ಸುನಿ ನಿರ್ದೇಶನದ “ಬಜಾರ್‌’ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಯಾದ ಧನ್ವೀರ್‌, ಹೊಸ ಚಿತ್ರ ಮಾಡುತ್ತಿರುವುದಾಗಿ ಈ ಹಿಂದೆ ಘೋಷಣೆ ಮಾಡಿದ್ದು ಗೊತ್ತೇ ಇದೆ. ಆ ಚಿತ್ರವನ್ನು “ಭರಾಟೆ’ ನಿರ್ಮಾಪಕ ಸುಪ್ರೀತ್‌ ಅವರು ನಿರ್ಮಾಣ ಮಾಡುತ್ತಾರೆ ಅನ್ನೋದು ಗೊತ್ತಿತ್ತು.
ಇತ್ತೀಚೆಗಷ್ಟೇ ಆ ಚಿತ್ರಕ್ಕೆ “ಬಂಪರ್‌’ ಎಂಬ ಶೀರ್ಷಿಕೆ ಅಂತಿಮವಾಗಿತ್ತು. ಆದರೆ, ಆ ಚಿತ್ರಕ್ಕೆ ನಿರ್ದೇಶಕ ಯಾರು ಅನ್ನೋದು ಸಸ್ಪೆನ್ಸ್‌ ಆಗಿತ್ತು. ಈಗ ಧನ್ವೀರ್‌ ಅಭಿನಯದ “ಬಂಪರ್‌’ ಚಿತ್ರಕ್ಕೆ “ಅಲೆಮಾರಿ’ ಸಂತು ನಿರ್ದೇಶಕರು ಎಂಬುದು ಪಕ್ಕಾ ಆಗಿದೆ.
ಹೌದು, ಸಂತು ಸದ್ಯಕ್ಕೆ ಐತಿಹಾಸಿಕ ಚಿತ್ರ “ಬಿಚ್ಚುಗತ್ತಿ’ ಚಿತ್ರವನ್ನು ನಿರ್ದೇಶಿಸಿದ್ದು, ಆ ಚಿತ್ರ ಇನ್ನೇನು ಬಿಡುಗಡೆಯ ತಯಾರಿಯಲ್ಲಿದೆ. ಈ ಹಿಂದೆ ನಿರ್ದೇಶಿಸಿದ್ದ “ಕಾಲೇಜ್‌ ಕುಮಾರ್‌’ ಚಿತ್ರ ಕೂಡ ತೆಲುಗಿನಲ್ಲಿ ರಿಮೇಕ್‌ ಆಗುತ್ತಿದ್ದು, ಆ ಚಿತ್ರಕ್ಕೂ ಸಂತು ನಿರ್ದೇಶನ ಮಾಡಿದ್ದರು. ಈಗ ಆ ಚಿತ್ರ ಕೂಡ ಕಂಪ್ಲೀಟ್‌ ಆಗಿದ್ದು, ಸಂತು “ಬಂಪರ್‌’ ಚಿತ್ರಕ್ಕೆ ಆ್ಯಕ್ಷನ್‌ -ಕಟ್‌ ಹೇಳುತ್ತಿದ್ದಾರೆ. ಸದ್ಯಕ್ಕೆ ಚಿತ್ರದ ನಾಯಕಿಯ ಆಯ್ಕೆ ಇನ್ನೂ ನಡೆದಿಲ್ಲ.
ಸೆಪ್ಟೆಂಬರ್‌ 8 ರಂದು ಧನ್ವೀರ್‌ ಅವರ ಹುಟ್ಟುಹಬ್ಬ. ಅಂದು ಅಧಿಕೃತವಾಗಿ “ಬಂಪರ್‌’ ಚಿತ್ರದ ನಿರ್ದೇಶಕ ಸಂತು ಎಂಬುದನ್ನು ನಿರ್ಮಾಪಕರು ಅನೌನ್ಸ್‌ ಮಾಡಲಿದ್ದಾರೆ. ಅಂದಹಾಗೆ, “ಬಂಪರ್‌’ ಚಿತ್ರಕ್ಕೆ “ಬಹದ್ದೂರ್‌’ ಚೇತನ್‌ ಕುಮಾರ್‌ ಅವರು ಕಥೆ, ಚಿತ್ರಕಥೆ, ಸಂಭಾಷಣೆ ಹಾಗು
ಸಾಹಿತ್ಯದ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ.
“ಬಜಾರ್‌’ ಚಿತ್ರದ ಚಿತ್ರೀಕರಣ ಸಮಯದಲ್ಲೇ, ಧನ್ವೀರ್‌ ಅವರು, ಚೇತನ್‌ ಬಳಿ ಬಂದು ಒಳ್ಳೆಯ ಕಥೆ ಇದ್ದರೆ ಹೇಳಿ, ಸಿನಿಮಾ ಮಾಡೋಣ ಅಂತ ಹೇಳಿದ್ದರಂತೆ. ಆಗ, ಚೇತನ್‌, “ಬಂಪರ್‌’ ಕಥೆ ಹೇಳಿದ್ದರಿಂದ ಅದು ಇಷ್ಟವಾಗಿ, ಕಥೆ, ಚಿತ್ರಕಥೆ, ಸಂಭಾಷಣೆ ಮತ್ತು ಸಾಹಿತ್ಯ ಬರೆದುಕೊಡಿ ಎಂಬ
ಮನವಿಗೆ ಚೇತನ್‌ ಕತೆ, ಚಿತ್ರಕಥೆ, ಸಂಭಾಷಣೆ ಬರೆದುಕೊಡುತ್ತಿದ್ದಾರೆ. ಸದ್ಯಕ್ಕೆ “ಬಂಪರ್‌’ ಸಿನಿಮಾದ ಮಾಹಿತಿ ಇದು. ಮಿಕ್ಕಿದ್ದು, ಸಿನಿಮಾ ಶುರವಿನ ವೇಳೆ ತಿಳಿಯಲಿದೆ.
