ಉಡುಗೊರೆ ಆಮಿಷ: 1.35 ಲ.ರೂ. ವಂಚನೆ

ಮಂಗಳೂರು: ವ್ಯಕ್ತಿಯೋರ್ವರಿಗೆ ಚಿನ್ನ ಮತ್ತು ಡೈಮಂಡ್‌ ಉಡುಗೊರೆ ಕಳುಹಿಸಿ ಕೊಡುವುದಾಗಿ ಹೇಳಿ ಅನಂತರ ಅವರಿಂದ 1.35 ಲ.ರೂ.ಗಳನ್ನು ವರ್ಗಾವಣೆ ಮಾಡಿಸಿ ವಂಚಿಸಿದ ಬಗ್ಗೆ ಸೈಬರ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ವ್ಯಕ್ತಿಯೋರ್ವರಿಗೆ ಜ. 3ರಂದು ಫೇಸ್‌ಬುಕ್‌ ಖಾತೆಯ ಮೂಲಕ ರೇನಾಲ್ಟ್ ಫ್ರೀನ್ಸ್‌ ಕ್ರಿಸ್ಟಫ‌ರ್‌ ಪರಿಚಯವಾಗಿದ್ದ. ಫೇಸ್‌ಬುಕ್‌ನಲ್ಲೇ ಚಾಟಿಂಗ್‌ ಮಾಡುತ್ತಿದ್ದ ರೇನಾಲ್ಟ್ 35 ಲ.ರೂ. ಮೊತ್ತದ ಚಿನ್ನ ಹಾಗೂ ಡೈಮಂಡ್‌ ಉಡುಗೊರೆಯಾಗಿ ನಿಮಗೆ ಕಳುಹಿಸಿಕೊಡುವುದಾಗಿ ವ್ಯಕ್ತಿಯನ್ನು ನಂಬಿಸಿದ್ದ. ಜ. 18ರಂದು ಆ ವ್ಯಕ್ತಿಗೆ 8754231656 ಈ ಸಂಖ್ಯೆಯಿಂದ ಓರ್ವ ಮಹಿಳೆ ಕರೆ ಮಾಡಿ ತನ್ನನ್ನು ಹೊಸದಿಲ್ಲಿಯ ಕಸ್ಟಮ್‌ ಆಫೀಸರ್‌ ಎಂದು ಪರಿಚಯಿಸಿಕೊಂಡಿದ್ದಾಳೆ. ದಿಲ್ಲಿ ಏರ್‌ಪೋರ್ಟ್‌ಗೆ ಒಂದು ಪಾರ್ಸೆಲ್‌ ಬಂದಿದ್ದು, ಅದರ ಡೆಲಿವರಿ ಚಾರ್ಜ್‌ ಆಗಿ 30,000 ರೂ.ಗಳನ್ನು ವರ್ಗಾವಣೆ ಮಾಡುವಂತೆ ಹೇಳಿದ್ದಳು. ಜ. 20ರಂದು ಮತ್ತೆ ಮಹಿಳೆ ಆ ವ್ಯಕ್ತಿಗೆ ಕರೆ ಮಾಡಿ 1.5 ಲ.ರೂ.ಗಳನ್ನು ವಿವಿಧ ಹಂತಗಳಲ್ಲಿ ವಿವಿಧ ಬ್ಯಾಂಕ್‌ಗಳ ಖಾತೆಗೆ ವರ್ಗಾವಣೆ ಮಾಡಿಸಿಕೊಂಡಿದ್ದಾಳೆ. ಹೀಗೆ ಒಟ್ಟು 1.35 ಲ.ರೂ.ಗಳನ್ನು ಆಕೆಯ ಖಾತೆಗೆ ವರ್ಗಾವಣೆ ಮಾಡಿಸಿಕೊಂಡು ವಂಚಿಸಿದ್ದಾಳೆ ಎಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಲಾಗಿದೆ.