ಚಂದಾಪುರ: ಚಂದಾಪುರದ ಸೂರ್ಯ ನಗರ ಠಾಣೆ ವ್ಯಾಪ್ತಿಯ ಹೆಡ್‌ಮಾಸ್ಟರ್‌ ಲೇಔಟ್‌ನಲ್ಲಿ ವಿವಸ್ತ್ರವಾದ ಸ್ಥಿತಿ ಯಲ್ಲಿ ಅಪರಿಚಿತ ಯುವತಿಯ ಕೊಳೆತ ಶವ ಪತ್ತೆಯಾಗಿದೆ.
ಮನೆಯಲ್ಲಿ ಯಾರೂ ಇಲ್ಲದ್ದನ್ನು ಕಂಡು ಭಾನುವಾರ ಸಂಜೆ ಮನೆ ಮಾಲೀಕ ಸ್ಥಳಕ್ಕೆ ತೆರಳಿದ್ದು, ದುರ್ವಾಸನೆ ಬರುತ್ತಿದ್ದರಿಂದ ಬಾಗಿಲು ತೆರೆದು ನೋಡಿದಾಗ ಯುವತಿ ಮೈ ಮೇಲೆ ಬಟ್ಟೆ ಇಲ್ಲದೆ ಕೊಳೆತ ಸ್ಥಿತಿಯಲ್ಲಿ ಶವ ಕಂಡಿದೆ. ಕೂಡಲೇ ಸೂರ್ಯನಗರ ಪೊಲೀಸರಿಗೆ ಮಾಹಿತಿ ನೀಡಿದರು.
ಸ್ಥಳಕ್ಕೆ ಬಂದ ಪೊಲೀಸರು, ಎಫ್ಎಸ್‌ಎಲ್‌ ತಂಡದ ನೆರವಿನೊಂದಿಗೆ ಸಾಕ್ಷ್ಯ ಕಲೆಹಾಕಿದ್ದಾರೆ. ಶವವನ್ನು ಅತ್ತಿಬೆಲೆಯ ಆಕ್ಸ್ಫರ್ಡ್‌ ಆಸ್ಪತ್ರೆಗೆ ರವಾನೆ ಮಾಡಿದ್ದು, ತಲೆ ಮರೆಸಿಕೊಂಡಿರುವ ಇಬ್ಬರ ಬಂಧನಕ್ಕೆ ಬಲೆ ಬೀಸಿದ್ದಾರೆ.
ಯುವತಿ ಕೊಲೆಯಾದ ಮನೆ ಬಳಿ ಎಫ್.ಎಸ್‌.ಎಲ್.ತಂಡ ಪರಿಶೀಲನೆ ನಡೆಸಿದೆ. ಕೃತ್ಯ ನಡೆದ ಸ್ಥಳದ ಸಮೀಪದಲ್ಲಿ ನೆಲೆಸಿದ್ದ ಇಬ್ಬರು ವ್ಯಕ್ತಿಗಳ ಮೊಬೈಲ್‌ ಸ್ವಿಚ್ಡ್ ಆಫ್ ಆಗಿದೆ. ಇಬ್ಬರು ಸೇರಿ ಅತ್ಯಾಚಾರ ಎಸಗಿ ಕೊಲೆ ಮಾಡಿ, ಪರಾರಿಯಾಗಿರುವ ಸಾಧ್ಯತೆ ಇದೆ ಎಂದು ಶಂಕಿಸಲಾಗಿದೆ. ಇವರಿಗೆ ಮನೆ ಮಾಲೀಕರು ದಾಖಲೆ ಪಡೆಯದೆ ಬಾಡಿಗೆಗೆ ನೀಡಿದ್ದರು.
ಶವದ ಪಕ್ಕವೇ ಸಿಕ್ಕ ಇಂಜೆಕ್ಷನ್‌ ಟ್ಯೂಬ್‌: ಯುವತಿ ಶವದ ಪಕ್ಕದಲ್ಲಿ ಇಂಜೆಕ್ಷನ್‌ ಟ್ಯೂಬ್‌ ಸಿಕ್ಕಿದ್ದು, ಮಾದಕ ವಸ್ತು ಇರುವ ಚಚ್ಚುಮದ್ದು ನೀಡಿ ಯುವತಿ ಮೇಲೆ ಅತ್ಯಾಚಾರ ನಡೆಸಿ ಬಳಿಕ ಕೊಲೆ ಮಾಡಿ ಇಬ್ಬರೂ ಪರಾರಿ ಆಗಿರುವ ಸಾಧ್ಯತೆ ಇದೆ ಎಂದು ಶಂಕೆ ವ್ಯಕ್ತವಾಗಿದೆ.
