ನಗರದ ವಿವಿಧೆಡೆ 40 ಮನೆಗಳಿಗೆ ನುಗ್ಗಿದ ನೀರು

ಬೆಂಗಳೂರು: ಬೇಸಿಗೆ ಆರಂಭದಲ್ಲೇ ಮಳೆ ಅವಾಂತರ ಸೃಷ್ಟಿಸಿದೆ. ಶುಕ್ರವಾರ ಸುರಿದ ಮಳೆಗೆ ನಗರದ ಹತ್ತು ಕಡೆ ಸುಮಾರು 40 ಮನೆಗಳಿಗೆ ನೀರು ನುಗ್ಗಿದ್ದು, ಹತ್ತಕ್ಕೂ ಹೆಚ್ಚು ಮರಗಳು, ವಿದ್ಯುತ್‌ ಕಂಬಗಳು ನೆಲಕಚ್ಚಿವೆ. ಈ ನಡುವೆ ವಾರಾಂತ್ರಯವೂ ಮಳೆ ಬೀಳುವ ಸಾರ್ಧಯತೆ ಯಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಗಾಯತ್ರಿ ನಗರ, ಶಂಕರಮಠ, ಕೋಡಿಚಿಕ್ಕನಹಳ್ಳಿ, ಹೊಸಕೆರೆಹಳ್ಳಿ ಸೇರಿದಂತೆ ನಗರದ ಪ್ರತ್ಯೇಕ ಹತ್ತು ಸ್ಥಳಗಳಲ್ಲಿ ಸುಮಾರು 40 ಮನೆಗಳಿಗೆ ನೀರು ನುಗ್ಗಿದ್ದು, ಜನ ಜಾಗರಣೆ ಮಾಡುವಂತಾಯಿತು. ಗಾಯತ್ರಿನಗರದ ನಾಗಪ್ಪಬ್ಲಾಕ್‌ನಲ್ಲಿ ರಸ್ತೆಯಲ್ಲೇ ಹಾದುಹೋಗಿರುವ ಮ್ಯಾನ್‌ಹೋಲ್‌ ತುಂಬಿ ಹರಿದು ಸುಮಾರು ಐದು ಮನೆಗಳು ಜಲಾವೃತಗೊಂಡವು. ಸ್ಥಳೀಯ ನಿವಾಸಿಗಳು ಪಂಪ್‌ಗ್ಳನ್ನು ಬಳಸಿ ನೀರ ಹೊರಹಾಕಿದರು. ಈ ಮಧ್ಯೆ ಮನೆಯಲ್ಲಿದ್ದ ವಸ್ತುಗಳು ನೀರಿನಲ್ಲಿ ತೇಲಾಡಿದವು. ಪಾಲಿಕೆ ಸದಸ್ಯೆ ಚಂದ್ರಕಲಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. 

ಹೊಸಕೆರೆಹಳ್ಳಿ, ಕೋಡಿಚಿಕ್ಕನಹಳ್ಳಿ, ಕೆ.ಪಿ. ಅಗ್ರಹಾರ ಪ್ರದೇಶಗಳಲ್ಲೂ ಹಲವು ಮನೆಗಳಿಗೆ ನೀರು ನುಗ್ಗಿದೆ. ಗಿರಿಯಾಸ್‌ ಲೇಔಟ್‌, ಸಿ.ವಿ.ರಾಮನ್‌ನಗರ, ಶಂಕರಮಠ, ಸಿಂಗಸಂದ್ರ ಸೇರಿದಂತೆ ಹಲವೆಡೆ ತಲಾ ಮೂರ್‍ನಾಲ್ಕು ಮನೆಗಳಿಗೆ ನೀರು ನುಗ್ಗಿದ ಬಗ್ಗೆ ವರದಿಯಾಗಿದೆ. ಸೌತ್‌ ಎಂಡ್‌ ವೃತ್ತದಲ್ಲಿ ಬೃಹತ್‌ ಗಾತ್ರದ ಮರವೊಂದು ಬುಡಸಮೇತ ಉರುಳಿದ್ದು, ವಿದ್ಯುತ್‌ ತಂತಿಗಳ ಮೇಲೆ ಬಿದ್ದಿರುವುದರಿಂದ ಒಂದು ವಿದ್ಯುತ್‌ ಕಂಬ ಕೂಡ ಮುರಿದುಬಿದ್ದಿದೆ.

ಪರಿಣಾಮ ಸುತ್ತಲಿನ ಪ್ರದೇಶಗಳು ಕತ್ತಲೆಯಲ್ಲಿ ಮುಳುಗಿದವು. ಅಲ್ಲದೆ, ಜೆ.ಜೆ.ಆರ್‌. ನಗರ, ಗಾಂಧಿ ನಗರದ ಆದರ್ಶ ಹೋಟೆಲ್‌ ಬಳಿ, ಚಿಕ್ಕಲ್ಲಸಂದ್ರ, ಮಲ್ಲೇಶ್ವರದ ಎಂಡಿ ಬ್ಲಾಕ್‌, ಜಯನಗರ 8ನೇ ಬ್ಲಾಕ್‌, ಚನ್ನಮ್ಮನಕೆರೆ ಪೊಲೀಸ್‌ ಠಾಣೆ ಬಳಿ, ರಾಜಕುಮಾರ್‌ ರಸ್ತೆ ಸೇರಿದಂತೆ 10 ಕಡೆ ಮರ ಹಾಗೂ ಮರದ ಕೊಂಬೆಗಳು ಮುರಿದು ರಸ್ತೆಗೆ ಬಿದ್ದು ಸಂಚಾರಕ್ಕೆ ತೊಂದರೆಯಾಗಿತ್ತು. ನಂತರ ಪಾಲಿಕೆ ಸಿಬ್ಬಂದಿ ತೆರವು ಕಾರ್ಯ ನಡೆಸಿದರು.

