ಈ ನಗರದಲ್ಲಿ ಮನೆ ಬೆಲೆ ಬರೀ 85 ರೂ!

ಸಿನ್ಕ್ ಫ್ರಾಂಡಿ: ಯಾರಿಗುಂಟು, ಯಾರಿಗಿಲ್ಲ ಒಂದು ಮನೆ ಬೇಲೆ ಕೇವಲ 85 ರೂ.! ಮೊದಲು ಬಂದವರಿಗೆ ಆದ್ಯತೆ… ಕೋವಿಡ್-19 ವ್ಯಾಪಿಸಿರುವ ಈ ಪರಿಸ್ಥಿತಿಯಲ್ಲಿ ಜೋಕ್‌ ಮಾಡುತ್ತಿದಾರೆ ಅಂದುಕೊಳ್ಳಬೇಡಿ. ಇದು ನಿಜ. ಆದರೆ ಭಾರತದಲ್ಲಿ ಅಲ್ಲ, ಇಟಲಿಯಲ್ಲಿ.

ಇಟಲಿಯ ಕಲಾಬ್ರಿಯಾ ಪ್ರಾಂತ್ಯದ ದಕ್ಷಿಣಕ್ಕಿರುವ ಸಿನ್ಕ್ ಫ್ರಾಂಡಿಯಲ್ಲಿ ಕೇವಲ ಒಂದು ಯುರೋಗೆ (85.79 ರೂ.) ಒಂದಿಡೀ ಮನೆ ಕೊಡುವ ಆಫರ್‌ ನೀಡಲಾಗಿದೆ. ಹಾಗಾದ್ರೆ ಅದೊಂದು ಕೋವಿಡ್-19ಗೆ ತುತ್ತಾಗಿ ತತ್ತರಿಸಿರುವ ನಗರವೇ ಇರಬೇಕು ಎಂಬುದು ನಿಮ್ಮ ಊಹೆಯಾಗಿದ್ದರೆ, ಅದು ತಪ್ಪು. ಸಿನ್ಕ್ ಫ್ರಾಂಡಿ ಒಂದು ಕೋವಿಡ್-19 ಮುಕ್ತ ನಗರ.ಇಂತಹ ಸಂಕಷ್ಟದ ದಿನಗಳಲ್ಲೂ ಈ ರೀತಿಯ ಭರ್ಜರಿ ಆಫರ್‌ ನೀಡುವುದರ ಹಿಂದಿನ ಉದ್ದೇಶ, ಕೋವಿಡ್-19 ಕಾರಣದಿಂದ ಕೆಲಸ ಹುಡುಕಿಕೊಂಡು ಬೇರೆ ದೇಶ ಅಥವಾ ಪ್ರಾಂತ್ಯಗಳಿಗೆ ವಲಸೆ ಹೋಗುವ ಯುವ ಸಮುದಾಯವನ್ನು ಸೆಳೆಯುವುದಾಗಿದೆ. ಇದು ಅಲ್ಲಿನ ಮೇಯರ್‌ ಮೈಕೆಲ್‌ ಕೋನಿಯಾರ ಐಡಿಯಾ ಆಗಿದ್ದು, ಇದಕ್ಕೆ “ಆಪರೇಷನ್‌ ಬ್ಯೂಟಿ’ ಎಂಬ ಹೆಸರಿಡಲಾಗಿದೆ.

“ಈ ಆಪರೇಷನ್‌ ಬ್ಯೂಟಿ ಯೋಜನೆಯ ಪ್ರಮುಖ ಭಾಗವಾಗಿ, ಪಟ್ಟಣದ ಹಳೆಯ ಹಾಗೂ ಬಳಸದೇ ಇರುವ ಭಾಗಗಳಲ್ಲಿನ ಖಾಲಿ ಮನೆಗಳ ಮಾಲೀಕರನ್ನು ಹುಡುಕಿ, ಸಂಪರ್ಕಿಸಿ ಅವರಿಂದ ಮನೆ ಪಡೆಯಲಾಗಿದೆ, ಎಂದು ಮೇಯರ್‌ ಮೈಕೆಲ್‌ ಕೋನಿಯಾ ತಿಳಿಸಿದ್ದಾರೆ.