ಮತ್ತೆ ಎಚ್‌1-ಬಿ ಮಸೂದೆ ಮಂಡನೆ

ವಾಷಿಂಗ್ಟನ್‌: ಐಟಿ ಉದ್ಯೋಗಿಗಳಿಗೆ ಭಾರಿ ಹೊಡೆತ ನೀಡುತ್ತದೆಂದು ವಿಶ್ಲೇಷಿಸಲಾಗುತ್ತಿರುವ ಎಚ್‌1-ಬಿ ವೀಸಾ ತಿದ್ದುಪಡಿ ಮಸೂದೆಯನ್ನು ಅಮೆರಿಕ ಹೌಸ್‌ ಆಫ್ ರೆಪ್ರಸೆಂಟೇಟಿವ್ಸ್‌ನಲ್ಲಿ ಇನ್ನೊಮ್ಮೆ ಮಂಡಿಸಲಾಗಿದೆ. ಡೆಮಾಕ್ರಟಿಕ್‌ ಕಾಂಗ್ರೆಸ್‌ ಸಂಸದ ಡೆರೆಕ್‌ ಕಿಲ್ಮರ್‌ ಮತ್ತು ರಿಪಬ್ಲಿಕನ್‌ ಸಹೋದ್ಯೋಗಿ ಡಗ್‌ ಕಾಲ್ಲಿನ್ಸ್‌ ಮಸೂದೆ ಮಂಡನೆ ಮಾಡಿದ್ದು, ಒಂದೊಮ್ಮೆ ಅನುಮೋದನೆ ಪಡೆದುಕೊಂಡಲ್ಲಿ ಭಾರತ ಸೇರಿ ಇನ್ನೂ ಕೆಲ ರಾಷ್ಟ್ರಗಳ ಉದ್ಯೋಗಿಗಳಿಗೆ ಸಂಕಷ್ಟ ಎದುರಾಗಲಿದೆ.

ಹೊರಗುತ್ತಿಗೆ ಉದ್ಯೋಗಿಗಳ ಕಡಿತಕ್ಕೆ ಮುಂದಾಗಿರುವ ಅಮೆರಿಕ ಎಚ್‌1-ಬಿ ವೀಸಾ ದುರುಪಯೋಗ ಆಗದಂತೆ ನೋಡಿಕೊಳ್ಳುವ ನೆಪದಲ್ಲಿ ಅದರ ರದ್ದಿಗೆ ಮುಂದಾಗಿದ್ದು, ಈ ಹಿಂದೆಯೂ ಸಂಸತ್‌ನಲ್ಲಿ ಮಂಡಿಸಿತ್ತು. ಇದೀಗ ಮತ್ತೂಮ್ಮೆ ಹೌಸ್‌ ಆಫ್ ರೆಪ್ರಸೆಂಟೇಟಿವ್ಸ್‌ನಲ್ಲಿ ಮಂಡಿಸಲಾಗಿದೆ. ಅಮೆರಿಕನ್ನರಿಗೆ ಹೆಚ್ಚೆಚ್ಚು ಉದ್ಯೋಗಾವಕಾಶಗಳು ತೆರೆದುಕೊಳ್ಳಬೇಕೆನ್ನುವ ಹಾಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಯೋಜನೆಗಳಲ್ಲಿ ಇದೂ ಒಂದಾಗಿದೆ. ವೀಸಾ ವಿಚಾರದಲ್ಲಿ ಭದ್ರತೆ ದೃಷ್ಟಿಯಿಂದ ಹೆಚ್ಚಿನ ಪರಿಶೀಲನೆ ಅಗತ್ಯವಿದೆ ಎಂದು ಹೇಳಿರುವ ಟ್ರಂಪ್‌ ಅಗತ್ಯ ಪರಿಶೀಲನೆಗೆ ಮಹತ್ವ ನೀಡಿ. ಕಠಿಣ ಕ್ರಮಗಳನ್ನು ಕೈಗೊಳ್ಳಿ ಎಂದು ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

ಟ್ರಂಪ್‌ v/s ಒಬಾಮಾ: ಮಾಜಿ ಅಧ್ಯಕ್ಷ ಬರಾಕ್‌ ಒಬಾಮ ಆರಂಭಿಸಿದ್ದ ಒಬಾಮಾಕೇರ್‌ ಆರೋಗ್ಯ ನೀತಿಯನ್ನು ರದ್ದುಗೊಳಿಸುವ ಹಾಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಸಿದ್ಧತೆಗೆ ಹಿನ್ನಡೆಯಾಗಿದೆ. ಮತದಾನದ ಮೂಲಕ ಈ ನಿರ್ಧಾರಕ್ಕೆ ಬೆಂಬಲ ಪಡೆಯುವ ಟ್ರಂಪ್‌ ಲೆಕ್ಕಾಚಾರ ಬುಡಮೇಲಾಗಿದೆ. ಇಷ್ಟಾದರೂ ಇದಕ್ಕೆ ಪ್ರತಿಕ್ರಿಯಿಸಿರುವ ಟ್ರಂಪ್‌, ಸಾಧ್ಯವಾದಷ್ಟು ಬೇಗ ಪರಿಷ್ಕೃತ ನೀತಿಯನ್ನು ಅಂಗೀಕರಿಸಿ ಎಂದು ಮನವಿ ಮಾಡಿಕೊಂಡಿದ್ದಾರೆ.