ಮಳೆಯಲ್ಲೇ ಮೆರವಣಿಗೆ; 23 ವರ್ಷದ ಸೇವೆ ಸಲ್ಲಿಸಿದ ಶಿಕ್ಷಕರಿಗೆ ಅದ್ಧೂರಿ ಬೀಳ್ಕೊಡುಗೆ

ಚಿಕ್ಕಮಗಳೂರು: 23 ವರ್ಷ ಒಂದೇ ಶಾಲೆಯಲ್ಲಿ ಸೇವೆ ಸಲ್ಲಿಸಿ ನಿವೃತ್ತಿಯಾದ ಶಿಕ್ಷಕರಿಗೆ ಶಾಲಾ ಮಕ್ಕಳು ಮತ್ತು ಊರುವರು ಸೇರಿ ಅದ್ಧೂರಿಯಾಗಿ ಬೀಳ್ಕೊಟ್ಟ ಘಟನೆ ತರೀಕೆರೆ ತಾಲೂಕಿನ ಹಳಿಯೂರು ಸರ್ಕಾರಿ ಶಾಲೆಯಲ್ಲಿ ನಡೆದಿದೆ.

ಹಳಿಯೂರು ಸರ್ಕಾರಿ ಶಾಲೆಯಲ್ಲಿ 23 ವರ್ಷ ಸೇವೆ ಸಲ್ಲಿಸಿದ ಶಿಕ್ಷಕ ಲಕ್ಷ್ಮಣ್ ಎನ್.ವಿ. ಅವರು ನಿವೃತ್ತಿಯಾಗಿದ್ದಾರೆ.

ಬೀಳ್ಕೊಡುಗೆ ಸಮಾರಂಭದ ದಿನ ಶಿಕ್ಷಕನಿಗೆ ಮಕ್ಕಳು ಹೂಮಳೆಯ ಸ್ವಾಗತ ನೀಡಿದರು. ಶಿಕ್ಷಕ ನಡೆಯುವ ದಾರಿಯಲ್ಲಿ ಹೂ ಚೆಲ್ಲಿ ಸ್ವಾಗತ ಕೋರಿದರು. ಇದೇ ವೇಳೆ ಹಳ್ಳಿಗರು ಊರಿನ ತುಂಬಾ ಎತ್ತಿಗಾಡಿಯಲ್ಲಿ ಮೆರವಣಿಗೆ ಮಾಡಿಸಿದರು. ಸುರಿಯುವ ಮಳೆಯನ್ನೂ ಲೆಕ್ಕಿಸದೆ ಶಿಕ್ಷಕರ ಮೇಲಿನ ಪ್ರೀತಿಯಿಂದ ಊರಿನ ತುಂಬಾ ಮೆರವಣಿಗೆ ಮಾಡಿಸಿದರು.

ಪುಟ್ಟ-ಪುಟ್ಟ ಮಕ್ಕಳೇ ವಾದ್ಯಗಳನ್ನು ನುಡಿಸಿದರು. ವೀರಗಾಸೆ ಮೂಲಕ ಹೆಣ್ಣುಮಕ್ಕಳು ಶಿಕ್ಷಕನನ್ನು ಶಾಲೆಗೆ ಕರೆತಂದರು. ಹಳ್ಳಿಗರು ಶಿಕ್ಷಕ ದಂಪತಿಗೆ ಸನ್ಮಾನ ಮಾಡಿ ಬೀಳ್ಕೊಟ್ಟರು.