WPL; ಆರ್‌ಸಿಬಿಗೆ ಮತ್ತೊಂದು ಸೋಲಿನ ಶಾಕ್: ಅಗ್ರಸ್ಥಾನಕ್ಕೇರಿದ ಮುಂಬೈ

ಬೆಂಗಳೂರು: ಸರ್ವಾಂಗೀಣ ಪ್ರದರ್ಶನ ನೀಡಿದ ಹಾಲಿ ಚಾಂಪಿಯನ್‌ ಮುಂಬೈ ಇಂಡಿಯನ್ಸ್‌ ಶನಿವಾರದ ಡಬ್ಲ್ಯುಪಿಎಲ್‌ ಪಂದ್ಯದಲ್ಲಿ ಆರ್‌ಸಿಬಿಯನ್ನು 7 ವಿಕೆಟ್‌ಗಳಿಂದ ಮಣಿಸಿ ಅಗ್ರಸ್ಥಾನಕ್ಕೇರಿತು.

ಆರ್‌ಸಿಬಿ 6 ವಿಕೆಟಿಗೆ 131 ರನ್‌ ಗಳಿಸಿದರೆ, ಮುಂಬೈ 15.1 ಓವರ್‌ಗಳಲ್ಲಿ 3 ವಿಕೆಟಿಗೆ 133 ರನ್‌ ಬಾರಿಸಿತು. ಇದು ಮುಂಬೈಗೆ 4 ಪಂದ್ಯಗಳಲ್ಲಿ ಒಲಿದ 3ನೇ ಜಯ. ಆರ್‌ಸಿಬಿ 4 ಪಂದ್ಯಗಳಲ್ಲಿ ಸತತ 2ನೇ ಸೋಲನುಭವಿಸಿತು.
ಆತಿಥೇಯರನ್ನು ನಿಯಂತ್ರಿಸಲು ಮುಂಬೈ 7 ಮಂದಿಯನ್ನು ದಾಳಿಗಿಳಿಸಿ ಯಶಸ್ಸು ಸಾಧಿಸಿತು. 6ನೇ ವಿಕೆಟಿಗೆ ಜತೆಗೂಡಿದ ಎಲ್ಲಿಸ್‌ ಪೆರ್ರಿ (ಔಟಾಗದೆ 44) ಮತ್ತು ಜಾರ್ಜಿಯಾ ವೇರ್‌ಹ್ಯಾಮ್‌ (27) 40 ಎಸೆತಗಳಿಂದ 52 ರನ್‌ ಒಟ್ಟುಗೂಡಿಸಿದ್ದರಿಂದ ಸ್ಕೋರ್‌ 130ರ ಗಡಿ ದಾಟಿತು.

ಆರ್‌ಸಿಬಿ ಪವರ್‌ ಪ್ಲೇ ಒಳಗಾಗಿ 3 ವಿಕೆಟ್‌ ಕಳೆದುಕೊಂಡಿತು. ನಾಯಕಿ ಸ್ಮತಿ ಮಂಧನಾ (9), ಸೋಫಿ ಡಿವೈನ್‌ (9), ಎಸ್‌. ಮೇಘನಾ (11) ಪೆವಿಲಿಯನ್‌ ಸೇರಿಕೊಂಡರು. ರಿಚಾ ಘೋಷ್‌ ಗಳಿಕೆ 7 ರನ್‌ ಮಾತ್ರ.
ಮುಂಬೈಗೆ ಯಾಸ್ತಿಕಾ ಭಾಟಿಯಾ (31)-ಹ್ಯಾಲಿ ಮ್ಯಾಥ್ಯೂಸ್‌ (26) ಜೋಡಿಯಿಂದ ಅಮೋಘ ಆರಂಭ ಲಭಿಸಿತು. 3.5 ಓವರ್‌ಗಳಿಂದ 45 ರನ್‌ ಒಟ್ಟುಗೂಡಿತು. ನಾಯಕಿ ನ್ಯಾಟ್‌ ಸ್ಕಿವರ್‌ ಬ್ರಂಟ್‌ 27, ಅಮೇಲಿಯಾ ಕೆರ್‌ ಔಟಾಗದೆ 40 ರನ್‌ ಮಾಡಿ ಬಹಳ ಬೇಗನೇ ಗೆಲುವು ಸಾರಿದರು.