ಅಫ್ಘಾನಿಸ್ಥಾನಕ್ಕೆ ವೈದ್ಯಕೀಯ ಸಾಮಗ್ರಿಗಳನ್ನು ಕಳುಹಿಸಿದ ಭಾರತ

ನವದೆಹಲಿ: ತಾಲಿಬಾನ್ ವಶಪಡಿಸಿಕೊಂಡ ನಂತರ ಅಫ್ಘಾನಿಸ್ಥಾನಕ್ಕೆ ಮಾನವೀಯ ನೆರವಿನ ನೆಲೆಯಲ್ಲಿ ಮೊದಲ ಹಂತದಲ್ಲಿ ಭಾರತವು ಶನಿವಾರ 1.6 ಮೆಟ್ರಿಕ್ ಟನ್ ಜೀವರಕ್ಷಕ ಔಷಧಗಳನ್ನು ಕಳುಹಿಸಿ ಜನರ ಕಷ್ಟಕ್ಕೆ ನೆರವಾಗಿದೆ.

ಶುಕ್ರವಾರ ಕಾಬೂಲ್‌ನಿಂದ 10 ಭಾರತೀಯರು ಮತ್ತು 94 ಆಫ್ಘನ್ನರನ್ನು ದೆಹಲಿಗೆ ಕರೆತಂದಿದ್ದ ವಿಮಾನದಲ್ಲಿ ವೈದ್ಯಕೀಯ ಸಾಮಗ್ರಿಗಳನ್ನು ಕಳುಹಿಸಲಾಗಿದೆ.

ಈ ನೆರವನ್ನು “ಭಾರತದ ಜನರಿಂದ ಉಡುಗೊರೆ” ಎಂದು ವಿವರಿಸಿದ ಆಫ್ಘನ್ ರಾಯಭಾರಿ ಫರೀದ್ ಮಮುಂಡ್‌ಜಾಯ್, ಔಷಧಿಗಳು ಕಾಬೂಲ್‌ಗೆ ಬಂದಿವೆ ಮತ್ತು ಈ “ಕಷ್ಟದ ಸಮಯದಲ್ಲಿ” ಅನೇಕ ಕುಟುಂಬಗಳಿಗೆ ಸಹಾಯ ಮಾಡಲಿವೆ ಎಂದು ಹೇಳಿದರು.

ಕಾಬೂಲ್‌ನಲ್ಲಿರುವ ವಿಶ್ವ ಆರೋಗ್ಯ ಸಂಸ್ಥೆಯ ಪ್ರತಿನಿಧಿಗಳಿಗೆ ಸರಕುಗಳನ್ನು ಹಸ್ತಾಂತರಿಸಲಾಗುವುದು. ಅಫ್ಘಾನಿಸ್ಥಾನದಲ್ಲಿನ ಸವಾಲಿನ ಮಾನವೀಯ ಪರಿಸ್ಥಿತಿಯ ದೃಷ್ಟಿಯಿಂದ, ಭಾರತ ಸರಕಾರ ಹಿಂದಿರುಗುವ ವಿಮಾನದಲ್ಲಿ ವೈದ್ಯಕೀಯ ಸಾಮಗ್ರಿಗಳನ್ನು ಒಳಗೊಂಡಿರುವ ಮಾನವೀಯ ನೆರವನ್ನು ರವಾನಿಸಿದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ತಿಳಿಸಿದೆ.