ವಯಸ್ಸು 78 ಉತ್ಸಾಹ 28

78 ವರ್ಷದ ಉಷಾ ಸೋಮನ್‌ ಮ್ಯಾರಥಾನ್‌ ಓಟಕ್ಕೆ ಬಂದರು; ಅದೂ ಬರಿಗಾಲಿನಲ್ಲಿ!

ನಟ, ಮಾಡೆಲ್‌, ಮಿಲಿಂದ್‌ ಸೋಮನ್‌ನ ಫಿಟ್‌ನೆಸ್‌ ಗೀಳಿನ ಬಗ್ಗೆ ಬಹುತೇಕರಿಗೆ ಗೊತ್ತಿರಬಹುದು. ಭಾರತದಲ್ಲೆಡೆ ನಡೆಯುವ ಕೆಲ ಮ್ಯಾರಾಥಾನ್‌ಗಳಲ್ಲಿ ಈತ ಭಾಗವಹಿಸಿ ಸ್ಪರ್ಧಾಳುಗಳನ್ನು ಹುರಿದುಂಬಿಸುತ್ತಿರುತ್ತಾರೆ. ವಯಸ್ಸು 50 ಆಗಿದ್ದರೂ ಆತ ಮಾತ್ರ ಇಂದಿಗೂ ಫಿಟ್‌ ಅÂಂಡ್‌ ಫೈನ್‌. ಆದರೆ ಈಗ ಸುದ್ದಿಯಲ್ಲಿರುವುದು ಆತ ಅಲ್ಲ. ಆತನ ತಾಯಿ ಉಷಾ ಸೋಮನ್‌. ಇತ್ತೀಚಿಗಷ್ಟೆ ಗ್ರೇಟ್‌ ಇಂಡಿಯಾ ರನ್‌ ಎನ್ನುವ ಮ್ಯಾರಥಾನ್‌ ಸ್ಪರ್ಧೆ ನಡೆದಿತ್ತು.

ಅಹಮದಾಬಾದ್‌ನಿಂದ ಮುಂಬೈವರೆಗಿನ ಮ್ಯಾರಥಾನ್‌ ಅದು. ಮಿಲಿಂದ್‌ ಸೋಮನ್‌ ಅದರಲ್ಲಿ ಪಾಲ್ಗೊಂಡಿದ್ದರು. ವಿಶೇಷವೆಂದರೆ ಒಂದಷ್ಟು ದೂರ ಮಿಲಿಂದ್‌ ಸೋಮನ್‌ ಅವರ ತಾಯಿಯೂ ಮಗನಿಗೆ ಸಾಥ್‌ ನೀಡಿದ್ದು. ಅದೂ ಬರಿಗಾಲಲ್ಲಿ! ಅಂದ ಹಾಗೆ ಉಷಾ ಸೋಮನ್‌ ಅವರ ವಯಸ್ಸು 78. ಅಷ್ಟು ವಯಸ್ಸಾಗಿದ್ದರೂ ಅವರು ತುಂಬ ಸಂಭ್ರಮದಿಂದ ಮಗನೊಂದಿಗೆ ಪಾಲ್ಗೊಂಡಿದ್ದನ್ನು ಕಂಡವರೆಲ್ಲಾ ಮ್ಯಾರಥಾನ್‌ ಅನ್ನುವುದು ಅವರ ಕುಟುಂಬದ ರಕ್ತದಲ್ಲೇ ಇದೆ ಎಂದು ಜನರು ಮಾತಾಡಿಕೊಳ್ಳುತ್ತಿದ್ದಾರೆ. ಈ  ಮ್ಯಾರಾಥಾನ್‌ನಲ್ಲಿ ಮಿಲಿಂದ್‌ ತಾಯಿ ಓಡಿದ್ದು ಸ್ವಲ್ಪ ದೂರವಷ್ಟೇ, ಆದರೆ 2014ರಲ್ಲಿ, 48 ಘಂಟೆಗಳಲ್ಲಿ 100 ಕಿ.ಮೀ ಓಡಿದ್ದು ಅವರ ಸಾಧನೆ. ಅದೇನೇ ಇರಲಿ, ವಯಸ್ಸಾಗುತ್ತಿದ್ದಂತೆಯೇ ಟಿ.ವಿ, ಭಜನೆಗಳಿಗೆ ಸೀಮಿತರಾಗುವ ಹೆಂಗೆಳೆಯರ ನಡುವೆ ಉಷಾ ಸೋಮನ್‌ ವಿಶಿಷ್ಟರಾಗಿ ಕಾಣುತ್ತಾರೆ. 50ರ ನಂತರ ಬದುಕು ಮುಗಿದುಬಿಡುವುದಿಲ್ಲ, ಪ್ರಾರಂಭವಾಗುತ್ತದೆ ಎಂಬ ಮಾತಿಗೆ ಸ್ಫೂರ್ತಿಯಾಗಿದ್ದಾರೆ.