ಪೊಲೀಸರನ್ನು ತಳ್ಳಿ ಕೋರ್ಟ್ ನ ಮೂರನೇ ಮಹಡಿಯಿಂದ ಹಾರಿ ಆತ್ಮಹತ್ಯೆಗೆ ಯತ್ನಿಸಿದ ಕೊಲೆ ಆರೋಪಿ

ಬೆಂಗಳೂರು: ತನ್ನದೇ ಮಕ್ಕಳನ್ನು ಕೊಲೆಗೈದ ಆರೋಪಿಯೋರ್ವ ಕೋರ್ಟ್ ವಿಚಾರಣೆಗೆ ಬರುವ ವೇಳೆ ಪೊಲೀಸರನ್ನು ತಳ್ಳಿ ಮೂರನೇ ಮಹಡಿಯಿಂದ ಹಾರಿ ಆತ್ಮಹತ್ಯೆಗೆ ಯತ್ನಿಸಿರುವ ಘಟನೆ ಸಿಟಿ ಸಿವಿಲ್ ಕೋರ್ಟ್ ನಲ್ಲಿ ನಡೆದಿದೆ.

ಜತೀನ್ ಎಂಬಾತ ಕಟ್ಟಡದಿಂದ ಕೆಳ ಬಿದ್ದಿರುವ ಆರೋಪಿಯಾಗಿದ್ದಾನೆ.

ಘಟನೆಯ ಹಿನ್ನೆಲೆ: 2020 ರ ಮಾರ್ಚ್ 21 ರಂದು ಜತೀನ್ ತನ್ನದೇ ಹೆಣ್ಣುಮಕ್ಕಳಾದ ತೌಶಿಣಿ (3) ಶಾಸ್ತ (1.5) ರನ್ನು ಕೊಲೆ ಮಾಡಿದ್ದ. ಈ ಸಂಬಂಧ ಹುಳಿಮಾವು ಪೊಲೀಸ್ ಠಾಣೆಯಲ್ಲಿ ಕೊಲೆ ಪ್ರಕರಣ ದಾಖಲಾಗಿತ್ತು. ಆ ಬಳಿಕ ಜತೀನ್ ನನ್ನು ಬಂಧಿಸಲಾಗಿತ್ತು.

ಜೈಲಿನಲ್ಲಿ ಇದ್ದ ಆರೋಪಿ ಜತೀನ್, ಅಲ್ಲಿಂದಲ್ಲೇ ಪತ್ನಿಗೆ ಕರೆ ಮಾಡಿ ಆಗಾಗ ಕೊಲೆ ಬೆದರಿಕೆ ಹಾಕುತ್ತಿದ್ದ. ಪತ್ನಿ ಪತಿ ವಿರುದ್ಧ ಈ ಬಗ್ಗೆ ದೂರು ದಾಖಲಿಸಿ, ಗಂಡನಿಗೆ ಮೊಬೈಲ್ ಕೊಡಬೇಡಿ ಎಂದಿದ್ದರು.

ವಿಚಾರಣಾಧೀನ ಕೈದಿಯಾಗಿರುವ ಜತೀನ್ ನನ್ನು ವಿಚಾರಣೆಗೆಂದು ಇಂದು ಪೊಲೀಸರು ಕೋರ್ಟಿಗೆ ಕರೆತಂದಿದ್ದರು. ಈ ವೇಳೆ ಪೊಲೀಸರನ್ನು ತಳ್ಳಿ ಆರೋಪಿ ಜತೀನ್ ಮೂರನೇ ಮಹಡಿಗೆ ಹತ್ತಿ,ಅಲ್ಲಿಂದ ಹಾರಿದ್ದಾನೆ. ಸದ್ಯ ಜತೀನ್ ಸ್ಥಿತಿ ಗಂಬೀರವಾಗಿದೆ ಎಂದು ತಿಳಿದು ಬಂದಿದೆ.