ಜೋಗಿ ಚಿತ್ರಕ್ಕೆ ಹದಿನೈದು ವರ್ಷ

“ಜೋಗಿ’- ಬಹುಶಃ ಈ ಸಿನಿಮಾ ಹೆಸರು ಕೇಳುತ್ತಿದ್ದಂತೆ ಅಪ್ಪಟ ಸಿನಿಪ್ರೇಮಿಗಳು 15 ವರ್ಷಗಳ ಹಿಂದಿನ ನೆನಪಿಗೆ ಜಾರುತ್ತಾರೆ. ಶಿವರಾಜಕುಮಾರ್‌ ನಾಯಕರಾಗಿರುವ ಆ ಸಿನಿಮಾವನ್ನು ಫ‌ಸ್ಟ್‌ ಡೇ ಫ‌ಸ್ಟ್‌ ಶೋ ನೋಡಲು ಸಾಲು ಗಟ್ಟಿ ನಿಂತಿದ್ದು, ಆ ಚಿತ್ರ ಮುಂದೆ ದಾಖಲೆ ಬರೆದಿದ್ದು, ಆ್ಯಕ್ಷನ್‌ ಜೊತೆಗೆ ತಾಯಿ ಸೆಂಟಿಮೆಂಟ್‌ ಸಿನಿಮಾವಾಗಿ ಪ್ರೇಕ್ಷಕರ ಮನಗೆದ್ದಿತ್ತು. ಹಲವು ದಾಖಲೆಗಳಿಗೂ ಈ ಚಿತ್ರ ಕಾರಣವಾಯಿತು. ಎಲ್ಲಾ ಓಕೆ, “ಜೋಗಿ’ ಚಿತ್ರದಬಗ್ಗೆ ಈಗ ಯಾಕೆ ಈ ಪ್ರಸ್ತಾಪ ಎಂದು ನೀವು ಕೇಳಬಹುದು. ಅದಕ್ಕೆ ಕಾರಣ, “ಜೋಗಿ’ ಚಿತ್ರ 15 ವರ್ಷ ಪೂರೈಸುತ್ತಿರೋದು.

ಹೌದು, ಶಿವರಾಜ್‌ ಕುಮಾರ್‌ ಅವರ “ಜೋಗಿ’ ಚಿತ್ರ ಬಿಡುಗಡೆಯಾಗಿ ಇಂದಿಗೆ 15 ವರ್ಷ ಆಗುತ್ತಿದೆ. ಪ್ರೇಮ್‌ ನಿರ್ದೇಶನದ ಈ ಚಿತ್ರ 2005 ಆಗಸ್ಟ್‌ 19ರಂದು ತೆರೆಕಂಡಿತ್ತು. ಸಿನಿಮಾ ಬಿಡುಗಡೆಗೆ ಮೊದಲೇ ಚಿತ್ರದ ಹಾಡುಗಳು ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗಿದ್ದವು. ಸಿನಿಮಾ ಕೂಡಾ ಮಾಸ್‌ ಕಂ ತಾಯಿ ಸೆಂಟಿಮೆಂಟ್‌ನೊಂದಿಗೆ ಪ್ರೇಕ್ಷಕರ ಮನಗೆದ್ದಿತ್ತು. ಈಗ ಈ ಚಿತ್ರಕ್ಕೆ 15 ವರ್ಷ ತುಂಬಿದ ಹಿನ್ನೆಲೆಯಲ್ಲಿ ಶಿವಣ್ಣ ಅಭಿಮಾನಿಗಳು ಜೋಗಿ ಕಾಮನ್‌ ಡಿಪಿ ಬಿಡುಗಡೆ ಮಾಡುತ್ತಿದ್ದಾರೆ. ಇನ್ನು, ಶಿವ ಸೈನ್ಯ ತಂಡದಿಂದ ಜೋಗಿ ಹೊಸ ವರ್ಷನ್‌ ಟ್ರೈಲರ್‌ ಯುಟ್ಯೂಬ್‌ ನಲ್ಲಿ ಬಿಡುಗಡೆ ಮಾಡಲಿದ್ದಾರೆ.

ಜೊತೆಗೆ ಜೋಗಿ ಜಾತ್ರೆ ಹೆಸರಲ್ಲಿ ಅಭಿಮಾನಿಗಳು ಸಂಭ್ರಮಿಸಲಿದ್ದಾರೆ. “ಜೋಗಿ’ ಚಿತ್ರ ಹಲವು ದಾಖಲೆಗಳನ್ನು ಬರೆದಿದೆ. ಬೆಂಗಳೂರಿನ 16 ಚಿತ್ರಮಂದಿರಗಳಲ್ಲಿ 100 ದಿನಗಳು, ಮೈಸೂರಿನ 3 ಚಿತ್ರಮಂದಿರಗಳಲ್ಲಿ 100 ದಿನಗಳು ಹಾಗೂ ಒಟ್ಟು 61 ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಶತದಿನೋತ್ಸವ ಆಚರಿಸಿದೆ. ನಿರ್ದೇಶಕ ಪ್ರೇಮ್‌ ಕೂಡಾ ಈ ಖುಷಿಯನ್ನು ಅಭಿಮಾನಿಗಳ ಜೊತೆ ಹಂಚಿಕೊಳ್ಳಲಿದ್ದಾರೆ. ಇಂದು ಸಂಜೆ ಸೋಶಿಯಲ್‌ ಮೀಡಿಯಾದಲ್ಲಿ ಲೈವ್‌ ಬಂದು, “ಜೋಗಿ’ ಚಿತ್ರದ ಬಗ್ಗೆ ಮಾತನಾಡಲಿದ್ದಾರೆ.­