ಬಿಎಸ್‌ವೈ-ಶೋಭಾ ವಿರುದ್ಧ ಏಕವಚನ ಪ್ರಯೋಗ; ವಿಡಿಯೋ ವೈರಲ್‌

ಬಾಗಲಕೋಟೆ: “ಬಿಜೆಪಿಯಲ್ಲಿ ಯಡಿಯೂರಪ್ಪ ಒಬ್ಬನೇ. ಜಗದೀಶ ಶೆಟ್ಟಿ ಬೇರೆ ಬರುತ್ತಾನೆ, ಈಶ್ವರಪ್ಪ ಪ್ರತ್ಯೇಕ ಬರ್ತಾನೆ. ಅನಂತಕುಮಾರ ಕೂಡ ಬೇರೆ ಬರ್ತಾನೆ. ಯಡಿಯೂರಪ್ಪ ಜತೆಗೆ ಇರೋದು ಶೋಭಾ ಒಬ್ಟಾಕೆ ಮಾತ್ರ’ ಎಂದು ಹುನಗುಂದ ಕಾಂಗ್ರೆಸ್‌ ಶಾಸಕ ವಿಜಯಾನಂದ ಕಾಶಪ್ಪನವರ ಏಕವಚನ ಪ್ರಯೋಗಿಸಿ ಭಾಷಣ ಮಾಡಿದ ವಿಡಿಯೋ ಇದೀಗ ವೈರಲ್‌ ಆಗಿದೆ.

“ಜೈಲಿಗೆ ಹೋಗಿ ಬಂದ ರಾಜಕಾರಣಿ ಯಡಿಯೂರಪ್ಪ, ನಿನ್ನ ಹತ್ತಿರ ಹೇಳಿಸಿಕೊಳ್ಳುವಷ್ಟು ದಡ್ಡ ನಾನಲ್ಲ. ನೀವು 14 ದಿನ ಜೈಲಿಗೆ ಹೋಗಿ ಬಂದಿದ್ದೀಯಾ, ನಿನ್ನ ಹಾಗೆ ನಾನು ಜೈಲಿಗೆ ಹೋಗಿ ಬಂದಿಲ್ಲ’ ಎಂದು ಕಾಶಪ್ಪನವರ ಹೇಳಿರುವುದು ವೈರಲ್‌ ಆಗಿದೆ.

ಇಳಕಲ್ಲ ಪಟ್ಟಣದಲ್ಲಿ ಡಿ.6ರಂದು ನಡೆದ ನೇಕಾರರ ಸಾಲಮನ್ನಾ ಪ್ರಮಾಣಪತ್ರ ವಿತರಣೆ ಕಾರ್ಯಕ್ರಮದಲ್ಲಿ ಜವಳಿ ಖಾತೆ ಸಚಿವ ರುದ್ರಪ್ಪ ಲಮಾಣಿ ಅವರಿದ್ದ ಕಾರ್ಯಕ್ರಮದಲ್ಲಿ ಕಾಶಪ್ಪನವರ ಈ ರೀತಿ ಮಾತನಾಡಿರುವ ವಿಡಿಯೋ ಇದು. ಇದೀಗ ವಿಡಿಯೋ ವೈರಲ್‌ ಆಗಿದ್ದು, ಬಿಜೆಪಿಯಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.

ಬಿಜೆಪಿ ಪರಿವರ್ತನಾ ಯಾತ್ರೆ ವೇಳೆ ಯಡಿಯೂರಪ್ಪನವರು, ನಿಮ್ಮ ಆಟ-ಗೂಂಡಾಗಿರಿ ಇನ್ಮುಂದೆ ನಡೆಯಲ್ಲ ಎಂದು ಶಾಸಕ ಕಾಶಪ್ಪನವರ ಕುರಿತು ಮಾತನಾಡಿದ್ದರು. ಹೀಗಾಗಿ, ಅವರಿಗೆ ತಿರುಗೇಟು ನೀಡುವ ಭರದಲ್ಲಿ ಕಾಶಪ್ಪನವರ ಈ ರೀತಿ ಮಾತನಾಡಿದ್ದಾರೆ.