8 ವರ್ಷಗಳ ಬಳಿಕ ನಳ್ಳಿ ಸಂಪರ್ಕ ಸಿಕ್ಕರೂ ನೀರಿಲ್ಲ

ಅಜ್ಜಾವರ ಎ. 26: ಭೂಮಿಯ ತಾಪಮಾನ ದಿನೆ ದಿನೇ ಏರುತಿದ್ದು, ತೊಟ್ಟು ನೀರಿಗೂ ಪರಿತಪಿಸುವಂತ ಕಾಲ ಸನ್ನಿಹಿತವಾಗಿದೆ. ಗ್ರಾಮದ ಹೆಚ್ಚಿನ ಭಾಗಗಳಲ್ಲಿ ಬಾವಿಯ ನೀರು ಸಂಪೂರ್ಣ ಖಾಲಿಯಾಗಿ ಬರಡಾಗಿದೆ. ನೀರಿಲ್ಲದೆ ಕಂಗಾಲಗಿದ್ದ ಅಜ್ಜಾವರದ 12 ಕುಟುಂಬಗಳಿಗೆ ಕೊನೆಗೂ ನಳ್ಳಿ ನೀರು ಸಂಪರ್ಕ ದೊರಕಿದೆ.

ಅಜ್ಜಾವರ ಗ್ರಾಮ ವ್ಯಾಪ್ತಿಯ ಪಡ್ಡಂಬೈಲು, ನಾಂಗುಳಿ ಹಾಗೂ ಕರ್ಲಪ್ಪಾಡಿಯ 12 ಮನೆಗಳಿಗೆ ಪಂಚಾಯತ್‌ ವತಿಯಿಂದ ನಳ್ಳಿನೀರು ಸಂಪರ್ಕ ಲಭಿಸಿರಲಿಲ್ಲ. ಈ ಭಾಗದ ಜನರಿಗೆ ಕುಡಿಯಲು ನೀರಿಲ್ಲದೆ ದಿಕ್ಕೇ ದೋಚದಂತಾಗಿತ್ತು. ದಿನನಿತ್ಯದ ಕೆಲಸಗಳಿಗೆ ಅಡ್ಡಿಯಾಗಿ ಪರದಾಡುವ ಸ್ಥಿತಿ ನಿರ್ಮಾಣವಾಗಿತ್ತು.

ಟ್ಯಾಂಕಿದ್ದರೂ ನೀರಿಲ್ಲ

2012-13ರಲ್ಲಿ ಜನರಿಗೆ ನಳ್ಳಿ ನೀರಿನ ಸಂಪರ್ಕ ಒದಗಿಸುವ ಉದ್ದೇಶದಿಂದ ಗ್ರಾ.ಪಂ. ಕಡೆಯಿಂದ ಟ್ಯಾಂಕ್‌ ಒಂದನ್ನು ನಿರ್ಮಿಸಲಾಗಿತ್ತು. ಒಂದೆರಡು ತಿಂಗಳು ನೀರು ಪೂರೈಕೆಯಾಗಿದ್ದರೂ, ವ್ಯವಸ್ಥಿತ ನಿರ್ವಹಣೆಯಿಲ್ಲದೆ ಸ್ಥಗಿತಗೊಂಡಿತ್ತು. ಕಳೆದ ಎಂಟು ವರ್ಷಗಳಿಂದ ಇದೇ ಸ್ಥಿತಿ ಮುಂದುವರೆದಿದ್ದು, ಈ ಭಾಗದ ನಿವಾಸಿಗಳು ತಮ್ಮ ಅಗತ್ಯತೆಗಳಿಗೆ ಪಕ್ಕದ ಮನೆಯವರಿಂದ ನೀರು ಪಡೆಯುತ್ತಿದ್ದರು.