ನಾನು ನಿಜಕ್ಕೂ ಅದೃಷ್ಟವಂತೆ,ಈ ಬಾರಿ ಹ್ಯಾಟ್ರಿಕ್‌ ತಪ್ಪಲಿಲ್ಲ: ಅಲಾನಾ ಕಿಂಗ್‌

ಮ್ಯಾಂಚೆಸ್ಟರ್‌: “ನಾನು ನಿಜಕ್ಕೂ ಅದೃಷ್ಟವಂತೆ. ಈ ಬಾರಿ ಹ್ಯಾಟ್ರಿಕ್‌ ಅವಕಾಶ ತಪ್ಪಲಿಲ್ಲ..’ ಎಂದು ವಿಪರೀತ ಖುಷಿಯಿಂದ ಪ್ರತಿಕ್ರಿಯಿಸಿದವರು ಆಸ್ಟ್ರೇಲಿಯದ ಲೆಗ್‌ಸ್ಪಿನ್ನರ್‌ ಅಲಾನಾ ಕಿಂಗ್‌. ಅವರು “ದಿ ಹಂಡ್ರೆಡ್‌’ ವನಿತಾ ಕ್ರಿಕೆಟ್‌ನಲ್ಲಿ ಹ್ಯಾಟ್ರಿಕ್‌ ಸಾಧಿಸಿದ ಮೊದಲ ಬೌಲರ್‌ ಎಂಬ ಹಿರಿಮೆಗೆ ಪಾತ್ರರಾಗಿದ್ದಾರೆ.

ಟ್ರೆಂಟ್‌ ರಾಕೆಟ್ಸ್‌ ತಂಡವನ್ನು ಪ್ರತಿನಿಧಿಸುತ್ತಿರುವ ಅಲಾನಾ ಕಿಂಗ್‌ ಮ್ಯಾಂಚೆಸ್ಟರ್‌ ಒರಿಜಿನಲ್ಸ್‌ ತಂಡದ ವಿರುದ್ಧ ಸತತ 3 ಎಸೆತಗಳಲ್ಲಿ 3 ವಿಕೆಟ್‌ ಉರುಳಿಸಿ ಹ್ಯಾಟ್ರಿಕ್‌ ಸಾಧನೆಗೈದರು. ಕಾಡೇìಲಿಯಾ ಗ್ರಿಫಿತ್‌, ಸೋಫಿ ಎಕ್‌ಸ್ಟೋನ್‌ ಮತ್ತು ಕೇಟ್‌ ಕ್ರಾಸ್‌ ಅವರನ್ನು ಅಲಾನಾ ಕಿಂಗ್‌ ಸತತ ಎಸೆತಗಳಲ್ಲಿ ಕೆಡವಿ ತಂಡದ 43 ರನ್‌ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ತಮ್ಮ ಈ ಸಾಧನೆಯನ್ನು ಅವರು ಆಸ್ಟ್ರೇಲಿಯದ ಸ್ಪಿನ್‌ ಗ್ರೇಟ್‌ ಶೇನ್‌ ವಾರ್ನ್ಗೆ ಅರ್ಪಿಸಿದರು.

ಇದಕ್ಕೂ ಮೊದಲು ಕಾಮನ್ವೆಲ್ತ್‌ ಗೇಮ್ಸ್‌ನಲ್ಲಿ ಬಾರ್ಬಡಾಸ್‌ ವಿರುದ್ಧ ಹ್ಯಾಟ್ರಿಕ್‌ ಸಾಧಿಸುವ ಉತ್ತಮ ಅವಕಾಶವೊಂದು ಅಲಾನಾ ಕಿಂಗ್‌ ಮುಂದಿತ್ತು. ಶಕಿರಾ ಸೆಲ್ಮನ್‌, ಶಮಿ ಲಿಯಾ ಕಾನೆಲ್‌ ಅವರನ್ನು ಸತತ 2 ಎಸೆತಗಳಲ್ಲಿ ಔಟ್‌ ಮಾಡಿದ್ದರು. ಆದರೆ ಮುಂದಿನ ಎಸೆತದಲ್ಲಿ ಕೈಲಾ ಈಲಿಯಟ್‌ ಅವರ ಕ್ಯಾಚ್‌ ಒಂದನ್ನು ಆಸೀಸ್‌ ನಾಯಕಿ ಮೆಗ್‌ ಲ್ಯಾನಿಂಗ್‌ ನೆಲಕ್ಕೆ ಚೆಲ್ಲಿದ್ದರಿಂದ ಅಲಾನಾಗೆ ಹ್ಯಾಟ್ರಿಕ್‌ ತಪ್ಪಿತ್ತು. ಹೀಗಾಗಿ ಅವರು “ಈ ಬಾರಿ ಹ್ಯಾಟ್ರಿಕ್‌ ತಪ್ಪಲಿಲ್ಲ…’ ಎಂದು ಸಂಭ್ರಮಿಸಿದ್ದು!