ಇನ್ನೂ ಉದ್ಘಾಟನೆಯಾಗದ ಬಜಗೋಳಿಯ ಹೊಸ ಶೌಚಾಲಯ

ಬಜಗೋಳಿ: ಕಾರ್ಕಳ ತಾಲೂಕು ಬಜಗೋಳಿಯಲ್ಲಿ ಹೊಸ ಶೌಚಾಲಯವೊಂದು ನಿರ್ಮಾಣವಾಗಿದ್ದರೂ ಉದ್ಘಾಟನೆಗೆ ಅದಕ್ಕಿನ್ನೂ ಕಾಲ ಕೂಡಿ ಬಂದಿಲ್ಲ. ಇದರಿಂದಾಗಿ ಬಜಗೋಳಿಗೆ ಆಗಮಿಸುವ ಜನರಿಗೆ ನಿತ್ಯ ಕಿರಿಕಿರಿಯಾಗುತ್ತಿದೆ.

ತಿಂಗಳ ಹಿಂದೆ ಕಾಮಗಾರಿ ಪೂರ್ಣ
ಒಂದು ತಿಂಗಳ ಹಿಂದೆ ಹೊಸ ಶೌಚಾಲಯ ಕೆಲಸ ಮುಗಿದಿದೆ. 1.80 ಲಕ್ಷ ರೂ. ವೆಚ್ಚದಲ್ಲಿ ಕಾಮಗಾರಿ ನಡೆದಿದೆ. ಆದರೆ ಪಿಡಿಒ ಅಲಭ್ಯತೆಯಿಂದಾಗಿ ಉದ್ಘಾಟನೆ ದಿನಾಂಕ ನಿಗದಿಯಾಗದೆ ಸಮಸ್ಯೆಯಾಗಿದೆ.

ಹಳೆ ಶೌಚಾಲಯ ಬಳಸುವುದೇ ಕಷ್ಟ
ಹಳೆ ಶೌಚಾಲಯ ಹಲವು ಸಮಸ್ಯೆಗಳಿಂದ ಕೂಡಿದೆ. ಇದರ ವ್ಯವಸ್ಥೆಗಳು ಹಾಳಾಗಿದ್ದವು. ಜತೆಗೆ ತೀರಾ ಇಕ್ಕಟ್ಟಿನ ಜಾಗದಲ್ಲಿ ಈ ಶೌಚಾಲಯವಿದ್ದು ವಾರದ ಸಂತೆಯ ಸಂದರ್ಭ ವ್ಯಾಪಾರಿಗಳು ಇದರ ಎದುರೇ ಅಂಗಡಿಗಳನ್ನು ಹಾಕುತ್ತಾರೆ. ಬೀದಿ ಬದಿಯಲ್ಲೇ ಶೌಚಾಲಯ ಇರುವುದರಿಂದ ಬಳಸಲು ಮುಜುಗರ ಪಡುವಂತಾಗಿದೆ.

ಪ್ರಯಾಣಿಕರಿಗೆ ಬೇರೆ ವ್ಯವಸ್ಥೆಯಿಲ್ಲ
ಬಜಗೋಳಿ ಗ್ರಾಮೀಣ ಭಾಗದವರಿಗೆ ಪ್ರಮುಖ ಕೇಂದ್ರವಾಗಿದ್ದು ಬೆಳೆಯುತ್ತಿದೆ. ಕಳಸ-ಶೃಂಗೇರಿಯಿಂದ ಧರ್ಮಸ್ಥಳ ತೆರಳುವವರೂ ಬಜಗೋಳಿಯನ್ನೇ ಬಳಸುತ್ತಾರೆ. ಆದ್ದರಿಂದ ಪ್ರವಾಸಿಗರ ಓಡಾಟ ಹೆಚ್ಚಿದ್ದು, ಶೌಚಾಲಯ ಇಲ್ಲದೆ ಸಮಸ್ಯೆಯಾಗುತ್ತದೆ. ಸದ್ಯ ಹೊಸ ಶೌಚಾಲಯವಾಗಿದ್ದರೂ, ಪ್ರಯಾಣಿಕರಿಗೆ ತಿಳಿವಂತೆ ನಾಮಫ‌ಲಕ ಅಳವಡಿಸಬೇಕೆಂಬ ಆಗ್ರಹ ಕೇಳಿಬಂದಿದೆ.