ಮದ್ರಾಸ್‌ ವಿವಿಗೆ ಸತತ 4ನೇ ಪ್ರಶಸ್ತಿ

ಮಣಿಪಾಲ: ಆತಿಥೇಯ ಮಣಿಪಾಲ್‌ ಅಕಾಡೆಮಿ ಆಫ್ ಹೈಯರ್‌ ಎಜುಕೇಶನ್‌ (ಮಾಹೆ) ವಿರುದ್ಧ 3-0 ಅಂತರದ ಗೆಲುವು ಸಾಧಿಸಿದ ಮದ್ರಾಸ್‌ ವಿವಿ ಸತತ 4ನೇ ಬಾರಿಗೆ ಅಖೀಲ ಭಾರತ ಅಂತರ್‌ ವಿವಿ ವನಿತಾ ಸ್ಕ್ವಾಶ್‌ ಚಾಂಪಿಯನ್‌ ಆಗಿ ಹೊರಹೊಮ್ಮಿದೆ. ಮಾಹೆ ಸತತ 2ನೇ ಸಲ ರನ್ನರ್‌ ಅಪ್‌ ಆಗಿದೆ.

ಕಳೆದ ಸಲವೂ ಈ 2 ತಂಡಗಳೇ ಫೈನಲ್‌ನಲ್ಲಿ ಸೆಣಸಿದ್ದವು. ಆದರೆ ಬಲಿಷ್ಠ ಮದ್ರಾಸ್‌ ವಿವಿ ವಿರುದ್ಧ ಸೇಡು ತೀರಿಸಿಕೊಳ್ಳುವಲ್ಲಿ ಮಾಹೆ ವಿಫ‌ಲವಾಯಿತು.

ಶುಕ್ರವಾರ ನಡೆದ ಫೈನಲ್‌ನಲ್ಲಿ ಮದ್ರಾಸ್‌ ವಿವಿಯ ಶಿವಾನಿ, ಋತಿಕಾ ಎಸ್‌. ಮತ್ತು ಕೃತಿಕಾ ಜೆ.ಎಸ್‌. ಅವರು ಮಾಹೆಯ ಅಯಾನ್‌, ಮುಸ್ಕಾನ್‌ ಮತ್ತು ಸುರಿತಾ ವಿರುದ್ಧ ಜಯ ಸಾಧಿಸಿದರು. 3ನೇ ಸ್ಥಾನಕ್ಕಾಗಿ ನಡೆದ ಸ್ಪರ್ಧೆಯಲ್ಲಿ ರಾಯ್‌ಪುರದ ಪಂಡಿತ್‌ ರವಿಶಂಕರ್‌ ಶುಕ್ಲಾ ವಿವಿ ತಂಡ 3-1ರಿಂದ ಪುಣೆಯ ಸಾವಿತ್ರಿಭಾಯಿ ಫ‌ುಲೆ ವಿವಿ ವಿರುದ್ಧ ಜಯ ಸಾಧಿಸಿತು. ವಿಜೇತರಿಗೆ ಮಾಹೆಯ ಸಹಕುಲಾಧಿಪತಿ ಡಾ| ಎಚ್‌.ಎಸ್‌. ಬಲ್ಲಾಳ್‌ ಬಹುಮಾನ ವಿತರಿಸಿದರು.