ಮೆಕ್ಕೆ ಜೋಳ ಮೊಳಕೆ ತಿಂದು 62 ಹಸುಗಳು ಸಾವು

ಗುಂಟೂರು: ಇಲ್ಲಿಯ ಗ್ರಾಮವೊಂದರಲ್ಲಿ ಮೆಕ್ಕೆಜೋಳದ ಮೊಳಕೆ ತಿಂದ ಪರಿಣಾಮ 62 ಹಸುಗಳು ಸಾವಿಗೀಡಾಗಿವೆ ಮತ್ತು ಇತರ 30 ಹಸುಗಳು ಅನಾರೋಗ್ಯಕ್ಕೀಡಾಗಿವೆ. ಜಾನುವಾರುಗಳ ಮಾಲೀಕ ಗುಂಡಾಲ ಲಕ್ಷ್ಮಯ್ಯ ಸೋಮವಾರ ಮೆಕ್ಕೆಜೋಳ ಹೊಲದಲ್ಲಿ ಜಾನುವಾರುಗಳನ್ನು ಮೇಯಲು ಬಿಟ್ಟಿದ್ದರು. ಹೊಲದಲ್ಲಿ ಬೆಳೆ ಕಟಾವು ಮಾಡಲಾಗಿತ್ತು. ಜಾನುವಾರುಗಳು ಜೋಳದ ಮೊಳಕೆಗಳನ್ನು ತಿಂದು ಪಕ್ಕದ ತೊರೆಯಲ್ಲಿ ನೀರು ಕುಡಿದಿದ್ದವು. ಕೆಲ ಸಮಯದಲ್ಲೇ ಒಂದಾದ ನಂತರ ಒಂದು ಕುಸಿದುಬಿದ್ದವು. ಮೆಕ್ಕೆ ಜೋಳ ಕಟಾವಾದ ಬಳಿಕ ಅದರ ಮೊಳಕೆಗಳು ವಿಷಪೂರಿತವಾಗಿರುತ್ತವೆ ಎಂದು ಸ್ಥಳೀಯ ಪಶು ವೈದ್ಯರು ಹೇಳಿದ್ದಾರೆ.