ಭಾರತಕ್ಕೆ ಶುಭ ಹಾರೈಸಿ ಎಡವಟ್ಟು ಮಾಡಿಕೊಂಡ ಅಲಿ!

ಲಂಡನ್‌: ಪಾಕಿಸ್ಥಾನದ ವೇಗಿ ಹಸನ್‌ ಅಲಿ ಭಾರತ ವಿಶ್ವಕಪ್‌ ಗೆಲ್ಲಲಿ ಎಂದು ಶುಭ ಹಾರೈಸಿ ಯಡವಟ್ಟು ಮಾಡಿಕೊಂಡಿದ್ದಾರೆ. ತನ್ನ ಟ್ವೀಟ್‌ಗೆ ಭಾರೀ ವಿರೋಧ ವ್ಯಕ್ತವಾದ ಬೆನ್ನಲ್ಲೇ ಅಲಿ ಅದನ್ನು ಅಳಿಸಿ ಹಾಕಿದ್ದಾರೆ.

ಆದರೆ ಇದರಿಂದ ಪಾಕಿಸ್ಥಾನಿಯರ ಸಿಟ್ಟೇನೂ ತಣಿದಿಲ್ಲ. ಕಳೆದ ರವಿವಾರ ಪಾಕಿಸ್ಥಾನವನ್ನು ಮಣಿಸಿದ ಕೊಹ್ಲಿ ತಂಡಕ್ಕೆ ಮುಮ್ತಾಜ್‌ ಖಾನ್‌ ಎಂಬ ಅಭಿಮಾನಿಯೊಬ್ಬರು, “ಅಭೂತಪೂರ್ವ ಗೆಲುವಿಗೆ ಮತ್ತು ಭಾರತೀಯರೆಂದು ಹೆಮ್ಮೆಪಡಲು ನಮಗೊಂದು ಅವಕಾಶ ಕೊಟ್ಟಿರುವುದಕ್ಕೆ ಶುಭಾಶಯಗಳು. ವಿಶ್ವಕಪ್‌ ಗೆದ್ದು ಬನ್ನಿ…’ ಎಂದು ಟ್ವೀಟ್‌ ಮಾಡಿದ್ದರು. ಆಕೆಯ ಟ್ವೀಟ್‌ಗೆ ಉತ್ತರಿಸಿದ ಹಸನ್‌ ಅಲಿ “ಹೋಗಿ ಆಪ್‌ ಕಿ ದುವಾ ಪೂರಿ, ಕಂಗ್ರಾಚುಲೇಶನ್ಸ್‌’ (ನಿಮ್ಮ ಹಾರೈಕೆ ಈಡೇರಲಿ, ಶುಭಾಶಯಗಳು) ಎಂದು ಮರು ಟ್ವೀಟ್‌ ಮಾಡಿದ್ದರು. ಈ ಟ್ವೀಟ್‌ ಪಾಕಿಗಳನ್ನು ಕೆರಳಿಸಿದೆ.

ಈಗಾಗಲೇ ಹಸನ್‌ ಅಲಿ ಭಾರತದೆದುರು 9 ಓವರ್‌ಗಳಲ್ಲಿ 84 ರನ್‌ ನೀಡಿ ವಿಶ್ವಕಪ್‌ ಇತಿಹಾಸದ ಅತ್ಯಂತ ದುಬಾರಿ ಪಾಕ್‌ ಬೌಲರ್‌ ಎನಿಸಿದ್ದಾರೆ. ಇದರ ಮೇಲೆ ಅವರ ಟ್ವೀಟ್‌ ಪಾಕಿಗಳ ಗಾಯದ ಮೇಲೆ ಉಪ್ಪು ಸವರಿದಂತಾಗಿದೆ!