ಸುಧಾರಾಣಿ ಸಿನಿಪಯಣಕ್ಕೆ 35ರ ಸಂಭ್ರಮ

ನಟಿ ಸುಧಾರಾಣಿ ಪುತ್ರಿ ಕನ್ನಡ ಚಿತ್ರದಲ್ಲಿ ನಟಿಸುತ್ತಾರೆ, ಶೀಘ್ರವೇ ಲಾಂಚ್‌ ಆಗಲಿದ್ದಾರೆ ಎಂಬ ಸುದ್ದಿ ಆಗಾಗ ಕೇಳಿಬರುತ್ತಲೇ ಇದೆ. ಆದರೆ, ಇದು ವರೆಗೆ ಅವರು ಯಾವ ಸಿನಿಮಾದಲ್ಲೂ ನಟಿಸುತ್ತಿಲ್ಲ. ಹಾಗಾದರೆ, ಚಿತ್ರರಂಗಕ್ಕೆ ಸುಧಾರಾಣಿ ಪುತ್ರಿ ಬರಲ್ವಾ ಎಂಬ ಪ್ರಶ್ನೆ ಸಹಜ. ಈ ಪ್ರಶ್ನೆಗೆ ಸ್ವತಃ ಸುಧಾರಾಣಿಯವರೇ ಉತ್ತರಿಸಿದ್ದಾರೆ.

“ಅವಳಿಗೆ ಸಾಕಷ್ಟು ಅವಕಾಶಗಳು ಬರುತ್ತಿವೆ. ಹಾಗಂತ ಇನ್ನೂ ಚಿತ್ರರಂಗಕ್ಕೆ ಬರುವ ಬಗ್ಗೆ ನಿರ್ಧರಿಸಿಲ್ಲ. ಏಕೆಂದರೆ ಆ ನಿರ್ಧಾರ ಅವಳದು. ಆಕೆ ನಿರ್ಧಾರ ತೆಗೆದುಕೊಳ್ಳುವಷ್ಟು ಬೆಳೆದಿದ್ದಾಳೆ. ಸದ್ಯ ಆಕೆ ಲಾ ಓದುತ್ತಿದ್ದಾಳೆ. ನಟನೆ ಅನ್ನೋದು ಅವರವರ ಆಸಕ್ತಿ. ಆ ಮೂಲಕವೇ ಬರಬೇಕೇ ಹೊರತು ಯಾರಧ್ದೋ ಒತ್ತಾಯಕ್ಕೆ ಬರೋಕ್ಕಾಗಲ್ಲ. ಮುಂದೆ ಅವಳಿಗೆ ಸಿನಿಮಾ ಆಸಕ್ತಿ ಬಂದು ಬರುವುದಾದರೆ ನನ್ನ ಅಭ್ಯಂತರವಿಲ್ಲ’ ಎನ್ನುತ್ತಾರೆ.

ಸಿನಿಪಯಣಕ್ಕೆ 35

ಇನ್ನು, ಸುಧಾರಾಣಿ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟು 35 ವರ್ಷವಾಗಿದೆ. ಶಿವರಾಜ್‌ಕುಮಾರ್‌ ಅವರ “ಆನಂದ್‌’ ಚಿತ್ರದ ಮೂಲಕ ನಾಯಕಿಯಾಗಿ ಎಂಟ್ರಿಕೊಟ್ಟ ಸುಧಾರಾಣಿ ಆ ನಂತರ ಬೇಡಿಕೆಯ ನಟಿಯಾಗಿ ವಿವಿಧ ಪಾತ್ರಗಳನ್ನು ಮಾಡಿಕೊಂಡು ಬಂದಿದ್ದಾರೆ.

