Mexico: ಮೆಕ್ಸಿಕೋದಲ್ಲಿ ಅನ್ಯಗ್ರಹ ಜೀವಿಗಳ ಶವ ಪತ್ತೆ

ಮೆಕ್ಸಿಕೋ ಸಿಟಿ: ಅನ್ಯ ಗ್ರಹದ ಜೀವಿಗಳು (ಏಲಿಯನ್ಸ್‌) ಯಾವತ್ತೂ ಕುತೂಹಲದ ಅಂಶಗಳೇ ಆಗಿರುತ್ತವೆ. ಮೆಕ್ಸಿಕೋ ರಾಜಧಾನಿ ಮೆಕ್ಸಿಕೋ ಸಿಟಿಯಲ್ಲಿರುವ ಆ ದೇಶದ ಸಂಸತ್‌ ಭವನದಲ್ಲಿ ಅಧಿವೇಶನ ನಡೆಯುತ್ತಿರುವ ಸಂದರ್ಭದಲ್ಲಿ ಅನ್ಯಗ್ರಹ ಜೀವಿಗಳು ಎಂದು ಹೇಳಲಾಗುವ ಎರಡರ ಮೃತ ದೇಹಗಳನ್ನು ಪ್ರದರ್ಶಿಸಲಾಗಿದೆ. ಸುಮಾರು 1 ಸಾವಿರ ವರ್ಷಗಳ ಹಿಂದಿನದ್ದು ಎಂದು ಅವುಗಳ ಬಗ್ಗೆ ಅಧ್ಯಯನ ನಡೆಸಿದ ವಿಜ್ಞಾನಿ ಜೇಮಿ ಮೌಸಾನ್‌ ಹೇಳಿದ್ದಾರೆ.

ಮೆಕ್ಸಿಕೋ ವಿವಿಯ ವಿಜ್ಞಾನಿಗಳು 2 ಏಲಿಯನ್‌ಗಳ ಡಿಎನ್‌ಎಯನ್ನು ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ ಎಂದು ಮೌಸಾನ್‌ ಪ್ರತಿಪಾದಿಸಿದ್ದಾರೆ. ಟ್ವಿಟರ್‌ ಮತ್ತು ಇತರ ಜಾಲತಾಣಗಳಲ್ಲಿ ಅವುಗಳ ಫೋಟೋ ಮತ್ತು ವಿಡಿಯೋಗಳು ವೈರಲ್‌ ಆಗಿವೆ. ಇದರ ಜತೆಗೆ ಮೃತದೇಹಗಳ ಎಕ್ಸ್‌ರೇಗಳನ್ನೂ ಪ್ರದರ್ಶಿಸಲಾಗಿದೆ. ಅದರಲ್ಲಿ ಕೆಲವೊಂದು ಮೊಟ್ಟೆಗಳೂ ಇರುವುದು ಕಂಡುಬಂದಿದೆ.