ಮುಂಬೈ: ಸಾವು ಯಾವ ರೀತಿ ಬಂದೆರಗುತ್ತದೆ ಎಂದು ಊಹಿಸಲು ಸಾಧ್ಯವಿಲ್ಲ ಎಂಬುದಕ್ಕೆ ಈ ದುರಂತ ಘಟನೆಯೇ ಸಾಕ್ಷಿಯಾಗಿದೆ. ಜಾವೆಲಿನ್‌ ಥ್ರೋ ಪಂದ್ಯದ ಅಭ್ಯಾಸದ ವೇಳೆ ವಿದ್ಯಾರ್ಥಿಯೊಬ್ಬ ಎಸೆದ ಜಾವೆಲಿನ್‌ ಮತ್ತೊಬ್ಬ ವಿದ್ಯಾರ್ಥಿಯ ತಲೆಗೆ ಹೊಕ್ಕಿದ ಪರಿಣಾಮ ಆತ ಸ್ಥಳದಲ್ಲೇ ಕೊನೆಯುಸಿರೆಳೆದ ಘಟನೆ ಮಹಾರಾಷ್ಟ್ರದ ರಾಯ್‌ ಗಢದಲ್ಲಿ ನಡೆದಿದೆ.
ಇದನ್ನೂ ಓದಿ:Moon: ಪತ್ನಿಯ ಹುಟ್ಟುಹಬ್ಬಕ್ಕೆ ಚಂದ್ರನ ಮೇಲಿನ ಜಾಗವನ್ನು ಉಡುಗೊರೆಯಾಗಿ ನೀಡಿದ ಪತಿ
ಮಹಾರಾಷ್ಟ್ರದ ಗೋರೆಗಾಂವ್‌ ನ ಪುರಾರ್‌ ನ ಐಎನ್‌ ಟಿ ಇಂಗ್ಲಿಷ್‌ ಸ್ಕೂಲ್‌ ನಲ್ಲಿ ಈ ಘಟನೆ ನಡೆದಿದೆ. ಬುಧವಾರ ಮಧ್ಯಾಹ್ನ ವಿದ್ಯಾರ್ಥಿಗಳು ಶಾಲಾ ಆಟದ ಮೈದಾನದಲ್ಲಿ ಜಾವೆಲಿನ್‌ ಥ್ರೋ ತಂಡ ಅಭ್ಯಾಸ ನಡೆಸುತ್ತಿತ್ತು. ಈ ವೇಳೆ ಹುಜಾಫೆ ದವಾರೆ (15) ಎಂಬ ವಿದ್ಯಾರ್ಥಿಯೂ ತಾಲೂಕು ಮಟ್ಟದ ಸ್ಪರ್ಧೆಗಾಗಿ ಅಭ್ಯಾಸದಲ್ಲಿ ಪಾಲ್ಗೊಂಡಿದ್ದ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಅಭ್ಯಾಸ ಪಂದ್ಯ ನಡೆಯುತ್ತಿದ್ದ ಸಂದರ್ಭದಲ್ಲಿ ವಿದ್ಯಾರ್ಥಿಯೊಬ್ಬ ಜಾವೆಲಿನ್‌ ಎಸೆದಿದ್ದ. ಆಗ ಕೆಳಕ್ಕೆ ಬಾಗಿ ಶೂ ಲೇಸ್‌ ಕಟ್ಟುತ್ತಿದ್ದ ದವಾರೆ ತಲೆಗೆ ಜಾವೆಲಿನ್‌ ಹೊಕ್ಕಿಬಿಟ್ಟಿತ್ತು. ಇದರ ಪರಿಣಾಮ ದವಾರೆ ಸ್ಥಳದಲ್ಲಿ ಕುಸಿದು ಬಿದ್ದು, ತೀವ್ರ ರಕ್ತಸ್ರಾವಾಗಿ ಕೊನೆಯುಸಿರೆಳೆದಿರುವುದಾಗಿ ಪೊಲೀಸ್‌ ಅಧಿಕಾರಿಗಳು ಮಾಹಿತಿ ನೀಡಿರುವುದಾಗಿ ವರದಿಯಾಗಿದೆ.
ಇದೊಂದು ಆಕಸ್ಮಿಕ ಸಾವು ಎಂಬುದಾಗಿ ಪ್ರಕರಣ ದಾಖಲಿಸಿಕೊಂಡಿರುವುದಾಗಿ ತಿಳಿಸಿರುವ ಗೋರೆಗಾಂವ್‌ ಪೊಲೀಸ್‌ ಠಾಣಾಧಿಕಾರಿ, ಒಂದು ವೇಳೆ ವಿದ್ಯಾರ್ಥಿ ಜಾವೆಲಿನ್‌ ಥ್ರೋ ಅಭ್ಯಾಸದ ವೇಳೆ ನಿರ್ಲಕ್ಷ್ಯ ವಹಿಸಿದ್ದರ ಬಗ್ಗೆ ತನಿಖೆ ವೇಳೆ ಪರಿಶೀಲಿಸುವುದಾಗಿ ತಿಳಿಸಿದ್ದಾರೆ.
