ಬೆಂಗಳೂರು: ಚಾಮರಾಜಪೇಟೆ ವಿಧಾನಸಭಾ ಕ್ಷೇತ್ರದಲ್ಲಿ ಜೆಡಿಎಸ್‌ ಟಿಕೆಟ್‌ ವಂಚಿತ, ಪಾಲಿಕೆ ಸದಸ್ಯ ಇಮ್ರಾನ್‌ ಪಾಷಾ ಇದೀಗ ಬಹಿರಂಗವಾಗಿ ಕಾಂಗ್ರೆಸ್‌ ಅಭ್ಯರ್ಥಿ ಜಮೀರ್‌ ಆಹಮದ್‌ ಖಾನ್‌ ಅವರ ಬೆಂಬಲಕ್ಕೆ ನಿಂತಿದ್ದಾರೆ. ಅಷ್ಟೇ ಅಲ್ಲ, ಅವರ ಕುಟುಂಬ ಸದಸ್ಯರೆಲ್ಲರೂ ಜಮೀರ್‌ ಪರ ಕೆಲಸ ಮಾಡಲು ಮುಂದಾಗಿದ್ದಾರೆ.
ಇದಲ್ಲದೆ, ಜಮೀರ್‌ ಅಹಮದ್‌ ಅವರಿಗೆ ಒಳಿತಾಗಬೇಕು ಎಂದು ಹಾರೈಸಿ ಇಮ್ರಾನ್‌ ಪಾಷಾ ಕುಟುಂಬ ಗುರುವಾರ ರಾತ್ರಿ ತಮ್ಮ ಮನೆಯಲ್ಲಿ ಕುರಾನ್‌ ಖಾನಿ ಪ್ರಾರ್ಥನೆ ಇಟ್ಟುಕೊಂಡಿದ್ದರು. ಮುಸ್ಲಿಂ ಸಮುದಾಯದಲ್ಲಿ ಯಾರಿಗಾದರೂ ಒಳಿತಾಗಬೇಕು ಎಂದು ಪ್ರಾರ್ಥಿಸಿ ಸಾಮೂಹಿಕ ಕುರಾನ್‌ ಪಠಣ ಮಾಡುವ (ಕುರಾನ್‌ ಖಾನಿ) ಸಂಪ್ರದಾಯವಿದೆ. ಅದರಂತೆ ಜಮೀರ್‌ ಅಹಮದ್‌ ಪರ ಕುರಾನ್‌ ಕಾನಿ ಪ್ರಾರ್ಥನೆ ಏರ್ಪಾಟು ಮಾಡಲಾಗಿತ್ತು.
ಇದರಿಂದಾಗಿ ಜಮೀರ್‌ ಅಹದ್‌ಗೆ ತಿರುಗೇಟು ನೀಡಲು ಮುಂದಾಗಿದ್ದ ಜೆಡಿಎಸ್‌ಗೆ ಕ್ಷೇತ್ರದಲ್ಲಿ ತೀವ್ರ ಹಿನ್ನಡೆಯಾದಂತಾಗಿದೆ. ಚಾಮರಾಜಪೇಟೆ ಕ್ಷೇತ್ರದ ಜೆಡಿಎಸ್‌ ಶಾಸಕರಾಗಿದ್ದ ಜಮೀರ್‌ ಅಹಮದ್‌ ಕಾಂಗ್ರೆಸ್‌ ಸೇರುವ ಯೋಚನೆ ಮಾಡಿದಾಗಿನಿಂದ ಇಮ್ರಾನ್‌ ಪಾಷಾ ಕ್ಷೇತ್ರದಿಂದ ಜೆಡಿಎಸ್‌ ಟಿಕೆಟ್‌ ಬಯಸಿ ಕೆಲಸ ಆರಂಭಿಸಿದ್ದರು. ಆದರೆ, ಕಾಂಗ್ರೆಸ್‌ ತೊರೆದ ಬಂದ ಅಲ್ತಾಫ್ ಖಾನ್‌ರನ್ನು ಜೆಡಿಎಸ್‌ಗೆ ಕರೆತಂದು ಚಾಮರಾಜಪೇಟೆ ಟಿಕೆಟ್‌ ನೀಡಲಾಗಿತ್ತು.
ಇದರಿಂದ ಇಮ್ರಾನ್‌ ಪಾಷಾ ಅಸಮಾಧಾನಗೊಂಡಿದ್ದರು. ಅಲ್ತಾಫ್ ಖಾನ್‌ ಕಾಂಗ್ರೆಸ್‌ನಲ್ಲಿರುವಾಗ ತಮ್ಮ ವಿರುದ್ಧ ಕ್ರಿಮಿನಲ್‌ ಪ್ರಕರಣ ದಾಖಲಿಸಿದ್ದರು. ಅಂಥವರನ್ನು ಕರೆಸಿ ಟಿಕೆಟ್‌ ನೀಡಿದ್ದರಿಂದ ಯಾವುದೇ ಕಾರಣಕ್ಕೂ ಅಲ್ತಾಫ್ ಖಾನ್‌ ಬೆಂಬಲಿಸಲು ಸಾಧ್ಯವಿಲ್ಲ ಎಂದು ಹೇಳಿರುವ ಇಮ್ರಾನ್‌ ಪಾಷಾ ಬಹಿರಂಗವಾಗಿಯೇ ಕಾಂಗ್ರೆಸ್‌ನ ಜಮೀರ್‌ ಅಹಮದ್‌ಗೆ ಬೆಂಬಲ ಸೂಚಿಸಿದ್ದಾರೆ. ಇದಲ್ಲದೆ, ಇಮ್ರಾನ್‌ ಪಾಷಾ ತಂದೆ ಆರಿಫ್ ಪಾಷಾ ಸೇರಿ ಇಡೀ ಕುಟುಂಬ ಜಮೀರ್‌ ಅಹಮದ್‌ ಅವರನ್ನು ಬೆಂಬಲಿಸಲು ನಿರ್ಧರಿಸಿದೆ.