ಈ ಜರ್ನಿಯ ಬಗ್ಗೆ ಮಾತನಾಡುವ ಅವರು, “ಇದೊಂದು ಸುಂದರವಾದ ಪಯಣ. ಸಾಕಷ್ಟು ಪ್ಲಸ್‌-ಮೈನಸ್‌ನೊಂದಿಗೆ ಸಾಗಿದೆ. ಪರಭಾಷೆಯಿಂದ ಅವಕಾಶ ಸಿಕ್ಕರೂ ನನಗೆ ತುಂಬಾ ತೃಪ್ತಿ ಕೊಟ್ಟಿದ್ದು ನಮ್ಮ ಕನ್ನಡ ಚಿತ್ರರಂಗ. ನನಗೆ ಪರಭಾಷೆಗಳಲ್ಲಿ ಕೇವಲ ರೊಮ್ಯಾಂಟಿಕ್‌, ಗ್ಲಾಮರಸ್‌ ಹೀರೋಯಿನ್‌ ಆಗಿರಲು ಇಷ್ಟವಿರಲಿಲ್ಲ. ಕನ್ನಡದಲ್ಲಿ ನನಗೆ ವಿಭಿನ್ನ ಪಾತ್ರಗಳನ್ನು ಮಾಡಿದ್ದೇನೆ. ಮಾಡಿದ್ದೇನೆ ಅನ್ನೋದಕ್ಕಿಂತ ನನ್ನ ಮೇಲೆ ನಂಬಿಕೆ ಇಟ್ಟು ಮಾಡಿಸಿದ್ದಾರೆ ಎನ್ನಬಹುದು.

ಇದನ್ನೂ ಓದಿ:65ರ ಹರೆಯದಲ್ಲೂ ಕಟ್ಟುಮಸ್ತಾದ ದೇಹ… ‘still I Am Fit’  ಎಂದ ಈ ಹಿರಿಯ ನಟ ಯಾರು ?    

ಒಂದರ್ಥ ದಲ್ಲಿ ಚಿತ್ರರಂಗ ನನ್ನನ್ನು ತುಂಬಾ ಚೆನ್ನಾಗಿ ನಡೆಸಿಕೊಂಡು ಬಂದಿದೆ. ಈಗಲೂ ಸಾಕಷ್ಟು ಅವಕಾಶಗಳು ಬರುತ್ತಿವೆ. ಆದರೆ ಅಲ್ಲಿ ನಮ್ಮ ಪಾತ್ರಕ್ಕೊಂದು ಪ್ರಾಮುಖ್ಯತೆ, ಅರ್ಥವಿರಬೇಕು. ಅದು ಒಂದೇ ದೃಶ್ಯವಾದರೂ ಸರಿ, ಒಪ್ಪಿಕೊಂಡ ನಂತರ ಕೆಲಸವಿರಬೇಕು. ಆ ತರಹದ ಪಾತ್ರಗಳನ್ನು ಒಪ್ಪಿಕೊಳ್ಳುತ್ತಿದ್ದೇನೆ. ಕಮರ್ಷಿಯಲ್‌ ದೃಷ್ಟಿಗಿಂತ ಹೆಚ್ಚಾಗಿ ಸಿನಿಮಾವನ್ನು ಪ್ಯಾಶನ್‌ನಿಂದ ಒಪ್ಪಿಕೊಳ್ಳುತ್ತಿದ್ದೇನೆ’ ಎನ್ನುವುದು ಸುಧಾರಾಣಿ ಮಾತು.

ಸದ್ಯ ಸುಧಾರಾಣಿ “ಬೆಳಕು’ ಎಂಬ ಸಿನಿಮಾ ಒಪ್ಪಿಕೊಂಡಿದ್ದು, ರಾಘವೇಂದ್ರ ರಾಜ್‌ಕುಮಾರ್‌ ಕಾಂಬಿನೇಶನ್‌ನಲ್ಲಿ ನಟಿಸುತ್ತಿದ್ದಾರೆ.

ಇದನ್ನೂ ಓದಿ: ಸ್ಯಾಂಡಲ್ ವುಡ್ ನಲ್ಲಿ ಹೊಸ ದಾಖಲೆ ಬರೆದ ಕೆಜಿಎಫ್ 2