2ಜಿ ತೀರ್ಪು ರೆಡಿಯಿಲ್ಲ: ಡಿ.5ಕ್ಕೆ ಮುಂದೂಡಿಕೆ

ನವದೆಹಲಿ: ಕೇಂದ್ರದ ಮಾಜಿ ದೂರಸಂಪರ್ಕ ಸಚಿವ ಎ.ರಾಜಾ ಹಾಗೂ ಡಿಎಂಕೆ ವರಿಷ್ಠ ಕರುಣಾನಿಧಿ ಪುತ್ರಿ ಹಾಗೂ ಹಾಲಿ ಸಂಸದೆ ಕನ್ನಿಮೋಳಿ ಅವರ ರಾಜಕೀಯ ಭವಿಷ್ಯ ನಿರ್ಧರಿಸಲಿರುವ 2ಜಿ ಹಗರಣದ ತೀರ್ಪು ಮುಂದೂಡಲ್ಪಟ್ಟಿದೆ.

ಮಂಗಳವಾರ ಈ ತೀರ್ಪನ್ನು ಪ್ರಕಟಿಸಬೇಕಿದ್ದ ಸಿಬಿಐ ನ್ಯಾಯಾಲಯದ ಮುಖ್ಯ ನ್ಯಾಯಾಧೀಶ ಒ.ಪಿ.ಸೈನಿ, ತೀರ್ಪು ಸಿದ್ಧಪಡಿಸಲು ಅವಲೋಕಿಸಬೇಕಾಗಿರುವ ದಾಖಲೆಗಳು ಹೇರಳವಾಗಿದ್ದು, ಅದೆಲ್ಲವನ್ನೂ ಸೂಕ್ಷ್ಮವಾಗಿ ಅಧ್ಯಯನ ನಡೆಸಿದ ನಂತರವೇ ತೀರ್ಪು ಪ್ರಕಟಿಸಬೇಕಿದೆ. ಇದಕ್ಕೆ ಸಮಯ ಬೇಕಿರುವುದರಿಂದ ಸದ್ಯಕ್ಕೆ ಈ ಪ್ರಕರಣದ ಮುಂದಿನ ವಿಚಾರಣೆಯನ್ನು ಡಿ. 5ಕ್ಕೆ ಮುಂದೂಡುತ್ತಿರುವುದಾಗಿ ತಿಳಿಸಿದರು. ಡಿ. 5ರಂದು ನಡೆಯುವ ಕಲಾಪದಲ್ಲಿ ತೀರ್ಪಿನ ದಿನಾಂಕವನ್ನೂ ಪ್ರಕಟಿಸಲಾಗುವುದು ಎಂದು ನ್ಯಾ. ಸೈನಿ ತಿಳಿಸಿದ್ದಾರೆ.