಮುಖಾಮುಖಿಯೇ ಸೀಕ್ವೆಲ್‌ ನಲ್ಲಿ ಸದ್ದು ಮಾಡಲಿದೆ. ಇತ್ತೀಚೆಗೆ ಟಾಲಿವುಡ್‌ ವಲಯದಲ್ಲಿ ʼಪುಷ್ಪ-2ʼ ಬಳಿಕ ಮೂರನೇ ಪಾರ್ಟ್‌ ಕೂಡ ಬರಲಿದೆ ಎನ್ನುವ ಮಾತೊಂದು ಹರಿದಾಡಿತ್ತು. ಈ ಬಗ್ಗೆ ಚಿತ್ರತಂಡ ಎಲ್ಲೂ ಕೂಡ ಬಹಿರಂಗವಾಗಿ ಹೇಳಿಲ್ಲ. ಇದೀಗ ಅಲ್ಲು ಅರ್ಜುನ್‌ ಅವರು ಈ ಬಗ್ಗೆ ಮಾತನಾಡಿದ್ದಾರೆ.
“ನೀವು ಖಂಡಿತವಾಗಿಯೂ ಮೂರನೇ ಭಾಗವನ್ನು ನಿರೀಕ್ಷಿಸಬಹುದು, ನಾವು ಅದನ್ನು ಫ್ರ್ಯಾಂಚೈಸ್ ಮಾಡಲು ಬಯಸುತ್ತೇವೆ. ಇದಕ್ಕಾಗಿ ನಾವು ಅದ್ಭುತ ಐಡಿಯಾಗಳನ್ನು ಹೊಂದಿದ್ದೇವೆ” ಎಂದು ಅಲ್ಲು ಅರ್ಜುನ್‌ ಅವರು ಹೇಳಿರುವುದಾಗಿ ಸಿಯಾಸಾತ್‌.ಕಾಮ್‌ ವರದಿ ತಿಳಿಸಿದೆ.
ʼಪುಷ್ಪ-2ʼ ನಲ್ಲಿ ಅಲ್ಲು ಅರ್ಜುನ್‌ ಜೊತೆ ರಶ್ಮಿಕಾ, ಫಾಹದ್‌ ಫಾಸಿಲ್‌, ಡಾಲಿ ಧನಂಜಯ ಮುಂತಾದವರು ಕಾಣಿಸಿಕೊಳ್ಳಲಿದ್ದಾರೆ. ಇದೇ ವರ್ಷದ ಆಗಸ್ಟ್‌ 15 ರಂದು ರಿಲೀಸ್ ಆಗಲಿದೆ.
