ಆಂಧ್ರಪ್ರದೇಶದಲ್ಲಿ ಅಪಘಾತ: ತೀರ್ಥಹಳ್ಳಿ ಮೂಲದ ಇಬ್ಬರ ಸಾವು

ಶಿವಮೊಗ್ಗ: ಆಂಧ್ರ ಪ್ರದೇಶದ ಕರ್ನೂಲ್‌ ಸಮೀಪದ ಶನಿವಾರ ಮಧ್ಯಾಹ್ನ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ಭದ್ರಾವತಿ ತಾಲೂಕು ಹೊಳೆಹೊನ್ನೂರು ಹಾಗೂ ತೀರ್ಥಹಳ್ಳಿ ತಾಲೂಕು ಕೆಸರೆ ಗ್ರಾಮದ ಇಬ್ಬರು ಮೃತಪಟ್ಟಿದ್ದಾರೆ.

ಹೊಳೆಹೊನ್ನೂರು ಗ್ರಾಮದ ನಿವಾಸಿ ಕೆ. ಅರವಿಂದ ಕುಮಾರ್‌(44) ಹಾಗೂ ತೀರ್ಥಹಳ್ಳಿ ತಾಲೂಕು ಕೆಸರೆ ಗ್ರಾಮದ ಕೆ.ಎಲ್‌. ರಾಘವೇಂದ್ರ (46) ಮೃತಪಟ್ಟವರು. ಇಬ್ಬರೂ ಅಕ್ಕ-ತಂಗಿ ಮಕ್ಕಳಾಗಿದ್ದು, ಬೆಂಗಳೂರಿನಲ್ಲಿ ನೆಲೆಸಿದ್ದರು.

ಅರವಿಂದ ಕುಮಾರ್‌ ಅವರು ಬಿಎಂಟಿಸಿ ಬಸ್‌ ಚಾಲಕರಾಗಿದ್ದರು. ರಾಘವೇಂದ್ರ ಅವರು ಟ್ರಾವೆಲ್ಸ್‌ ಏಜೆನ್ಸಿ ನಡೆಸುತ್ತಿದ್ದರು. ಶನಿವಾರ ರಜಾ ದಿನವಾಗಿದ್ದರಿಂದ ಕರ್ನೂಲ್‌ನಲ್ಲಿದ್ದ ಮಾರುತಿ ಸ್ವಿಫ್ಟ್‌ ಡಿಸೈರ್‌ ಕಾರು ತರಲೆಂದು ಬೆಂಗಳೂರಿನಿಂದ ಕರ್ನೂಲ್‌ಗೆ ಬಸ್‌ನಲ್ಲಿ ತೆರಳಿ ಕಾರಿನಲ್ಲಿ ಹಿಂದಿರುಗುತ್ತಿದ್ದಾಗ ಲಾರಿ ಢಿಕ್ಕಿ ಹೊಡೆದು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಮೃತ ಅರವಿಂದ ಕುಮಾರ್‌ ಅವರು ಪತ್ನಿ, ಪುತ್ರಿ ಹಾಗೂ ಪುತ್ರನನ್ನು ಅಗಲಿದ್ದಾರೆ. ರಾಘವೇಂದ್ರ ಅವರು ಪತ್ನಿಯನ್ನು ಅಗಲಿದ್ದಾರೆ.