T20 World Cup ಪಪುವಾ ವಿರುದ್ಧ ಗೆಲ್ಲಲು ಅಫ್ಘಾನ್‌ ಪ್ರಯತ್ನ

ಟ್ರಿನಿಡಾಡ್‌: ಇಲ್ಲಿನ ಟರೂಬದಲ್ಲಿರುವ ಬ್ರಿಯಾನ್‌ ಲಾರಾ ಮೈದಾನದಲ್ಲಿ ಶುಕ್ರವಾರ ನಡೆಯುವ ಪಂದ್ಯದಲ್ಲಿ ಕಣಕ್ಕಿಳಿಯಲು ಆಲ್‌ ರೌಂಡ್‌ ಅಫ್ಘಾನಿಸ್ಥಾನ ಮತ್ತು ಅನನುಭವಿ ಪಪುವಾ ನ್ಯೂ ಗಿನಿ ಸಿದ್ಧವಾಗಿದೆ. ಈ ಪಂದ್ಯದಲ್ಲಿ ಗೆದ್ದು ಸೂಪರ್‌-8 ಹಂತಕ್ಕೇರಲು ಅಫ್ಘಾನಿಸ್ಥಾನ ಕಣ್ಣಿಟ್ಟಿದೆ.

ಗ್ರೂಪ್‌ “ಸಿ’ಯಲ್ಲಿ 3ರಲ್ಲಿ ಮೂರೂ ಪಂದ್ಯಗಳನ್ನು ಗೆದ್ದಿರುವ ವೆಸ್ಟ್‌ ಇಂಡೀಸ್‌, 6 ಅಂಕಗಳೊಂದಿಗೆ ಈಗಾಗಲೇ ಸೂಪರ್‌-8ಕ್ಕೇರಿದೆ. ಅಂಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನದಲ್ಲಿರುವ ಅಫ್ಘಾನಿಸ್ಥಾನ, 2ರಲ್ಲಿ 2 ಪಂದ್ಯ ಗೆದ್ದು 4 ಅಂಕ ಕಲೆಹಾಕಿದೆ. ಮುಖ್ಯವಾಗಿ, ಅಫ್ಘನ್‌ ನೆಟ್‌ರನ್‌ರೇಟ್‌ +5.225ರಷ್ಟಿದ್ದು, ಮುಂದಿನ ಹಂತಕ್ಕೇರಲು ಇದು ಹಾದಿ ಸುಗಮವಾಗಿಸಿದೆ. ನ್ಯೂಗಿನಿ ವಿರುದ್ಧ ಗೆದ್ದರೆ, ರಶೀದ್‌ ಖಾನ್‌ ಪಡೆಯ ಸೂಪರ್‌-8 ಪ್ರವೇಶ ಅಧಿಕೃತಗೊಳ್ಳಲಿದೆ.

ಟಿ20 ವಿಶ್ವಕಪ್‌ 2015ರಲ್ಲಿ ಒಮ್ಮೆ ಮಾತ್ರ ಪಪುವಾ ನ್ಯೂ ಗಿನಿ ಮತ್ತು ಆಫ್ಘನ್‌ ತಂಡಗಳು ಮುಖಾಮುಖೀಯಾಗಿದ್ದವು. ಇದರಲ್ಲಿ ಅಫ್ಘಾನಿಸ್ಥಾನ ಗೆದ್ದಿತ್ತು. ಹೀಗಾಗಿ, ಆಲ್‌ರೌಂಡರ್‌ಗಳೇ ಬಲವಾಗಿರುವ ಆಫ್ಘಾನ್‌, ಶುಕ್ರವಾರವೂ ಪ್ರಾಬಲ್ಯ ಮೆರೆಯುವ ನಿರೀಕ್ಷೆಯಿದೆ.