ಸೆಮಿ ಫೈನಲ್ ನಲ್ಲಿ ತಪ್ಪಿತು ಭಾರಿ ದುರಂತ: ಕ್ಯಾರಿ ಮುಖಕ್ಕೆ ಬಡಿದ ಆರ್ಚರ್ ಎಸೆತ

ಬರ್ಮಿಗಂ: ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ನಡುವಿನ ದ್ವಿತೀಯ ಸೆಮಿ ಫೈನಲ್ ಪಂದ್ಯದಲ್ಲಿ ಭಾರಿ ದುರಂತವೊಂದು ತಪ್ಪಿದೆ. ಪಂದ್ಯದ ವೇಳೆ ಇಂಗ್ಲೆಂಡ್ ನ ವೇಗಿ ಜೋಫ್ರಾ ಆರ್ಚರ್ ಎಸೆದ ಮಾರಕ ಎಸೆತವೊಂದು ಆಸೀಸ್ ಆಟಗಾರ ಅಲೆಕ್ಸ್ ಕ್ಯಾರಿ ಮುಖಕ್ಕೆ ಬಡಿದ ಘಟನೆಗೆ ಬರ್ಮಿಗಂ ಮೈದಾನ  ಸಾಕ್ಷಿಯಾಯಿತು.

ವಿಶ್ವಕಪ್ ನ ದ್ವಿತೀಯ ಉಪಾಂತ್ಯ ಪಂದ್ಯದಲ್ಲಿ ಆಸೀಸ್ ವಿಕೆಟ್ ಕೀಪರ್ ಬ್ಯಾಟ್ಸಮನ್ ಅಲೆಕ್ಸ್ ಕ್ಯಾರಿ ಬ್ಯಾಟಿಂಗ್ ನಡೆಸುತ್ತಿದ್ದರು. ಪಂದ್ಯದ ಎಂಟನೇ ಓವರ್, ಆರ್ಚರ್ ಎಸೆದ ಕೊನೆಯ ಎಸೆತ 139 ಕಿ.ಮೀ ವೇಗದಲ್ಲಿ ಬಂದಿತ್ತು. ಮುಖಕ್ಕೆ ನೇರವಾಗಿ ಬಂದ ಬೌನ್ಸರ್ ಅನ್ನು ತಡೆಯಲು ಹೋದ ಕ್ಯಾರಿಗೆ ಅದು ಸಾಧ್ಯವಾಗಿಲ್ಲ. ಚೆಂಡು ನೇರವಾಗಿ ಕ್ಯಾರಿ ಗಲ್ಲಕ್ಕೆ ಬಡಿದು ಹೆಲ್ಮೆಟ್ ಅನ್ನು ಹಾರಿಸಿ ಮುಂದೆ ಹೋಯಿತು. ಗಲ್ಲದಿಂದ ಒಸರಿದ ರಕ್ತ ಮೈದಾನಕ್ಕೆ ಹರಿದಿತ್ತು.

ಕೂಡಲೇ ವೈದ್ಯರು ಮೈದಾನಕ್ಕೆ ಆಗಮಿಸಿ ಕ್ಯಾರಿ ಮುಖಕ್ಕೆ ಬ್ಯಾಂಡೇಜ್ ಸುತ್ತಿದರು. ಇಷ್ಟು ಗಾಯವಾದರೂ ಕ್ಯಾರಿ ಮೈದಾನ ಬಿಟ್ಟು ಕದಲಲಿಲ್ಲ. ಮತ್ತೆ ಬ್ಯಾಟಿಂಗ್ ಮುಂದುವರಿಸಿದರು. ಗಾಯವಾದಾಗ ಕೇವಲ 4 ರನ್ ಗಳಿಸಿದ್ದ ಕ್ಯಾರಿ 47 ರನ್ ಗಳಿಸಿ ಔಟಾದರು. ಕ್ಯಾರಿ ಕ್ರೀಡಾ ಸ್ಪೂರ್ತಿಗೆ ವಿಶ್ವದಾದ್ಯಂತ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ.

ಅಲೆಕ್ಸ್ ಕ್ಯಾರಿ ಮುಖಕ್ಕೆ ಚೆಂಡು ಬಡಿದಾಗ ಎಲ್ಲರಿಗೂ ಒಮ್ಮೆ ಫಿಲಿಪ್ಸ್ ಹ್ಯೂಸ್ ಪ್ರಕರಣ ನೆನಪು ಬಂದಿತ್ತು. ಆದರೆ ಅದೃಷ್ಟಶವಾತ್ ಹೆಚ್ಚಿನ ಗಾಯವಾಗದೆ ಕ್ಯಾರಿ ಮತ್ತೆ ಆಡಲಿಳಿದಾಗ ಕ್ರಿಕೆಟ್ ಜಗತ್ತು ನಿರಾಳವಾಯಿತು.