ಸಾವಿನ ಬಳಿಕವೂ ಜಗವ ನೋಡುವ ಅಶ್ವಿ‌ನ್‌ ದಾಂತಿಸ್‌ ನೇತ್ರಗಳು 

ಮೂಡಬಿದಿರೆ: ವಿಕಲಾಂಗ ಯುವಕನೋರ್ವ ನೇತ್ರದಾನದ ಮೂಲಕ ತನ್ನ ಸಾವಿನ ಬಳಿಕವೂ ಅನ್ಯರ ಬದುಕಿಗೆ ಬೆಳಕಾಗಿದ್ದಾನೆ. ಇಲ್ಲಿನ ಅಮರಶ್ರೀ ಟಾಕೀಸ್‌ ಬಳಿ ಮೆಂಡಿಸ್‌ ಸೆಂಟರ್‌ ನಿವಾಸಿ ಆಲಿಸ್‌ ದಾಂತಿಸ್‌ ಅವರ ಪುತ್ರ ಅಶ್ವಿ‌ನ್‌ ದಾಂತಿಸ್‌ (18) ಅವರನ್ನು ತಾಯಿ ಮತ್ತು ಸಹೋದರಿ ನಿತ್ಯವೂ ಗಾಲಿ ಕುರ್ಚಿಯ ಮೂಲಕ ಸಂಜೆಯ ವೇಳೆಗೆ ಪೇಟೆಯಲ್ಲಿ ವಾಯುವಿಹಾರಕ್ಕೆ ಕರೆತರುತ್ತಿದ್ದರು. ನಿತ್ಯ ಕಾಣಿಸುವ ಈ ದೃಶ್ಯದಿಂದಾಗಿ ವಿಕಲಾಂಗ ಅಶ್ವಿ‌ನ್‌ ಈ ಪರಿಸರದಲ್ಲಿ ಚಿರಪರಿಚಿತರಾಗಿದ್ದರು. ಅಶ್ವಿ‌ನ್‌ ದಾಂತಿಸ್‌ ಅಲ್ಪಕಾಲದ ಅಸೌಖ್ಯದಿಂದ ಬುಧವಾರ ನಿಧನ ಹೊಂದಿದ್ದು, ಅವರ ನೇತ್ರಗಳನ್ನು ಮನೆಯವರು ಉಡುಪಿಯ ನೇತ್ರತಜ್ಞರಿಗೆ ಹಸ್ತಾಂತರಿಸಿದ್ದಾರೆ.