ನಗು ಹಂಚಿದ ಚಿತ್ರ ಸಾಹಿತಿ ವೊರಾ ನೆನಪಿನಂಗಳಕ್ಕೆ

ಮುಂಬೈ: ಸಿನಿಮಾ ಅಭಿಮಾನಿಗಳನ್ನು ನಕ್ಕು ನಗಿಸಿದ “ಗೋಲ್‌ಮಾಲ್‌’, “ಹೇರಾ ಫೇರಿ’, “ಫಿರ್‌ ಹೇರಾಫೇರಿ’ ಮುಂತಾದ ಅನೇಕ ಹಾಸ್ಯ ಪ್ರಧಾನ ಚಿತ್ರಗಳಲ್ಲದೆ, ರಾಮ್‌ ಗೋಪಾಲ್‌ ವರ್ಮಾ ನಿರ್ದೇಶನದ “ರಂಗೀಲಾ’, “ಸತ್ಯ’, “ದೌಡ್‌’ ಸೇರಿದಂತೆ ಅನೇಕ ಚಿತ್ರಗಳಿಗೆ ಚಿತ್ರಕತೆ ಬರೆದಿದ್ದ ನೀರಜ್‌ ವೊರಾ (54) ಗುರುವಾರ ಮುಂಬೈನಲ್ಲಿ ನಿಧನರಾಗಿದ್ದಾರೆ. ನಟರಾ ಗಿಯೂ ಅವರು ಹಲವಾರು ಸಿನಿಮಾ ಗಳಲ್ಲಿ ನಟಿಸಿದ್ದಾರೆ ಗಮನ ಸೆಳೆದಿದ್ದರು. 

ವರ್ಷದ ಹಿಂದೆ ಹೃದಯಾಘಾತಕ್ಕೆ ಒಳಗಾಗಿದ್ದ ವೊರಾ, ಆಗಿನಿಂದಲೂ ಕೋಮಾದಲ್ಲೇ ಇದ್ದರು. ಅವರನ್ನು ನಿರ್ಮಾಪಕ ಫಿರೋಜ್‌ ನಾಡಿಯಾಡ್‌ವಾಲಾ ತಮ್ಮ ಮನೆಯಲ್ಲಿ ಆಶ್ರಯ ನೀಡಿ ಶುಶ್ರೂಷೆಗೆ ಅವಕಾಶ ಕಲ್ಪಿಸಿದ್ದರು. ಫಿರೋಜ್‌ ಮನೆಯ ಕೊಠಡಿಯೊಂದನ್ನು ಐಸಿಯು ಆಗಿ ಪರಿವರ್ತಿಸಿ ಅಲ್ಲಿ ಅವರಿಗೆ ಚಿಕಿತ್ಸೆ ನೀಡಲಾಗುತ್ತಿತ್ತು. ಆದರೆ, ಗುರುವಾರ ಮಧ್ಯಾಹ್ನ 3 ಗಂಟೆ ಸುಮಾರಿಗೆ ವೊರಾ ಇಹಲೋಕ ತ್ಯಜಿಸಿದರು.  ಮೂಲತಃ ವೋರಾ ಅವರು ರಂಗಭೂಮಿ ಹಿನ್ನೆಲೆಯವರು.