Women’s Tennis: ಒಸ್ಮಾನಿಯ ವಿವಿಗೆ ಪ್ರಶಸ್ತಿ

ಮಣಿಪಾಲ: ಮಾಹೆ ವಿವಿಯ ಆಯೋಜನೆಯಲ್ಲಿ ನಡೆದ ಅಂತರ್‌ ವಿವಿ ಮಟ್ಟದ ದಕ್ಷಿಣ ವಲಯ ಮಹಿಳಾ ಟೆನಿಸ್‌ ಫೈನಲ್‌ನಲ್ಲಿ ಹೈದರಾಬಾದ್‌ನ ಒಸ್ಮಾನಿಯ ವಿ.ವಿ. ತಂಡ ಮದ್ರಾಸ್‌ ವಿವಿ ತಂಡವನ್ನು 2-0 ಅಂತರದಲ್ಲಿ ಸೋಲಿಸಿ ಪ್ರಶಸ್ತಿ ಜಯಿಸಿದೆ.

ಚೆನ್ನೈನ ಎಸ್‌ಆರ್‌ಎಂ ಐಎನ್‌ಎಸ್‌ ತಂಡ 3ನೇ ಹಾಗೂ ತಮಿಳುನಾಡಿನ ಅಣ್ಣಾ ವಿವಿ ತಂಡ 4ನೇ ಸ್ಥಾನ ಪಡೆದಿದೆ. ಈ 4 ತಂಡಗಳು ಸೇರಿದಂತೆ ಅಖೀಲ ಭಾರತ ಮಟ್ಟದ ಅಂತರ್‌ ವಿವಿ ಮಹಿಳಾ ಟೆನಿಸ್‌ ಪಂದ್ಯಾಟ ಡಿ. 13ರಿಂದ 16ರ ವರೆಗೆ ಮಾಹೆ ವಿವಿಯಲ್ಲೇ ನಡೆಯ ಲಿದೆ. 4 ವಲಯದ ತಲಾ 4 ತಂಡಗಳಂತೆ 16 ತಂಡಗಳ ನಡುವೆ ಸೆಣಸಾಟ ನಡೆಯಲಿದೆ.

ಮಾಹೆ ವಿವಿ ಸಹ ಕುಲಪತಿ ಡಾ| ನಾರಾಯಣ ಸಭಾಹಿತ್‌ ಅವರು ವಿಜೇತರಿಗೆ ಬಹುಮಾತ ವಿತರಿಸಿದರು. ಮಾಹೆ ಕ್ರೀಡಾ ಕೌನ್ಸಿಲ್‌ ಕಾರ್ಯದರ್ಶಿ ಡಾ| ವಿನೋದ್‌ ನಾಯಕ್‌, ದೈಹಿಕ ಶಿಕ್ಷಣ ನಿರ್ದೇಶಕ ಡಾ| ದೀಪಕ್‌ ರಾಮ್‌ ಬಾಯರಿ, ಕೂಟದ ಆಯೋಜನ ಕಾರ್ಯದರ್ಶಿ ಉಪೇಂದ್ರ ನಾಯಕ್‌, ವಿವಿ ಅಧಿಕಾರಿಗಳು, ತರಬೇತುದಾರರು, ತೀರ್ಪುಗಾರರು ಉಪಸ್ಥಿತರಿದ್ದರು.