‘ವಿಡಿಯೋ ಗೇಮ್ಸ್ ಬಿಟ್ಟು ಓದಿನತ್ತ ಗಮನಹರಿಸು’ ಎಂದಿದ್ದಕ್ಕೆ ಆತ್ಮಹತ್ಯೆ ಮಾಡಿಕೊಂಡ ಬಾಲಕ

ಮುಂಬೈ: ವಿಡಿಯೋ ಗೇಮ್ಸ್ ಆಡಬೇಡವೆಂದ ತಾಯಿ ಮಾತಿಗೆ ಮನನೊಂದು 12 ವರ್ಷದ ಬಾಲಕನೋರ್ವ ಆತ್ಮಹತ್ಯೆ ಮಾಡಿಕೊಂಡ ಘಟನೆ ಮುಂಬಯಿನಲ್ಲಿ ನಡೆದಿದೆ.

ಜುಲೈ 20ರ ಸೋಮವಾರ ಮಧ್ಯಾಹ್ನದ ವೇಳಗೆ ಈ ಬಾಲಕ ಮೊಬೈಲ್ ಮೂಲಕ ವಿಡಿಯೋ ಗೇಮ್ ಆಡುತ್ತಿದ್ದು, ಇದನ್ನು ಗಮನಿಸಿದ ಆತನ ತಾಯಿ ಪೋನ್ ತೆಗೆದಿಟ್ಟು ಓದಿನ ಕಡೆ ಗಮನಹರಿಸು ಎಂದು ಸೂಚನೆ ನೀಡಿದ್ದರು.

ಇದರಿಂದ ಕುಪಿತಗೊಂಡ ಬಾಲಕ ಕೂಡಲೇ ತನ್ನ ಕೋಣೆಗೆ ತೆರಳಿ ಬಾಗಿಲು ಹಾಕಿಕೊಂಡಿದ್ದಾನೆ ಎನ್ನಲಾಗಿದೆ. ಆ ಬಳಿಕ ತುಂಬಾ ಹೊತ್ತಾದರೂ ಬಾಗಿಲು ತೆರೆಯದಿದ್ದನ್ನು ಗಮನಿಸಿದ ಪೋಷಕರು ಗಾಬರಿಗೊಂಡಿದ್ದಾರೆ.

ಬಳಿಕ ಡೋರ್ ಮುರಿದು ಕೋಣೆಗೆ ಪ್ರವೇಶಿಸಿದಾಗ 12 ವರ್ಷದ ಬಾಲಕ ಫ್ಯಾನ್ ಗೆ ನೇಣು ಬಿಗಿದಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವುದು ಗಮನಕ್ಕೆ ಬಂದಿದೆ.

ಕೂಡಲೇ ಹಾಸ್ಪತ್ರೆಗೆ ಸಾಗಿಸಲಾಯಿತಾದರು ಅಷ್ಟರಲ್ಲಾಗಲೇ ಬಾಲಕ ಮೃತಪಟ್ಟಿದ್ದ. ಈ ಬಗ್ಗೆ ಶಿವಾಜಿನಗರ ಪೊಲೀಸ್ ಠಾಣೆಯಲ್ಲಿ ಆಕಸ್ಮಿಕ ಸಾವಿನ ವರದಿ(ADR) ದಾಖಲಾಗಿದೆ.  ಮಾತ್ರವಲ್ಲದೆ ಬಾಲಕ ತಂದೆಯ ಹೇಳಿಕೆಯನ್ನು ಆಧರಿಸಿ ತನಿಖೆ ನಡೆಯುತ್ತಿದೆ.