11ರ ಬಾಲಕಿ ಮೇಲೆ ಎರಗಿದ್ದ 17 ರಾಕ್ಷಸರು

ಚೆನ್ನೈ: ಶ್ರವಣದೋಷವಿರುವ 11 ವರ್ಷದ ಬಾಲಕಿ ಮೇಲೆ ಸುಮಾರು 7 ತಿಂಗಳ ಕಾಲ 17 ಮಂದಿ ರಾಕ್ಷಸರು ಸಾಮೂಹಿಕ ಅತ್ಯಾಚಾರಗೈದಿರುವ ಅಮಾನವೀಯ ಘಟನೆಯೊಂದು ಚೆನ್ನೈನಲ್ಲಿ ಬೆಳಕಿಗೆ ಬಂದಿದೆ. ಪ್ರಕರಣ ಸಂಬಂಧ ಪೊಲೀಸರು ಮಂಗಳವಾರ 17 ಮಂದಿಯನ್ನು ಬಂಧಿಸಿದ್ದಾರೆ. ಬಾಲಕಿಯ ಮನೆಯಿರುವ ಅಪಾರ್ಟ್‌ಮೆಂಟ್‌ ಸಂಕೀರ್ಣದಲ್ಲೇ ಈ ಘಟನೆ ನಡೆದಿದೆ. ಸ್ವತಃ ಅಪಾರ್ಟ್‌ಮೆಂಟ್‌ನ ಲಿಫ್ಟ್ ಆಪರೇಟರ್‌, ಪ್ಲಂಬರ್‌, ಎಲೆಕ್ಟ್ರೀಷನ್‌ ಹಾಗೂ ಭದ್ರತಾ ಸಿಬ್ಬಂದಿಯೇ ಈ ಕುಕೃತ್ಯ ನಡೆಸಿದ್ದಾರೆ. 

ಅಪಾರ್ಟ್‌ಮೆಂಟ್‌ನಲ್ಲಿ ಕೆಲವು ಮನೆಗಳು ಖಾಲಿಯಿದ್ದು, ಬಾಲಕಿಯನ್ನು ಅಲ್ಲಿಗೆ ಹೊತ್ತೂಯ್ಯುತ್ತಿದ್ದ ಆರೋಪಿಗಳು ಆಕೆಗೆ ಮತ್ತುಬರುವ ಔಷಧ ಕುಡಿಸಿ, ಲೈಂಗಿಕ ಕಿರುಕುಳ ನೀಡುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. ಆರೋಪಿಗಳನ್ನು ಕೋರ್ಟ್‌ಗೆ ಹಾಜರುಪಡಿಸಲಾಗಿದ್ದು, ಜು.31ರವರೆಗೆ ನ್ಯಾಯಾಂಗ ವಶಕ್ಕೆ ನೀಡಿ ಕೋರ್ಟ್‌ ಆದೇಶ ಹೊರಡಿಸಿದೆ. ಇದೇ ವೇಳೆ, ಆರೋಪಿಗಳನ್ನು ನ್ಯಾಯಾಲಯಕ್ಕೆ ಕರೆತಂದಾಗ ವಕೀಲರ ಗುಂಪೊಂದು ಆರೋಪಿಗಳನ್ನು ಥಳಿಸಿದ ಘಟನೆಯೂ ನಡೆದಿದೆ. ಜತೆಗೆ, ಆರೋಪಿಗಳ ಪರ ವಕಾಲತ್ತು ವಹಿಸದೇ ಇರಲು ಮದ್ರಾಸ್‌ ಹೈಕೋರ್ಟ್‌ ವಕೀಲರ ಸಂಘ ನಿರ್ಧರಿಸಿದೆ.