Cargo: ಭಾರತಕ್ಕೆ ಬರುತ್ತಿದ್ದ ಸರಕು ಹಡಗು ಹೈಜಾಕ್‌

ಹೊಸದಿಲ್ಲಿ: ಟರ್ಕಿಯಿಂದ ಭಾರತಕ್ಕೆ ಬರುತ್ತಿದ್ದ ಸರಕು ಹಡಗನ್ನು ಕೆಂಪು ಸಮುದ್ರದಲ್ಲಿ ಯೆಮೆನ್‌ನ ಹೌತಿ ಬಂಡುಕೋರರು ಅಪಹರಣ ಮಾಡಿದ ಘಟನೆ ರವಿವಾರ ನಡೆದಿದೆ.

“ಗ್ಯಾಲಕ್ಸಿ ಲೀಡರ್‌’ ಎಂಬ ಹೆಸರಿನ ಸರಕು ನೌಕೆಯಲ್ಲಿ ಬೇರೆ ಬೇರೆ ದೇಶ ಗಳಿಗೆ ಸೇರಿದ್ದ 50 ಸಿಬಂದಿ ಇದ್ದಾರೆ. ಆದರೆ ಈ ಪೈಕಿ ಭಾರತೀಯರು ಇದ್ದರೇ ಎಂಬ ಬಗ್ಗೆ ಮಾಹಿತಿ ಸಿಕ್ಕಿಲ್ಲ. ಹಡಗು ಹೈಜಾಕ್‌ ಆಗಿರುವುದನ್ನು ಇಸ್ರೇಲ್‌ನ ರಕ್ಷಣ ಇಲಾಖೆ ದೃಢಪಡಿಸಿದೆ. ಯೆಮೆನ್‌ ಸಮೀಪವೇ ಹೌತಿ ಬಂಡುಕೋರರು ಸರಕು ಹಡಗನ್ನು ಅಪಹರಿಸಿರುವುದು ಜಾಗತಿಕವಾಗಿ ಕಳವಳಕಾರಿ ವಿಚಾರ ವಾಗಿದೆ. ಅಂತಾರಾಷ್ಟ್ರೀಯ ನೌಕೆಯ ಮೇಲೆ ಇರಾನ್‌ ನಡೆಸಿರುವ ದಾಳಿ ಇದಾಗಿದೆ ಎಂದೂ ಇಸ್ರೇಲ್‌ ರಕ್ಷಣ ಇಲಾಖೆ ಹೇಳಿದೆ. ಜತೆಗೆ ಅದರಲ್ಲಿ ಇಸ್ರೇಲ್‌ ನಾಗರಿಕರು ಇರಲಿಲ್ಲ ಎಂದು ಸ್ಪಷ್ಟಪಡಿಸಿದೆ.

ಇರಾನ್‌ನ ನಿರ್ದೇಶನದ ಮೇರೆಗೆ ಬಂಡುಕೋರರು ನೌಕೆಯನ್ನು ಹೈಜಾಕ್‌ ಮಾಡಿದ್ದಾರೆ ಎಂದು ಇಸ್ರೇಲ್‌ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ಕಾರ್ಯಾಲಯ “ಎಕ್ಸ್‌’ನಲ್ಲಿ ಬರೆದುಕೊಂಡಿದೆ. ಗಾಜಾದಲ್ಲಿ ಇಸ್ರೇಲ್‌ ಆಕ್ರಮಣ ನಿಲ್ಲುವವರೆಗೂ ನಮ್ಮ ದಾಳಿ ಮುಂದುವರಿಯುತ್ತದೆ ಎಂದು ಇತ್ತೀಚೆಗಷ್ಟೇ ಹೌತಿ ಬಂಡುಕೋರರು ಘೋಷಿಸಿದ್ದರು.