“ಅಲೈಕ್ಯಾ’- ಹೀಗೊಂದು ಶೀರ್ಷಿಕೆಯ ಹಾರರ್ ಚಿತ್ರವೊಂದು ಸದ್ದಿಲ್ಲದೇ ತನ್ನ ಚಿತ್ರದ ಚಿತ್ರೀ ಕರಣ ಮುಗಿಸಿ ಬಿಡುಗಡೆ ಸನಿಹಕ್ಕೆ ಬಂದಿದೆ. ಚಿತ್ರಕ್ಕೆ “ಹಿತೇಶ್‌ ಮೂವೀಸ್‌’ ಲಾಂಛನದಲ್ಲಿ ಎಂ. ಭೂಪತಿ ಬಂಡವಾಳ ಹೂಡಿದ್ದಾರೆ. ಈ ಚಿತ್ರಕ್ಕೆ ಸಾತ್ವಿಕ್‌ ಎಂ. ಭೂಪತಿ ಕಥೆ, ಚಿತ್ರಕಥೆ ಹಾಗೂ ಸಂಭಾಷಣೆ ಬರೆದು ನಿರ್ದೇಶನ ಮಾಡಿದ್ದಾರೆ.
ಸ್ನೇಹಿತರ ಬಳಗವೊಂದು ವೀಕೆಂಡ್‌ ಕಳೆಯಲು ಜಾಲಿ ಟ್ರಿಪ್‌ ಹೊರಡುತ್ತಾರೆ. ಅಲ್ಲಿಂದ ಅವರು ಉಳಿಯುವ ಗೆಸ್ಟ್ ಹೌಸ್‌ವೊಂದರಲ್ಲಿ ಅನಿರೀಕ್ಷಿತವಾಗಿ ನಡೆಯುವ ಕೆಲವು ಘಟನೆಗಳಿಗಳಿಂದ ಆ ಅತಿಥಿ ಗೃಹದಲ್ಲಿ ಆತ್ಮಗಳಿರುವುದು ತಿಳಿದು ಬರುತ್ತದೆ. ನಂತರ ಅಲ್ಲಿಂದ ತಪ್ಪಿಸಿ ಕೊಂಡು ಹೊರಹೋಗಲು ಸಾಕಷ್ಟು ಪ್ರಯತ್ನ ನಡೆಸಿ ವಿಫ‌ಲರಾಗುತ್ತಾರೆ.
ಆ ಮನೆಯಲ್ಲಿ ಒಂದು ಅಮೂಲ್ಯವಾದ ವಜ್ರವಿದ್ದು, ಅದಕ್ಕೆ ಈ ಆತ್ಮಗಳೆಲ್ಲ ಕಾವಲಾಗಿರುತ್ತವೆ. ಅದರಲ್ಲಿ ಒಂದು ಅತ್ಮ ಮಾತ್ರ ಇವರನ್ನು ಅಲ್ಲಿಂದ ಹೊರ ಕಳಿಸಲು ನೋಡಿದರೆ, ಮತ್ತೂಂದು ಆತ್ಮ ಅವರನ್ನು ಅಲ್ಲೇ ಇರುವ ಹಾಗೆ ನೋಡಿಕೊಳ್ಳುತ್ತದೆ. ಈ ಆತ್ಮದಿಂದ ಅವರು ಹೇಗೆ ವಜ್ರವನ್ನು ವಶಪಡಿಸಿಕೊಂಡರು ಪಾರಾಗುತ್ತಾರೆ ಎಂಬುದೇ ಕಥೆಯಾಗಿದೆ.
ಬೆಂಗಳೂರು, ಚಿಕ್ಕಮಗಳೂರು, ಮೇಲುಕೋಟೆ, ಸುತ್ತಮುತ್ತ ಚಿತ್ರದ ಚಿತ್ರೀಕರಣ ನಡೆಸಲಾಗಿದೆ. ಕಾಮಿಡಿ, ಲವ್‌, ಹಾರರ್, ಸಸ್ಪೆ®Õ… ಕಥಾಹಂದರ ಹೊಂದಿರುವ ಅಲೈಕ್ಯಾ ಚಿತ್ರಕ್ಕೆ ಸಾಯಿ ಸೋಮೇಶ್‌ ಸಂಗೀತ, ಬುಗುಡೆ ವೀರೇಶ್‌ ಛಾಯಾಗ್ರಹಣ, ಮುತ್ತುರಾಜ್‌ ಸಂಕಲನ, ಹರಿಪ್ರಸಾದ್‌ ಸಾಹಿತ್ಯ ಹಾಗೂ ತೇಜ್‌ ಆರಾಧ್ಯ ನೃತ್ಯ ನಿರ್ದೇಶನವಿದೆ.
ಪಂಚಮಜೀವ, ಸುಪ್ರೀತ್‌ ಶರ್ಮ ಹಾಗೂ ಸುರಭಿ ಭಾರದ್ವಾಜ್‌ ಹಾಡುಗಳಿಗೆ ದನಿಯಾಗಿದ್ದಾರೆ. ದರ್ಶಿನಿ ಆರ್‌. ಒಡೆಯರ್‌, ನಿಸರ್ಗ ಮನ್ವೀರ್‌ ಚವ್ಹಾನ್‌, ವಿವೇಕ ಚಕ್ರವರ್ತಿ, ವಜ್ರ, ಕಾವ್ಯಪ್ರಕಾಶ್‌, ಜಾಹ್ನವಿ, ವಿ, ನಾರಾಯಣ ಸ್ವಾಮಿ ಡಿ.ಎಂ., ಸಾತ್ವಿಕ್‌ ಎಂ.ಭೂಪತಿ, ನಾಗಿ ಸಂತೇಶಿವರ್‌, ಶಿವಕುಮಾರ್‌, ಡಿ.ಕೆ. ಮಂಜು, ಶಿವಮ್ಮ ಮುಂತಾದವರು ನಟಿಸಿದ್ದಾರೆ.
