ಮುಂಬಯಿ: ಕಿಂಗ್‌ ಖಾನ್‌ ಶಾರುಖ್ ಖಾನ್‌ ಅವರಿಗೆ 2023 ಗೋಲ್ಡನ್‌ ಇಯರ್‌ ಎಂದರೆ ತಪ್ಪಾಗದು. 4 ವರ್ಷದ ಬಳಿಕ ಅವರು ಬಣ್ಣದ ಲೋಕಕ್ಕೆ ಕಂಬ್ಯಾಕ್‌ ಮಾಡಿದ್ದರು. ಅವರು ಆಯ್ದುಕೊಂಡ ಮೂರು ಸಿನಿಮಾಗಳೂ ಬಾಕ್ಸ್‌ ಆಫೀಸ್‌ ನಲ್ಲಿ ದೊಡ್ಡಮಟ್ಟದಲ್ಲಿ ಯಶಸ್ಸು ಕಂಡಿತು.
ಶಾರುಖ್ ಖಾನ್‌ ಅವರಿಗೆ ʼಪಠಾಣ್‌ʼ, ʼಜವಾನ್‌ʼ ಹಾಗೂ ʼಡಂಕಿʼ ಸಿನಿಮಾಗಳು ದೊಡ್ಡ ಹಿಟ್‌ ತಂದುಕೊಟ್ಟಿದೆ. ರಾಜಕುಮಾರ್‌ ಹಿರಾನಿ ಅವರ ʼಡಂಕಿʼ ಬಳಿಕ ಶಾರುಖ್ ಖಾನ್‌ ಯಾವ ಸಿನಿಮಾವನ್ನು ಘೋಷಿಸಿಲ್ಲ. ಅವರ ಮುಂದಿನ ಸಿನಿಮಾದ ಬಗ್ಗೆ ಕುತೂಹಲ ಹೆಚ್ಚಾಗಿದೆ.
ಈ ಬಗ್ಗೆ ಅವರ ಆಪ್ತ ಮೂಲವೊಂದು ʼಹಿಂದೂಸ್ತಾನ್‌ ಟೈಮ್ಸ್‌ʼಗೆ ಮಾಹಿತಿ ಕೊಟ್ಟಿದ್ದು, ಶಾರುಖ್ ತನ್ನ ಕುಟುಂಬದೊಂದಿಗೆ ಹೊಸ ವರ್ಷವನ್ನು ಆಚರಿಸಲು ಲಂಡನ್‌ಗೆ ಹಾರಿದ್ದಾರೆ. ಆ ಬಳಿಕ ಅವರ ಮುಂದಿನ ನಡೆಯನ್ನು ನಿರ್ಧರಿಸಲಿದ್ದಾರೆ ಎಂದು ಹೇಳಿದೆ.
“ಕಳದ ವರ್ಷದ ಬಾಕ್ಸ್‌ ಆಫೀಸ್‌ ಬ್ಯುಸಿನೆಸ್‌ ನಿಂದ ಅವರು ತುಂಬಾ ಖುಷಿಯಾಗಿದ್ದಾರೆ. ಅವರು ತಮ್ಮ ಕುಟುಂಬದೊಂದಿಗೆ ಸ್ವಲ್ಪ ಸಮಯವನ್ನು ಕಳೆಯಲು ಬಯಸಿದ್ದರು. ಹಾಗಾಗಿ, ಹೊಸ ವರ್ಷಾಚರಣೆಗಾಗಿ ಸ್ವಲ್ಪ ವಿರಾಮಕ್ಕಾಗಿ ಲಂಡನ್‌ಗೆ ಹಾರಿದ್ದಾರೆ. ಸಣ್ಣ ಬ್ರೇಕ್‌ ಪಡೆದು ವಾಪಾಸ್‌ ಆದ ಬಳಿಕ ಅವರು ತನ್ನ ಮುಂದಿನ ಸಿನಿಮಾದ ಬಗ್ಗೆ ಯೋಚನೆ ಮಾಡಲಿದ್ದಾರೆ” ಎಂದು ಮೂಲ ಹೇಳಿರುವುದಾಗಿ ವರದಿ ತಿಳಿಸಿದೆ.
ಶಾರುಖ್ ಅವರ ಕೈಯಲ್ಲಿ ಕೆಲ ಸ್ಕ್ರಿಪ್ಟ್‌ ಗಳಿದ್ದು, ಈ ವರ್ಷವೂ ಅವರು ಮೂರು ಸಿನಿಮಾಗಳನ್ನು ಅನೌನ್ಸ್‌ ಮಾಡಲಿದ್ದಾರೆ. 2024 ರ ಮೊದಲ ತಿಂಗಳಿನಲ್ಲೇ ಅವರು ಮೂರು ಸಿನಿಮಾಗಳನ್ನು ಘೋಷಿಸಲಿದ್ದಾರೆ ಎನ್ನಲಾಗಿದೆ.
