ವಿವೇಕ್‌ ಒಬೆರಾಯ್‌ ವಿವಾದಿತ ಟ್ವೀಟ್‌ ಡಿಲೀಟ್‌, ಮಹಿಳೆಯನ್ನೆಂದೂ ಅಗೌರವಿಸಿಲ್ಲ

ಮುಂಬಯಿ : ಬಾಲಿವುಡ್‌ ನಟ ವಿವೇಕ್‌ ಒಬೆರಾಯ್‌ ಅವರು ಬಾಲಿವುಡ್‌ ನಟಿ ಐಶ್ವರ್ಯಾ ರೈ ಬಚ್ಚನ್‌ ಕುರಿತ ತನ್ನ ವಿವಾದಿತ ಟ್ವೀಟನ್ನು ಡಿಲೀಟ್‌ ಮಾಡಿದ್ದಾರೆ. ಯಾವುದೇ ಮಹಿಳೆಯನ್ನು ಅಗೌರವದಿಂದ ಕಾಣುವುದನ್ನು ನಾನೆಂದೂ ಯೋಚಿಸಲಾರೆ ಎಂದು ವಿವೇಕ್‌ ಹೇಳಿದ್ದಾರೆ.

ಒಬೆರಾಯ್‌ ಅವರು ಮತಗಟ್ಟೆ ಸಮೀಕ್ಷೆಗೆ ಸಂಬಂಧಿಸಿ ತಾನು, ಐಶ್ವರ್ಯಾ ರೈ ಬಚ್ಚನ್‌ ಮತ್ತು ನಟ ಸಲ್ಮಾನ್‌ ಖಾನ್‌ ಇರುವ ವಿವಾದಿತ ಮೀಮ್‌ (meme) ಒಂದನ್ನು ಶೇರ್‌ ಮಾಡಿಕೊಂಡಿದ್ದರು. ಅದಕ್ಕೆ ವ್ಯಾಪಕ ಟೀಕೆ, ಖಂಡನೆ ವ್ಯಕ್ತವಾಗಿತ್ತು.

ಮಾತ್ರವಲ್ಲದೆ ಮಹಾರಾಷ್ಟ್ರ ರಾಜ್ಯದ ಮಹಿಳಾ ಆಯೋಗ ಮತು ರಾಷ್ಟ್ರೀಯ ಮಹಿಳಾ ಆಯೋಗದಿಂದಲೂ ವಿವೇಕ್‌ ಒಬೆರಾಯ್‌ ಗೆ ನೊಟೀಸ್‌ ಜಾರಿಯಾಗಿ ಸ್ಪಷ್ಟನೆಯನ್ನು ಕೋರಲಾಗಿತ್ತು.

“ಕೆಲವೊಮ್ಮೆ ಮೇಲ್ನೋಟಕ್ಕೆ ತಮಾಷೆಯ ನಿರುಪದ್ರವಿ ಸಂಗತಿಗಳು ಕೆಲವರಿಗೆ ಹಾಗೆ ಅನ್ನಿಸದಿರಬಹುದು; ನಾನು ಕಳೆದ ಹತ್ತು ವರ್ಷಗಳನ್ನು 2,000 ಕ್ಕೂ ಅಧಿಕ ಅವಕಾಶ ವಂಚಿತ ಹೆಣ್ಣು ಮಕ್ಕಳ ಸಶಕ್ತೀಕರಣಕ್ಕಾಗಿ ದುಡಿದಿದ್ದೇನೆ; ಯಾವೊಬ್ಬ ಮಹಿಳೆಯನ್ನೂ ಅಗೌರವದಿಂದ ನಾನು ಕಾಣಲಾರೆ” ಎಂದು ವಿವೇಕ್‌ ಒಬೆರಾಯ್‌ ಟ್ವಿಟರ್‌ನಲ್ಲಿ ಬರೆದಿದ್ದಾರೆ.