ಯೆಮೆನ್‌ ಮಸೀದಿಗೆ ಕ್ಷಿಪಣಿ ದಾಳಿ: 80 ಸೈನಿಕರ ಸಾವು

ದುಬೈ: ಯೆಮೆನ್‌ನ ಮಸೀದಿಯೊಂದರ ಮೇಲೆ ಹುತಿ ಬಂಡುಕೋರರು ನಡೆಸಿದ ಕ್ಷಿಪಣಿ ಹಾಗೂ ಡ್ರೋನ್‌ ದಾಳಿಯಲ್ಲಿ 80ಕ್ಕೂ ಅಧಿಕ ಯೋಧರು ಮೃತಪಟ್ಟಿದ್ದಾರೆ.

ಇರಾನ್‌ ಬೆಂಬಲಿತ ಹುತಿ ಬಂಡುಕೋರರು ಮತ್ತು ಯೆಮೆನ್‌ ಸರ್ಕಾರದ ನಡುವಿನ ಯುದ್ಧಕ್ಕೆ ಅಲ್ಪವಿರಾಮ ಬಿದ್ದ ಒಂದು ತಿಂಗಳಲ್ಲೇ ಈ ದಾಳಿ ನಡೆದಿದೆ. ಮರೀಬ್‌ನ ಕೇಂದ್ರ ಪ್ರಾಂತ್ಯದ ಸೇನಾ ಶಿಬಿರದಲ್ಲಿರುವ ಮಸೀದಿಯ ಮೇಲೆ ಕ್ಷಿಪಣಿ ಮತ್ತು ಡ್ರೋನ್‌ ಮೂಲಕ ದಾಳಿ ನಡೆಸಲಾಗಿದೆ.

ಮಸೀದಿಯಲ್ಲಿ ಸಂಜೆಯ ಪ್ರಾರ್ಥನೆ ನಡೆಯುತ್ತಿದ್ದ ಸಮಯದಲ್ಲೇ ಈ ಕೃತ್ಯ ನಡೆದ ಕಾರಣ, 80ಕ್ಕೂ ಅಧಿಕ ಯೆಮೆನ್‌ ಯೋಧರು ಸಾವಿಗೀಡಾಗಿ, 148 ಮಂದಿ ಗಾಯಗೊಂಡಿದ್ದಾರೆ ಎಂದು ಸೇನಾ ಮೂಲಗಳು ತಿಳಿಸಿವೆ.