140 ಕಿ.ಮೀ. ವೇಗದಲ್ಲಿ ತಾಯಿ ಕಾರಲ್ಲಿ ಪರಾರಿಯಾದ ಪೋರ!

ಬರ್ಲಿನ್‌: ಆ ತಾಯಿ ರಾತ್ರಿ 2 ಗಂಟೆ ಹೊತ್ತಿಗೆ ಎದ್ದು ನೋಡುತ್ತಾಳೆ, 8 ವರ್ಷದ ಮಗ ಹಾಸಿಗೆಯಲ್ಲಿಲ್ಲ. ಹೊರಗೆ ಬಂದು ನೋಡಿದರೆ ಕಾರೂ ಇಲ್ಲ. ಬೆಚ್ಚಿ ಬಿದ್ದ ತಾಯಿ ಮನೆಯೆಲ್ಲ ಹುಡುಕಾಡಿದ್ದೂ ಅಲ್ಲದೆ ಕೂಡಲೇ ಪೊಲೀಸರಿಗೆ ಕರೆ ಮಾಡಿದ್ದಾಳೆ. ತಡಮಾಡದ ಪೊಲೀಸರೂ ಹುಡುಕಾಡಿದ್ದಲ್ಲದೆ ಸಿಸಿಟಿವಿ ನೋಡಿದರೆ ಕಂಡದ್ದು ವಿಚಿತ್ರ ದೃಶ್ಯ.

ಆ ತಾಯಿ ಅಂದುಕೊಂಡಂತೆ ಆಕೆಯ ಮಗನನ್ನು, ಕಾರನ್ನು ಯಾರೂ ಅಪಹರಣ ಮಾಡಿರಲಿಲ್ಲ. ಬದಲಿಗೆ ರಾತೋರಾತ್ರಿ ಎದ್ದ ಸುಪುತ್ರ ಕೀ ತೆಗೆದುಕೊಂಡು ಹೋಗಿ ಕಾರ್‌ ಸ್ಟಾರ್ಟ್‌ ಮಾಡಿ ಹೊರಟೇ ಬಿಟ್ಟಿದ್ದ. ಗಂಟೆಗೆ 140 ಕಿ.ಮೀ. ವೇಗದಲ್ಲಿ ಕಾರು ಚಲಾಯಿಸಿದ್ದ ಆತ ಮನೆಯಿಂದ ಸುಮಾರು 50 ಕಿ.ಮೀ. ದೂರಕ್ಕೆ ಬಂದಿದ್ದ. ಕೊನೆಗೆ ಆತನನ್ನು ಪೊಲೀಸರು ಡೋರ್ಟ್‌ಮಂಡ್‌ ಎಂಬಲ್ಲಿ ಪತ್ತೆ ಹಚ್ಚಿದರು. ಆ ಹೊತ್ತಿಗೆ ಆತ ಅಲ್ಲಿನ ಪಾರ್ಕಿಂಗ್‌ ಪ್ರದೇಶವೊಂದರಲ್ಲಿ ಕಾರು ನಿಲ್ಲಿಸಿದ್ದನಂತೆ.

ಕಾರು ಚಲಾಯಿಸಿದ್ದ ಪೋರನಿಂದಾಗಿ ಯಾರಿಗೂ ಏನೂ ಸಮಸ್ಯೆಯಾಗಲಿಲ್ಲವಂತೆ. ಸ್ವಲ್ಪ ದೂರ ಕಾರು ಡ್ರೈವ್‌ ಮಾಡೋಣ ಅಂತ ಅನ್ನಿಸಿ ಮನೆಯಿಂದ ಕಾರು ತೆಗೆದುಕೊಂಡು ಬಂದಿದ್ದೆ ಎಂದು ಆತ ಹೇಳಿದ್ದಾನೆ. ಆತನಿಗೆ ಗೋಕಾರ್ಟ್‌ ಕಾರು (ಸಣ್ಣ ನ್ಪೋಟ್ಸ್‌ ಕಾರು) ಚಾಲನೆ ಮಾಡಲು ತಿಳಿದಿದ್ದು, ಅದೇ ಅಭ್ಯಾಸದಿಂದ ದೊಡ್ಡ ಕಾರನ್ನು ಚಾಲನೆ ಮಾಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.