ಎಫ್‌ಆರ್‌ಸಿಪಿಎಸ್‌ ಫೆಲೋಷಿಪ್‌ಗೆ ಎ.ಸಿ. ಷಣ್ಮುಗಂ ಭಾಜನ

ಬೆಂಗಳೂರು: ವೈದ್ಯಕೀಯ ವೃತ್ತಿಪರರು ಹಾಗೂ ವಿಜ್ಞಾನಿಗಳಿಗೆ ಮೀಸಲಾದ ಗ್ಲಾಸೊ ರಾಯಲ್‌ ಕಾಲೇಜ್‌ ಆಫ್‌ ಫಿಸಿಷಿಯನ್ಸ್‌ ಮತ್ತು ಸರ್ಜನ್ಸ್‌ (ಎಫ್‌ಆರ್‌ಸಿಪಿಎಸ್‌) ಫೆಲೋಷಿಪ್‌ಗೆ ರಾಜರಾಜೇಶ್ವರಿ ಸಮೂಹ ಶಿಕ್ಷಣ ಸಂಸ್ಥೆ ಅಧ್ಯಕ್ಷ, ಶಿಕ್ಷಣತಜ್ಞ ಎ.ಸಿ. ಷಣ್ಮುಗಂ ಅವರು ಭಾಜನರಾಗಿದ್ದಾರೆ.

ಡಾ. ಎಂ.ಜಿ.ಆರ್‌. ಶಿಕ್ಷಣ ಮತ್ತು ಸಂಶೋಧನಾ ವಿಶ್ವವಿದ್ಯಾಲಯ ಸಂಸ್ಥಾಪಕ ಕುಲಪತಿಗಳು ಆಗಿರುವ ಷಣ್ಮುಗಂ ಈ ಫೆಲೋಷಿಪ್‌ಗೆ ಭಾಜನವಾಗಿರುವ 2ನೇ ಭಾರತೀಯರಾಗಿದ್ದಾರೆ. ಷಣ್ಮುಗಂ ವೈದ್ಯಕೀಯ ಕ್ಷೇತ್ರ ಪರಿಣಿತರಲ್ಲದಿದ್ದರೂ ಆ ಕ್ಷೇತ್ರಕ್ಕೆ ಅವರು ನೀಡಿರುವ ಕೊಡುಗೆಯನ್ನು ಪರಿಗಣಿಸಿ ಫೆಲೋಷಿಪ್‌ ನೀಡಲಾಗುತ್ತಿದೆ ಎಂದು ರಾಯಲ್‌ ಕಾಲೇಜ್‌ ಆಫ್‌ ಫಿಸಿಷಿಯನ್ಸ್‌ ಮತ್ತು ಸರ್ಜನ್ಸ್‌ ಫೆಲೋಷಿಪ್‌ ಸಮಿತಿಯ ಅಧ್ಯಕ್ಷ ಪ್ರೊ. ಡೇವಿಡ್‌ ಗ್ಯಾಲೋವೆ ತಿಳಿಸಿದ್ದಾರೆ.

ಇತೀ¤ಚೆಗೆ ಪ್ರೊ. ಗ್ಯಾಲೋವೆ ಹಾಗೂ ಫೆಲೋಷಿಪ್‌ ಸಮಿತಿ ಸದಸ್ಯರು ರಾಜರಾಜೇಶ್ವರಿ ಮೆಡಿಕಲ್‌ ಕಾಲೇಜು ಮತ್ತು ಹಾಸ್ಪಿಟಲ್‌ ಕ್ಯಾಂಪಸ್‌ಗೆ ಭೇಟಿ ನೀಡಿ ವಿಭಾಗಗಳ ಮುಖ್ಯಸ್ಥರು ಹಾಗೂ ವಿದ್ಯಾರ್ಥಿಗಳ ಜತೆ ಮಾತುಕತೆ ನಡೆಸಿದ್ದಾರೆ. ಜೂನ್‌ ಮಾಸದಲ್ಲಿ ಷಣ್ಮುಗಂ ಯುನೈಟೆಡ್‌ ಕಿಂಗ್‌ಡಂನ ಗ್ಲಾಸೊ ಯೂನಿವರ್ಸಿಟಿಗೆ ಭೇಟಿ ನೀಡಿ ಪ್ರತಿಷ್ಠಿತ ಪ್ರಶಸ್ತಿ ಪಡೆಯಲಿದ್ದಾರೆ ಎಂದು ರಾಜರಾಜೇಶ್ವರಿ ಕಾಲೇಜ್‌ ಆಡಳಿತ ಮಂಡಳಿ ತಿಳಿಸಿದೆ.