ವಿಶ್ವ ಆ್ಯತ್ಲೆಟಿಕ್ಸ್‌: 11ನೇ ಸ್ಥಾನಕ್ಕೆ ಕುಸಿದ ಅವಿನಾಶ್‌ ಸಬ್ಲೆ

ಯೂಜೀನ್‌ (ಯುಎಸ್‌ಎ): ಭಾರತದ ಅವಿನಾಶ್‌ ಸಬ್ಲೆ ವಿಶ್ವ ಆ್ಯತ್ಲೆಟಿಕ್ಸ್‌ ಚಾಂಪಿಯನ್‌ಶಿಪ್‌ 3,000 ಮೀ. ಸ್ಟೀಪಲ್‌ಚೇಸ್‌ನಲ್ಲಿ ನಿರಾಶಾದಾಯಕ ಪ್ರದರ್ಶನ ನೀಡಿ ಕೂಟದಿಂದ ನಿರ್ಗಮಿಸಿದರು.
ಫೈನಲ್‌ನಲ್ಲಿ ಅವರು 11ನೇ ಸ್ಥಾನಿಯಾದರು.

27 ವರ್ಷದ ಅವಿನಾಶ್‌ ಸಬ್ಲೆ 8:31.75 ಸೆಕೆಂಡ್ಸ್‌ನಲ್ಲಿ ಸ್ಪರ್ಧೆ ಮುಗಿಸಿದರು. ಇದು ಅವರ ವೈಯಕ್ತಿಕ ಶ್ರೇಷ್ಠ ನಿರ್ಹಹಣೆಗಿಂತಲೂ ಕಳಪೆ ಸಾಧನೆಯಾಗಿದೆ (8:12.48 ಸೆಕೆಂಡ್ಸ್‌).

ಅರ್ಹತಾ ಸುತ್ತಿನಲ್ಲಿ ಸಬ್ಲೆ ಹೀಟ್‌ ನಂ.3ಯಲ್ಲಿ 3ನೇ ಹಾಗೂ ಒಟ್ಟಾರೆ 7ನೇ ಸ್ಥಾನಿಯಾಗಿ ಸ್ಪರ್ಧೆ ಮುಗಿಸಿದ್ದರು (8.18.75). ದೋಹಾದಲ್ಲಿ ನಡೆದ 2019ರ ವಿಶ್ವ ಆ್ಯತ್ಲೆಟಿಕ್ಸ್‌ ಕೂಟದಲ್ಲಿ ಸಬ್ಲೆ 13ನೇ ಸ್ಥಾನಿಯಾಗಿದ್ದರು.

ಇದು ವಿಶ್ವ ಆ್ಯತ್ಲೆಟಿಕ್ಸ್‌ನ ಅತ್ಯಂತ ನಿಧಾನ ಗತಿಯ ಫೈನಲ್‌ ಎನಿಸಿಕೊಂಡಿತು. ಪದಕ ಗೆದ್ದ ಮೂವರೂ ತಮ್ಮ ಶ್ರೇಷ್ಠ ವೈಯಕ್ತಿಕ ನಿರ್ವಹಣೆಗಿಂತಲೂ ಹೆಚ್ಚಿನ ಸಮಯ ತೆಗೆದುಕೊಂಡರು.

ಚಿನ್ನ ಗೆದ್ದ ಎಲ್‌ ಬಕ್ಕಲಿ
ಮೊರೊಕ್ಕೋದ ಒಲಿಂಪಿಕ್‌ ಚಾಂಪಿಯನ್‌ ಸೌಫಿಯೇನ್‌ ಎಲ್‌ ಬಕ್ಕಲಿ 8:25.13 ಸೆಕೆಂಡ್‌ಗಳಲ್ಲಿ ದೂರ ಕ್ರಮಿಸಿ ಚಿನ್ನ ಗೆದ್ದರು. ಇವರ ಶ್ರೇಷ್ಠ ನಿರ್ವಹಣೆ 7:58.28 ಸೆಕೆಂಡ್ಸ್‌ ಎಂಬುದು ಉಲ್ಲೇಖನೀಯ. ಇಥಿಯೋಪಿಯಾದ ಲಮೇಖ ಗಿರ್ಮ ಬೆಳ್ಳಿ ಗೆದ್ದರು (8:26.01). ಟೋಕಿಯೊ ಒಲಿಂಪಿಕ್ಸ್‌ ಹಾಗೂ ಕಳೆದ ವಿಶ್ವ ಚಾಂಪಿಯನ್‌ಶಿಪ್‌ ಗಳೆರಡರಲ್ಲೂ ಬೆಳ್ಳಿ ಜಯಿಸಿದ್ದ ಇವರ ಶ್ರೇಷ್ಠ ಸಾಧನೆ 7:58.68 ಸೆಕೆಂಡ್ಸ್‌ ಆಗಿದೆ. ಕೀನ್ಯಾದ ಹಾಲಿ ಚಾಂಪಿಯನ್‌ ಕಾನ್ಸೆಲ್ಸಸ್‌ ಕಿಪ್ರುಟೊ 8:01.35 ಸೆಕೆಂಡ್‌ಗಳ ಸಾಧನೆಯೊಂದಿಗೆ ಕಂಚು ಜಯಿಸಿದರು.