Advertisement
ಇಟೆಲಿಯ ಸಾರ್ಡಿನಿಯಾ ಎಂಬಲ್ಲಿನ ಚಿಯಾ ಬೀಚ್‌ನಿಂದ ಫ್ರೆಂಚ್‌ ದಂಪತಿ 14 ಪ್ಲಾಸ್ಟಿಕ್‌ ಬಾಟಲಿಗಳಲ್ಲಿ ಹೊಯಿಗೆ ತುಂಬಿಸಿ ಕೊಂಡೊಯ್ದಿದ್ದರಂತೆ. ಒಟ್ಟು 40 ಕೆ.ಜಿ.ಯಷ್ಟು ಮರಳನ್ನು ಅವರು ಕಾರಲ್ಲಿ ಕೊಂಡೊಯ್ದಿದ್ದು, ಹಡಗು ಹತ್ತಲು ಹೊರಟಿದ್ದಾರೆ. ಈ ವೇಳೆ ಅವರು ರೆಡ್‌ ಹ್ಯಾಂಡ್‌ ಆಗಿ ಸಿಕ್ಕಿದ್ದಾಗಿ ಪೊಲೀಸರು ಹೇಳಿದ್ದಾರೆ. ದಂಪತಿಗೆ ಇಲ್ಲಿಂದ ಮರಳು ಕೊಂಡೊಯ್ಯುವುದು ಅಪರಾಧ ಎಂದು ಗೊತ್ತಿರಲಿಲ್ಲವಂತೆ. ಆದರೂ ಅವರಿಗೆ 6 ವರ್ಷ ಜೈಲೂಟ ಗ್ಯಾರೆಂಟಿ ಎಂದು ಅಲ್ಲಿನ ಅಧಿಕಾರಿಗಳು ಹೇಳಿದ್ದಾರೆ.
ಸಾರ್ಡಿನಿಯಾದ ಸುತ್ತಮುತ್ತಲಿನ ಮರಳು ಚಿನ್ನಕ್ಕಿಂತ ಹೆಚ್ಚು ಬೆಲೆ ಬಾಳುವಂಥದ್ದು. ಇದರಲ್ಲಿ ಪುಡಿಯಾದ ಹವಳ, ಸಮುದ್ರ ಅವಶೇಷಗಳು, ಪಳೆಯುಳಿಕೆಯ ಅಂಶಗಳಿಂದ ವಿಶಿಷ್ಟವಾಗಿದೆ. ಇದು ತುಸು ಗುಲಾಬಿ ಬಣ್ಣದಲ್ಲಿರುತ್ತದಂತೆ. ಹೆಚ್ಚು ಆಕರ್ಷಕವೂ ಹೌದು. ಇದನ್ನು ವ್ಯಾಪಕ ಪ್ರಮಾಣದಲ್ಲಿ ಕಳ್ಳ ಸಾಗಣೆ ಮಾಡಲಾಗುತ್ತದಂತೆ. ಪ್ರಾಕೃತಿಕವಾಗಿ ಈ ಮರಳು ಅಮೂಲ್ಯವಾದದ್ದು. ಇದರ ಮರಳುಗಾರಿಕೆಯಿಂದ ಪರಿಸರಕ್ಕೆ ಹಾನಿಯಾಗುತ್ತದೆ ಎಂದೂ ಹೇಳಲಾಗಿದೆ. ಆದ್ದರಿಂದ ಮರಳು ಕದಿಯುವ ವಿರುದ್ಧ ಕಠಿನ ಕಾನೂನು ಕ್ರಮವಾಗುತ್ತದೆ. ಸ್ವಲ್ಪ ಮರಳು ಕದ್ದರೂ ಸುಮಾರು 2 ಲಕ್ಷ ರೂ.ಗಳಷ್ಟು ದಂಡವನ್ನೂ ಹಾಕುತ್ತಾರಂತೆ. ಹೀಗೆ ಕದಿಯುವವರೆಲ್ಲ ಪ್ರವಾಸಿಗಳೇ ಆಗಿದ್ದಾರಂತೆ.