ಜಾಲತಾಣದಲ್ಲಿ ಆಮೀರ್‌ ಖಾನ್‌ ಅಳಿಯನದ್ದೇ ಭರ್ಜರಿ ಸುದ್ದಿ!

ಮುಂಬೈ: ಬಾಲಿವುಡ್‌ ಖ್ಯಾತ ನಟ ಆಮೀರ್‌ ಖಾನ್‌ ಅವರ ಪುತ್ರಿ ಇರಾ ಖಾನ್‌ ಮದುವೆ ವಿಷಯ ಜಾಲತಾಣದಲ್ಲಿ ಭಾರೀ ವೈರಲ್‌ ಆಗುತ್ತಿದೆ. ಆದರೆ, ಅದ್ದೂರಿ ವಿವಾಹ, ಐಷಾರಾಮಿ ಆತಿಥ್ಯಕ್ಕೋ ಈ ಮದುವೆ ಸುದ್ದಿಯಾಗಿಲ್ಲ. ಬದಲಿಗೆ ಆಮೀರ್‌ ಅಳಿಯ ನೂಪುರ್‌ ಶಿಖಾರೆ ತೊಟ್ಟಿರುವ ಬಟ್ಟೆ ಕಾರಣದಿಂದ ವೈರಲ್‌ ಆಗಿದೆ.

ಶಿಖಾರೆ ಶಾರ್ಟ್ಸ್ ಮತ್ತು ಬನಿಯನ್‌ ಧರಿಸಿಯೇ ಮದುವೆ ಮನೆಗೆ ದಿಬ್ಬಣ ಹೊರಟು, ವಿವಾಹ ನೋಂದಣಿಯನ್ನೂ ಅದೇ ದಿರಿಸಿನಲ್ಲಿ ಮಾಡಿಕೊಂಡಿದ್ದರು. ಅಷ್ಟೇ ಅಲ್ಲ, ಫಿಟ್ನೆಸ್‌ ಟ್ರೈನರ್‌ ಆಗಿರುವ ಮದುಮಗ ನೂಪುರ್‌, ಮುಂಬೈನಿಂದ ಬಾಂದ್ರಾವರೆಗೆ ಅಂದರೆ ಮದುವೆ ಮನೆಗೆ ಬರೋಬ್ಬರಿ 8 ಕಿ.ಮೀ. ಓಡಿಕೊಂಡೇ (ಜಾಗಿಂಗ್‌) ಬಂದಿದ್ದಾರೆ!

ಈ ವಿಚಿತ್ರ ವರ್ತನೆ ನೆಟ್ಟಿಗರನ್ನು ಗೊಂದಲಕ್ಕೀಡು ಮಾಡಿತ್ತು. ಶಿಖಾರೆ ಆ ರೀತಿಯ ಬಟ್ಟೆ ಧರಿಸಿದ್ದು ಯಾಕೆ ಎಂಬುದಕ್ಕೆ ನೆಟ್ಟಿಗರೊಬ್ಬೊಬ್ಬರು ಒಂದೊಂದು ಕಾರಣ ನೀಡಿದ್ದಾರೆ. ಕೆಲವರು ಆಮಿರ್‌ ಅವರ 3 ಇಡಿಯಟ್‌ ಸಿನಿಮಾದ ಪ್ರೇರಣೆ ಎಂದರೆ ಮತ್ತೆ ಕೆಲವರು ಬಟ್ಟೆ ಮೌಲ್ಯ ಎಷ್ಟೆಂದು ತಿಳಿಯಲು ಈ ಪರೀಕ್ಷೆ ಎಂದು ಛೇಡಿಸಿದ್ದಾರೆ.