ಎ.ಜೆ.: ಕರಾವಳಿಯ ಮೊದಲ ಲಿವರ್‌ ಕಸಿ ಶಸ್ತ್ರಚಿಕಿತ್ಸೆ  ಯಶಸ್ವಿ

ಮಂಗಳೂರು: ನಗರದ ಎ.ಜೆ. ಆಸ್ಪತ್ರೆ ಮತ್ತು ಸಂಶೋಧನ ಕೇಂದ್ರದಲ್ಲಿ ಬೆಂಗಳೂರಿನ ಬಿಜಿಎಸ್‌ ಗ್ಲೆನಿಗಲ್ಸ್‌ ಗ್ಲೋಬಲ್‌ ಹಾಸ್ಪಿಟಲ್ಸ್‌ನ ವೈದ್ಯರ ಸಹಭಾಗಿತ್ವದಲ್ಲಿ ಕರಾವಳಿಯಲ್ಲೇ ಮೊದಲ ಲಿವರ್‌ ಕಸಿಯನ್ನು ಯಶಸ್ವಿಯಾಗಿ ನಡೆಸಲಾಗಿದೆ ಎಂದು ಆಸ್ಪತ್ರೆಯ ವೈದ್ಯಕೀಯ ನಿರ್ದೇಶಕ ಡಾ| ಪ್ರಶಾಂತ್‌ ಮಾರ್ಲ ತಿಳಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ ಅವರು, ರೋಗಿಯ ಪಿತ್ಥ ಕೋಶ ಹಾನಿಗೀಡಾಗಿತ್ತು. ಬಿಜಿಎಸ್‌ ಗ್ಲೆನಿಗಲ್ಸ್‌ ಗ್ಲೋಬಲ್‌ ಆಸ್ಪತ್ರೆಯಲ್ಲಿ ದಾಖಲಾದಾಗ ಲಿವರ್‌ ಕಸಿ ಬಗ್ಗೆ ಚಿಂತಿಸಲಾಯಿತು. ರಸ್ತೆ ಅಪಘಾತದಲ್ಲಿ ಮೆದುಳು ನಿಷ್ಕ್ರಿಯಗೊಂಡ ವ್ಯಕ್ತಿಯ ಪಿತ್ಥಕೋಶವನ್ನು ದಾನವಾಗಿ ಪಡೆದು, ಎ.ಜೆ. ಆಸ್ಪತ್ರೆಯಲ್ಲಿ ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆಸಿ ಜೋಡಿಸಲಾಗಿದ್ದು, ರೋಗಿ ಗುಣಮುಖರಾಗಿದ್ದಾರೆ ಎಂದರು. ಬೆಂಗಳೂರಿನ ಬಿಜಿಎಸ್‌ ಗ್ಲೆನಿಗಲ್ಸ್‌ ಗ್ಲೋಬಲ್‌ ಹಾಸ್ಪಿಟಲ್ಸ್‌ನ ಕನ್ಸಲ್ಟೆಂಟ್‌ ಹೆಪಟೋಬಿಲಿಯರಿ ಮತ್ತು ಬಹು ಅಂಗ ಕಸಿ ಶಸ್ತ್ರಚಿಕಿತ್ಸಕರಾದ ಡಾ| ರಾಘವೇಂದ್ರ ಸಿ.ವಿ. ಮತ್ತು ಡಾ| ಸುರೇಶ್‌ ರಾಘವಯ್ಯ, ಡಾ| ದೀಪ್ತಿ ರಾಮಚಂದ್ರ ಹಾಗೂ ಸರ್ಜಿಕಲ್‌ ಗ್ಯಾಸ್ಟ್ರೋ ಎಂಟರಾಲಜಿಸ್ಟ್‌ಗಳಾದ ಡಾ| ರೋಹನ್‌ ಶೆಟ್ಟಿ, ಡಾ| ಅಶ್ವಿ‌ನ್‌ ಆಳ್ವ ಅವರನ್ನು ಒಳಗೊಂಡ ತಂಡ ಯಶಸ್ವಿಯಾಗಿ ಶಸ್ತ್ರಚಿಕಿತ್ಸೆ ನೆರವೇರಿಸಿದೆ ಎಂದು ಅವರು ಹೇಳಿದರು.

ಡಾ| ರಾಘವೇಂದ್ರ ಸಿ.ವಿ. ಮಾತ ನಾಡಿ, ಡಾ| ಅನಿಂದಿತಾ, ಡಾ| ಅರುಣ್‌, ಡಾ| ಗುರುರಾಜ್‌ ತಂತ್ರಿ, ಡಾ| ತ್ರಿವಿಕ್ರಮ ತಂತ್ರಿ ಅವರ ಸಹಕಾರದಿಂದ ಶಸ್ತ್ರಚಿಕಿತ್ಸೆ ಯಶಸ್ವಿಯಾಯಿತು ಎಂದರು. ಡಾ| ಸಂದೀಪ್‌, ಡಾ| ಅನಿಂದಿತಾ ಸುದ್ದಿಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.