ಎಲ್ಲೆಲ್ಲಿ ಎಷ್ಟು ಮಳೆ?: ಕುಮಾರಸ್ವಾಮಿ ಲೇಔಟ್‌ 43 ಮಿ.ಮೀ., ಬಸವನಗುಡಿ 42, ಮಂಡೂರು 43, ಕೋಣನಕುಂಟೆ 40, ದೊಡ್ಡಗುಬ್ಬಿ 39, ಸಾರಕ್ಕಿ 34.5, ಬೇಗೂರು 23, ಆರ್‌.ಆರ್‌. ನಗರ 13.5, ದೊಡ್ಡಜಾಲ ಮತ್ತು ಸೋಮನಹಳ್ಳಿ 13, ಬೊಮ್ಮನಹಳ್ಳಿ 11, ಕೂಡಿಗೇಹಳ್ಳಿ 6, ಲಾಲ್‌ಬಾಗ್‌ 5.5, ಎಚ್‌ಎಸ್‌ಆರ್‌ ಲೇಔಟ್‌ 6.5, ಕೆ.ಆರ್‌. ಪುರ 7.5, ಹೆಮ್ಮಿಗೆಪುರ 9.5 ಮಿ.ಮೀ. ಮಳೆ ದಾಖಲಾಗಿದೆ ಎಂದು ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ಉಸ್ತುವಾರಿ ಕೇಂದ್ರ (ಕೆಎಸ್‌ಎನ್‌ಡಿಎಂಸಿ) ತಿಳಿಸಿದೆ. 

ವಿಮಾನಗಳ ಹಾರಾಟ ಸ್ಥಗಿತ: ಮಳೆಯಿಂದ ನಗರದಿಂದ ವಿಮಾನಗಳ ಹಾರಾಟಕ್ಕೂ ತೊಂದರೆ ಉಂಟಾಗಿ ಸುಮಾರು 39 ನಿಮಿಷಗಳ ಕಾಲ ವಿಮಾನಗಳ ಹಾರಾಟ ಸಂಪೂರ್ಣ ಸ್ಥಗಿತಗೊಂಡಿತ್ತು. ಸಂಜೆ 6.57ರಿಂದ 7.35ರವರೆಗೆ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಮಳೆ ಹಿನ್ನೆಲೆಯಲ್ಲಿ ವಿಮಾನಗಳ ಹಾರಾಟವನ್ನು ಸ್ಥಗಿತಗೊಳಿಸಲಾಗಿತ್ತು. ಈ ಅವಧಿಯಲ್ಲಿ ವಿವಿಧೆಡೆಯಿಂದ ನಗರಕ್ಕೆ ಬಂದಿಳಿಯಬೇಕಾದ ಏಳು ವಿಮಾನಗಳ ಪೈಕಿ ಆರು ಚೆನ್ನೈ ಮತ್ತು ಒಂದು ಕೊಚ್ಚಿಯತ್ತ ಮುಖಮಾಡಿದವು ಎಂದು ಬಿಐಎಎಲ್‌ ಸ್ಪಷ್ಟಪಡಿಸಿದೆ.

ಉತ್ತರದಲ್ಲಿ ಕುಸಿದ ತಾಪಮಾನ: ಅರಬ್ಬಿ ಸಮುದ್ರದಲ್ಲಿ ಕಂಡುಬಂದ ತೀವ್ರ ವಾಯುಭಾರ ಕುಸಿತದಿಂದ ರಾಜ್ಯಾದ್ಯಂತ ಮಳೆಯ ಆಟಾಟೋಪ ಮುಂದುವರಿದಿದೆ. ಬೆಂಗಳೂರು ಸೇರಿ ರಾಜ್ಯದ ಬಹುತೇಕ ಕಡೆ ಶುಕ್ರವಾರ ಮಳೆ ಅಬ್ಬರ ತುಸು ಹೆಚ್ಚಿತ್ತು. ಮಂಡ್ಯ ಮತ್ತು ಮೈಸೂರಿನಲ್ಲಿ ಗರಿಷ್ಠ ಮಳೆ ದಾಖಲಾಗಿದೆ. ಇದರಿಂದ ರಾಜ್ಯಾದ್ಯಂತ ತಾಪಮಾನ ಗಣನೀಯ ಪ್ರಮಾಣದಲ್ಲಿ ಕುಸಿದಿದೆ. ಸಾಮಾನ್ಯವಾಗಿ ಮಾರ್ಚ್‌ನಲ್ಲಿ ಉತ್ತರ ಕರ್ನಾಟಕದಲ್ಲಿ ಉಷ್ಣಾಂಶ ಸಾಮಾನ್ಯಕ್ಕಿಂತ 2-3 ಡಿ.ಸೆ. ಹೆಚ್ಚಿರುತ್ತದೆ. ಆದರೆ, ಸತತ ಮೂರು ದಿನಗಳ ಮಳೆ ಮತ್ತು ಮೋಡಕವಿದ ವಾತಾವರಣದಿಂದ ತಾಪಮಾನ 5ರಿಂದ 6 ಡಿ.ಸೆ.ಕುಸಿತ ಕಂಡಿದೆ.