ಟೋಕಿಯೊ ಒಲಿಂಪಿಕ್ಸ್‌ಗೆ 88,200 ಕೋ.ರೂ. ವೆಚ್ಚ

ಟೋಕಿಯೊ: ಮುಂದಿನ ವರ್ಷ ಟೋಕಿಯೋದಲ್ಲಿ ನಡೆಯಲಿರುವ ಒಲಿಂಪಿಕ್ಸ್‌ ಕ್ರೀಡಾಕೂಟದ ಬಜೆಟ್‌ ಅನ್ನು ಬಿಡುಗಡೆಗೊಳಿಸಲಾಗಿದ್ದು, ಸುಮಾರು 12.6 ಶತಕೋಟಿ ಡಾಲರ್‌ (1.35 ಲಕ್ಷ ಕೋಟಿ ಜಪಾನಿ ಯೆನ್‌ ಅಥವಾ 88,200 ಕೋ.ರೂ.) ಖರ್ಚಾಗಬಹುದು ಎಂದು ಅಂದಾಜಿಸಲಾಗಿದೆ.

ಇದರಲ್ಲಿ ಸಪ್ಪೋರ್‌ನಲ್ಲಿ ನಡೆಯಲಿರುವ ಮ್ಯಾರಥಾನ್‌ ಮತ್ತು ವಾಕಥಾನ್‌ನ 3 ಲಕ್ಷ ಕೋಟಿ ಯೆನ್‌ ಖರ್ಚು ಸೇರಿಲ್ಲ. ಈ ಖರ್ಚನ್ನು ಯಾರು ಭರಿಸಬೇಕೆಂಬ ವಿವಾದ ಇನ್ನೂ ಇತ್ಯರ್ಥವಾಗದಿರುವುದೇ ಇದಕ್ಕೆ ಕಾರಣ.

ಸ್ಥಳೀಯ ಪ್ರಾಯೋಜಕತ್ವ ಮತ್ತು ಟಿಕೆಟ್‌ ಮಾರಾಟದಿಂದ 30 ಶತಕೋಟಿ ಯೆನ್‌ ಆದಾಯ ಬರುವ ನಿರೀಕ್ಷೆಯಿದೆ. ಇದೇ ವೇಳೆ ನೈಸರ್ಗಿಕ ವಿಕೋಪ ಸೇರಿದಂತೆ ಯಾವುದಾದರೂ ಅವಘಡ ಸಂಭವಿಸಿದರೆ 1.35 ಲಕ್ಷ ಕೋಟಿ ಯೆನ್‌ ಮೊತ್ತವನ್ನು ಸಾದಿಲ್ವಾರು ನಿಧಿ ಎಂದು ಮೀಸಲಿರಿಸಲಾಗಿದೆ.