ಮಣಿಪಾಲ ವಿಷ ಪತ್ತೆ ಕೇಂದ್ರಕ್ಕೆ ಡಬ್ಲ್ಯೂಎಚ್ಒ ಮಾನ್ಯತೆ

ಉಡುಪಿ: ಮಣಿಪಾಲ ಮಾಹೆಯ ‘ಮಣಿಪಾಲ ವಿಷ ಪತ್ತೆ ಕೇಂದ್ರ’ಕ್ಕೆ ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯೂಎಚ್ಒ) ಮಾನ್ಯತೆ ನೀಡಿದೆ.

ಮಣಿಪಾಲದ ಈ ಕೇಂದ್ರವು ವಿಷ ಸಂಬಂಧಿ ತೊಂದರೆಗಳ ತಡೆಯುವಿಕೆ, ಚಿಕಿತ್ಸೆ ಮತ್ತು ನಿರ್ವಹಣೆಗಾಗಿ ನಡೆಸುತ್ತಿರುವ ಕಾರ್ಯವನ್ನು ಗಮನಿಸಿ ಈ ಮಾನ್ಯತೆ ನೀಡಲಾಗಿದೆ. 2015ರ ಮಾ. 20ರಂದು ಆರಂಭಗೊಂಡ ಈ ಕೇಂದ್ರವು ಕರ್ನಾಟಕ, ಕೇರಳ, ಆಂಧ್ರಪ್ರದೇಶ ರಾಜ್ಯಗಳ ವಿಷಕ್ಕೆ ಸಂಬಂಧಿಸಿದ ಪ್ರಕರಣಗಳನ್ನು ನಿರಂತರವಾಗಿ ನಿಭಾಯಿಸುತ್ತಿದೆ. ಇದು ಟಾಕ್ಸಿಕಾಲಜಿ ಲ್ಯಾಬೊರೇಟರಿ ಮತ್ತು ಕ್ಲಿನಿಕಲ್ ಟ್ರೀಟ್ಮೆಂಟ್ ಯುನಿಟ್‌ಗಳನ್ನು ಕೂಡ ಹೊಂದಿದೆ.

ವಿಶ್ವ ಆರೋಗ್ಯ ಸಂಸ್ಥೆಯು ಮಾನ್ಯತೆ ನೀಡಿದ ಬಳಿಕ ಮಣಿಪಾಲದ ವಿಷ ಪತ್ತೆ ಕೇಂದ್ರವನ್ನು ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿರುವ ವಿಶ್ವ ವಿಷ ಪತ್ತೆ ಕೇಂದ್ರಗಳ ಡೈರೆಕ್ಟರಿಯಲ್ಲಿ ಸೇರಿಸಿಕೊಂಡಿದೆ. ಇದರ ಸ್ಮರಣಾರ್ಥ ಮಾಹೆಯಲ್ಲಿ ನಾಮಫ‌ಲಕವನ್ನು ಮಾಹೆ ಕುಲಪತಿ ಡಾ| ಎಚ್. ವಿನೋದ್‌ ಭಟ್ ಅನಾವರಣಗೊಳಿಸಿದರು. ಡೀನ್‌ ಡಾ| ಪ್ರಜ್ಞಾ ರಾವ್‌ ಉಪಸ್ಥಿತರಿದ್ದರು.