ಪಿಕ್‌ನಿಕ್‌ ಗೆ ತೆರಳಿದ್ದ ವೇಳೆ ಕಾಲು ಜಾರಿ ಹಳ್ಳಕ್ಕೆ ಬಿದ್ದ ಬಾಲಕ ಸಾವು

ರಬಕವಿ-ಬನಹಟ್ಟಿ : ಪಿಕ್‌ನಿಕ್‌ಗೆಂದು ತೆರಳಿದ ಏಳೆಂಟು ಜನರ ಪಾಠಶಾಲಾ ಗೆಳೆಯರ ಗುಂಪೊಂದರಲ್ಲಿನ ಬಾಲಕ ಕಾಲು ಜಾರಿ ಹಳ್ಳದಲ್ಲಿ ಮುಳುಗಿ ಸಾವಿಗೀಡಾದ ಘಟನೆ ಬನಹಟ್ಟಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಗುರುವಾರ ನಡೆದಿದೆ.

ಕಳೆದ ಬುಧವಾರ ಮಧ್ಯಾಹ್ನ 3 ಗಂಟೆ ಸುಮಾರಿಗೆ ಸಮೀಪದ ಯಲ್ಲಟ್ಟಿ ಗ್ರಾಮದ ಹಳ್ಳಕ್ಕೆ ಗುಳ್ಳವನ ಪಿಕ್‌ನಿಕ್‌ಗೆಂದು ಶಾಲಾ ವಿದ್ಯಾರ್ಥಿಗಳ ಏಳೆಂಟು ಬಾಲಕರ ಗುಂಪಿನಲ್ಲಿ ಬನಹಟ್ಟಿಯ ಹರಿಜನಕೇರಿ ನಿವಾಸಿ ಪರಶುರಾಮ ಸಿದ್ದಪ್ಪ ನಡುವಿನಮನಿ(16) ಓಡಾಡುತ್ತಿರುವಾಗ ಆಯತಪ್ಪಿ ಕಾಲು ಜಾರಿದ ಪರಿಣಾಮ ಹಳ್ಳದ ಕಿನಾರೆಯಲ್ಲಿ ಬಿದ್ದ ಪರಿಣಾಮ ಈಜು ಬಾರದೆ ನೀರಿನಲ್ಲಿ ಮುಳುಗಿ ಸಾವಿಗೀಡಾಗಿದ್ದಾನೆ.

ಅಗ್ನಿಶಾಮಕ ಹಾಗು ಪರಿಣಿತ ಈಜುಗಾರರ ತಂಡವು ಸತತ 24 ಗಂಟೆಗಳ ಕಾಲ ಶೋಧ ನಡೆಸಿ ಕೊನೆಗೆ ಶುಕ್ರವಾರ ಮಧ್ಯಾಹ್ನ 3 ಗಂಟೆಗೆ ಹಳ್ಳದಲ್ಲಿನ ಶವ ಹೊರತೆಗೆಯುವಲ್ಲಿ ಯಶಸ್ವಿಯಾದರು. ಈ ಕುರಿತು ಬನಹಟ್ಟಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪಿಎಸ್‌ಐ ರಾಕೇಶ ಬಗಲಿ ಮತ್ತು ಪುರಂದರ ಪೂಜಾರಿ ತನಿಖೆ ಮುಂದುವರೆಸಿದ್ದಾರೆ.