ಎಲ್ಲಾ ಅಸಮಾನತೆಯನ್ನು ವಿರೋಧಿಸಬೇಕು : ಚೇತನ್ ಮತ್ತೊಂದು ಟ್ವೀಟ್

ಬೆಂಗಳೂರು : ‘ಕಾಂತಾರ’ ಚಿತ್ರದ ಕುರಿತು ‘ಭೂತಕೋಲ ಹಿಂದೂ ಸಂಸ್ಕೃತಿ ಅಲ್ಲ’ ಎಂದಿದ್ದ ನಟ ಚೇತನ್ ಅಹಿಂಸಾ ಮತ್ತೊಂದು ಟ್ವೀಟ್ ಮಾಡಿ ಚರ್ಚೆಯನ್ನು ಇನ್ನಷ್ಟು ಬೆಳೆಸುವಂತೆ ಮಾಡಿದ್ದಾರೆ.

”ಭಾರತವು ವೈವಿಧ್ಯಮಯ, ರೋಮಾಂಚಕ ಸಾಂಸ್ಕೃತಿಕ/ಧಾರ್ಮಿಕ ಸಂಪ್ರದಾಯಗಳನ್ನು ಹೊಂದಿದೆ. ನಮ್ಮ ಆದಿವಾಸಿ/ಅಲೆಮಾರಿ ಮೂಲನಿವಾಸಿ ವಿಶ್ವಗಳನ್ನು ಸಂರಕ್ಷಿಸಲು ಮತ್ತು ಗುರುತಿಸಲು ಆಂದೋಲನ ನಡೆಯುತ್ತಿದೆ. ‘ಆಮದು ಮಾಡಿಕೊಂಡ’ ಧರ್ಮಗಳು ಹಿಂದೂ ಧರ್ಮ, ಕ್ರಿಶ್ಚಿಯನ್ ಮತ್ತು ಇಸ್ಲಾಂ ಇತರ ಎಲ್ಲ ಧರ್ಮಗಳಂತೆ ಸಹ ಅವಿಭಾಜ್ಯವಾಗಿವೆ. ನಾವು ಎಲ್ಲಾ ಅಸಮಾನತೆಯನ್ನು ವಿರೋಧಿಸಬೇಕು” ಎಂದು ಟ್ವೀಟ್ ಮಾಡಿದ್ದಾರೆ.

‘ಆರ್ಯನ್ ಧರ್ಮವಾಗಿರುವ ಹಿಂದೂ ಧರ್ಮ ಭಾರತದ ಮೂಲ ಧರ್ಮವಲ್ಲ’ ‘ಹಿಂದಿ ಹೇರುವುದು ಹೇಗೆ ತಪ್ಪೋ, ಹಿಂದೂ ಧರ್ಮವನ್ನು ಹೇರುವುದು ಕೂಡ ತಪ್ಪು’ ಎಂದು ಅವರು ಇನ್ನೊಂದು ಟ್ವೀಟ್ ಮಾಡಿದ್ದಾರೆ.

ಚೇತನ್ ಅವರ ಅಭಿಪ್ರಾಯವನ್ನು ಕೆಲವರು ಬೆಂಬಲಿಸಿದ್ದರೆ, ಕರಾವಳಿ ಸೇರಿ ಹಿಂದೂ ಪರ ಸಂಘಟನೆಗಳಿಂದ, ದೈವಾರಾಧಕರಿಂದ ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ.